DANIEL 7 - KITAB NU TUMPU ALLA LELE MA'IMAI'

I DANIEL NONSISIKMO APAA NA ANU TINOANYOMO 7:1–12:13 I Daniel nontoamo opat na binatang

^1-2 Daagi' kinosampahuan i taun momonanyo i Belsyazar tinimbali tomundo' i Babel, aku i Daniel nongipimo ka' nontoamo. Ipion aijo' tinuliskumo ka'pinoto'ingkumo na anu tinoangkumo aijo' sumo uuka: Mombun anu mabohos hondo lengkatmo mae iyaya sahingga binokolonmo na ndalangon.

³ Lapas aijo' opat na binatang anu daka' hondo ilubatmo mae i uno nu apan, madi' pokakana sa'angu' tiba sa'angu'.

⁴ Anu momona sumo singa panyo ia kopolipiknyo susumo tomonsi' alaimbelong. Hau-haunyo aku montonto'i madi' pinin polipiknyo tinombubutmo ka' nototodakmo; ia tinolohangkatmo lengkat i tano' ka' pinotinjomo i ohua' na tengke susumo manusia, lantas binee'anmo pikilan nu manusia.

⁵ Binatang anu ko ohua'nyo sumo beruang. Ia tuminjo nu tengkenyo anu i pa'anyo sasu hikunyo, ka' nontoong totolu' na kolongannyo nu bukunyo nu has sika-sika sengan i bese'nyo. I hongongku na potatae hi ia, “Soba kaanmo na antok nu ponoha' konjoo'nyo yayamo na anu nu ka'ima'i!”

⁶ Hau-haunyo aku montonto'i, binatang anu ko opatnyo ilubatmo mae na binatang sangga'at. Lupanyo sumo harimau panyo aita' itundunnyo opat na sumo polipik nu tomonsi' ka' ia ko ubaknyo opat. Ia otoa balakuasa hondo.

⁷ Hau-haunyo aku montonto'i, binatang anu ko opatnyo ilubatmo mae. Ia mahoson hondo ka'baani ka' okabuhuk. Bese'nyo anu toto daka-daka' ka' talalo mokuut susumo besak nohansunimo ka' pinaha kaannyomo na kaanonnyo lantas pinahampeja'akonnyomo na tuha'nyo. Madi' pokakana tiba binatang anu ma'isa pe'e kino ianyo aijo, ia ko tanduknyo sampulu'.

⁸ Hau-haunyo aku mompalahatikan tanduk haha aijo' monti-montiik sa'angu' na tanduk sangga'at tinumuu'mo i olotnyo. Tanduk aijo' ise'panyo timbali monggegenso ka' mombubut totolu' na tanduk haha aijo' anu memang polo-polo'mo. Tanduk ise'ai-aijo' ko matanyo sumo mata nu manusia, ko nganga'nyo ka' saja' montaeakon potatae anu taka-takabun.

Nontoamo Ia anu tumuu' sampe taka sidu-sidutu'

⁹ Hau-haunyo aku saja' montonto'i to pia-piangkuka na kadela nu tomundo' pinokokomo. Lantas Ia anu tumuu' sampe toka sidu-sidutu' sinumuhangmo i sala' sa'angu'na kadela nu tomundo' aijo'. Baju'-Nyo ka' bulu nu ubak-Nyo pute' ka' belesi' hondo sumomo ahi' kabu-kabung. Kadela-Nyo aijo' ko loda-lodanyo singkap moak kalana nusuhap nu apu,

¹⁰ ka' apu aijo' molele mae lengkat i kadela nu tomundo' ai-aijo'. Momada-madala na mian anu molayani Ia, ka' juta'an nu mian tinuminjomo i ahop-Nyo. Lapas aijo' tinampu'unanmo na nomputusi ka' iwi-iwi' na kitab pinaha buka'mo.

¹¹ Hau-haunyo aku montonto'i daagi' saja' ihongongku na tanduk ise' ai-aijo' nontaeakon potatae anu to taka-takabun. Lapas aijo' binatang anu ko opatnyo aijo' pinateanmo ka' bangke'nyo ilumbu'akonmo i uno nu apu sahingga noangotmo.

¹² Binatang haha aijo' sangga'at ingalamo na kakuasa'annyo, panyo aha daagi' pinobee' tumuu' sampe tokaje mae na tempo'nyo anu tinantukanmo.

¹³ Anu tinoangku pihi-pihi aijo', tinoangku daagi' ko anu susumo manusia. Ia tinoka mae sinaput nu kundom lantas nambamo hi Ia anu tumuu' sampe toka sidu-sidutu' ka' pinoto'imo na sanggonyo hi ia.

