ANU MOMPOLELE POTATAE NU TUMPU 1 - KITAB NU TUMPU ALLA LELE MA'IMAI'

¹ Iwi-iwi' na sisik i kitab aiya lengkat mae hi anu saja' Bapikin, anak mo'ane i Daud anu nombolosakon i Daud binau tomundo' i Yerusalem.

² Anu saja' Bapikin notatae; iwi-iwi' palasuma' madi' ko gunanyo! Kantumuu'an aijo' palasuma' iwi-iwi aijo' madi' ko alati'nyo.

³ I uno nu kantumuu'anto kita mokalaja, mompao'i lisongu. Panyo iya na hasinnyo anu timbali okinti-kintiakonto?

⁴ Tulunan sa'angu' tokamo mae ka' mule' tulunan sangga'at imadi'anmo, panyo dunia na sapulinyo ahi' tataap.

⁵ Batu nu sinaa daagi'ahi' bete'mae ka' daagi' mule' ahi' makakinsap. Ia nongoa'imo lawe na ninsusule' itampatnyo momona, lantas bete' mule' ahi'.

⁶ Mombun tobungmo mokiijo' sasu salatan, lantas mamba mule' sasu utara, ia mintombusisi'mo lantas po ule'mo minsusule'.

⁷ Kaunyo iwi-iwi mo'ili mokaiyong i ambai, panyo ambai madi' ko kabuke'annyo. Ueenyo po ule' mule' minsusule' matanyo, lantas po ule' mule' mae mo'ili.

⁸ Iwi-iwi' mongosaimo ka' kapa'osan madi'mo opoko ala otaeakon. Matanto aiya madi' ko kapobosuannyo na lewa' monjonohi, bihingto suele madi' kokapa'osannyo na mohongo.

⁹ Apaa na anu toho'mo jinadi aijo' jadi mule'. Apaa na anu toho'mo binau aijo' obau mule'. Madi' ko sa'angu pe'e na anu salaje' omulai obau i dunia aiya.

¹⁰ Daagi ko mian anu notatae, “Toa pe'e aiya na anu salaje' binau!” Panyo aijo' ma'isa pe'e kita ihampeakon polo-polo'mo daag.

¹¹ Apaa na anu jinadimo naipuan mae, madi'mo nu inau' nu mian. Sumo aitumo na kajadian tempo uuka aiya ka' mule' anu aiya mae i ahop madi'mo nu inau' nu mian imihinyo mae.

Anu toho'mo binau nu anu saja' Bapikin

¹² Aku anu saja' Bapikin nompalentahmo i Yerusalem susumo tomundo' nu Israel.

¹³ Pinagala sinelidikanku ka' nonggulu'i ima-ima' apaa na anu jinadimo i dunia aiya. Nasib anu pinosadiamo nu Tumpu Allah hi kita nonsaduakonmo da kinyonyoanto sinusa'mo hondo.

¹⁴ Tinoangkumo iwi-iwi' na palabuatan nu mian i dunia aiya. Palesaya na uuka, iwi-iwi' aijo' madi' kogunanyo, sumomo mompagala mololoi' mombun.

¹⁵ Anu tageo' madi'mo opoko ala opohodi' ka' mule' anu imadi'anmo madi'mo opoko ala olekeng.

¹⁶ Ku tutugi, “Aku aiya tinimbalimo anu o'angga'i ka' pinandemo majo'on na pompala'inyo nu kapandeanku de obandingakon hi iwi-iwi' na mian anu nompalentahmo i Yerusalem anu ma'isa pe'e kino akunyo. Manjoo' na anu ihumpaku na kapandean tiba ilimu'.”

¹⁷ Pinagalangku sinumbu'ku na kapandean tiba kaponga'an pa' mosia na bedanyo ka' mule' kapandean mompopikilakon apa-apaa ka' mule' anu ponga' hondo. Panyo inyata' kuje taalu' aku aiya ola ahi' susumo mimbalu-balu' mololoi mombun.

¹⁸ Saba' mompaka pintuang na kapandean bapikin, sumo aijo' mule' mompaka pintuangmo na bata-bata. Mompaka pintuang na kapandean, mompaka pintuang mule' na kasusa'anto.