¹⁴ Ia binee'anmo kaholomatan tiba kakuasa'an salaku tomundo' sahingga to mia-mian anu i iwi-iwi na bansa tiba tulunan nu bansa ka' mule' basa' tunduk hi Ia. Kakuasa'an-Nyo pin sampe toka sidu-sidutu', ka' Ia mompalentah madi'mo daagi' opobelenti.

Anu singkap tinoanyo aijo' tinalangkanmo

¹⁵ Anu singkap tinoangku aijo' nompobingongmo hondo aku ka' nangada'mo na kinyonyoangku.

¹⁶ Lantas ingohaniankumo na sala'samian anu tinuminjo ikiijo' ka' pinoitangkumo na katalangan nu anu jinadimo iwi-iwi' aijo'. Sahingga pinoto'inyomo mae.

¹⁷ Ia nompoto'i mae, “Opa-opat na binatang toto daka-daka' haha haha aijo', saba' te kalaja'an anu jadi saidi' mae i dunia aiya.

¹⁸ Panyo mian anu palesayamo hi Tumpu, Anu Matangkas na Kuasanyo na montalimaje hak da mompalentah ka' pamalentahannyo timbali pin hondo sampe toka sidu-sidutu'.”

¹⁹ Lapas aijo' aku mongkahanda'imo da monsumbu' alati'nyo nu binatang anu ko opatnyo aijo' anu madi' pokakana tiba binatang sangga'at; anu talalo okabuhuk hondo ka' nohansunimo ka' mule' nongkaanmo kaanonnyo anu ihakop nu konukunyo tambaga' ka' bese'nyo besak, ka' nompahampeja'akonmo tuha'nyo.

²⁰ Kahanda' mule' kusumbu' pa apaa na alati'nyo na sampulu' na tanduk i ubaknyo ka' mule tanduk anu ise' ai-aijo' anu tinumuu' mae lantas nombubutmo totolu' na tanduk haha aijo' anu tinumuu'mo momona. Tanduk anu ise' ai-aijo' ko matanyo ka' mule' ko nganga'nyo ka' potataenyo saja' takabun. Ia talalo hondo okabuhuk nu lingkudui na tanduk haha aijo' sangga'at.

²¹ Salatan pinalahatikankumo talu' tanduk aijo' mahampate mongewamo mian anu palesayamo hi Tumpu ka' mompatundu'mo aha.

²² Lapas aijo' Ia anu tumuu' sampe toka sidu-sidutu' tokamo mae lantas mombee'imo kaputusan anu mompototu'u mian anu palesayamo hi Tumpu Allah Anu Matangkas na Kuasanyo. Tinokamo na tempo'nyo aha montalimamo kuasa da mompalentahmo.

²³ Sumo uuka na katalangannyo anu ihumpakumo, “Binatang anu ko opatnyo aijo', aijo'mo na kalaja'an anu ko opatnyo anu tinuminjo i dunia aiya ka' madi' pokakana tiba kalaja'an haha aijo' sangga'at. Kalaja'an aijo' mohansunimo ka' mule' mongkuasaimo songko-songko na dunia ka' mompahampeja'akonmo tuha'nyo.

²⁴ Anu sampulu' na tanduk haha aijo', aijo'mo na tomundo' aha sampulu' anu mompalentah saidi' mae kalaja'an aijo'. Lapas aijo' samian na tomundo' sangga'at tokamo mae; ia madi' hondo pokakana tiba to tomu-tomundo' anu momona, ka' ia na anu mompatundu' totolu' na tomundo'.

²⁵ Ia saidi' mae motatae, tukoonyo mongewamo Tumpu Anu Matangkas na Kuasanyo ka' mule' monsakisamo mian anu palesayamo hi hi Tumpu. Ia bala usaha da iwi-iwi na atulan obali'imo ka' mule' bau-bauon nu agama nu aha mian anu palesayamo hi Tumpu ka' mule' aha iamo na mongkuasai kopinnyo totolu' ka' mintonga na taun.

²⁶ Lantas mian kopian kiita' isuluga' balagombumo ka' momputusimo da po ule'mo o, ala na kakuasa'annyo ka' mohansunimo ia sampe mingkot.

²⁷ Kakuasa'an tiba katalasanggoan nu iwi-iwi' na kalaja'an i dunia aiya, obee'mo hi mian anu palesayamo hi Tumpu Anu Matangkas na Kuasanyo. Kakuasa'an nu aha mompalentah madi'mo daagi' ko kamingkotannyo ka' mule' iwi-iwi' na anu balakuasa i dunia aiya ta'alukmo ka' mule' tulu-tulutanmo.”

²⁸ Sumo uuka na lapulan aiya. Aku nangada'mo hondo sahingga inesemo, panyo madi' ko samian pe'e na anu pinompoto'ianku apaa na anu jinadimo aijo' iwi-iwi'.