DANIEL 1 - KITAB NU TUMPU ALLA LELE MA'IMAI'

SISIKON MONGKONA I DANIEL TIBA TO SANGA-SANGALUNYO 1:1–6:29 To oli-olitau nu Yehuda i laigan nu tomundo' Nebukadnezar

¹ Tinotolu' na taun salatan i Tomundo' Yoyakim nompalentahmo Yehuda, i Nebukadnezar tomundo' nu Babel nontumbuhimo kota' Yerusalem ka' nahampatemo.

² Tumpu nom poloasmo ia nompatundu' i Tomundo Yoyakim ka'nompahuhuakonmo sambahagian na to bala-balang anu mahan na olinyo i Laigan nu Tumpu. To mia-mian anu ihakop binoanyomo i kuil poponsombannyo pilogot i Babel ka' mule' to bala-balang anu mahan na olinyo pipinahuhuakonnyo, pino una'mo i uno nu gudang nu kuil haha aijo'.

³ Lapas aitu i tomundo' nompalentahmo i Aspenas kapala nu auwan i laigan nu tomundo' da mompile'i aha anu ihakop ka' binoamo mae aijo' anu aijo' hi aha mian nu Israel, to pia-piangkuka na to oli-olitau tulunan nu tomundo' kabai anu ko ninitannyo mae nu aha mian daka'.

⁴ Aha tionyo ahi' to oli-olitau anu madi' ko nodanyo. Aha tionyo ahi' anu tingkai'on ka' anu ko sikolahnyo matangkas, ka' monsumbu' apa-apaa na anu jadi ka' mule' anu pantas ahi' na mokalaja i laigan nu tomundo'. I Aspenas tionyo ahi' mongajan aha mombasa ka' mule' montulis basa' nu aha Babel.

⁵ I Tomundo' nontantukanmo anu okaan tiba anu o inum nu aha tionyo ahi' pokakana tiba anu oposadiakon hi aha auwan i tomundo'. Salatan o ajanmo kopinnyo totolu' na taun aha tionyo ahi' opopangadapmo hi tomundo' da mokalajamo i laigan nu tomundo'.

⁶ Hi aha olitau haha aijo' kiijo'mo ahi' suele na i Daniel, i Hananya, i Misael tiba i Azarya, iwi-iwi aijo' lengkat mae hi lee' nu bansa Yehuda.

⁷ Kapala nu auwan i laigan nu tomundo' nombali'imo sanggo nu aha tinimbalimo: i Beltsazar, i Sadrakh, i Mesakh, tiba i Abednego.

^8-9 Kalana tinulunganmo nu Tumpu, i Daniel nu kanonongi ka' nu kalibosi i Aspenas. I Daniel madi' hondo mongka'oho' ohumimi'i na butongnyo nu anu okaan ka' monginum anggur i laigan nu tomundo' kalana aijo' ia nomoitamo hi Aspenas da timbali mohumpak kaanon sangga'at.

¹⁰ Kalana mabuhuk hi tomundo' i Aspenas notataemo, “Posi i Tomundo' ahi' na nontantukan anu okaan tiba anu o inum, jadi de mombatuki pongka'oho' nu beleyum, dumo beleyum madi'mo sehat madi'mo pokakana tiba to oli-olitau sangga'at, tantu aku nu pateimo i tomundo'.”

¹¹ Lapas aitu i Daniel nombisalakonmo han aijo' hi mian anu monjagai i tomundo' bibine'an kalaja i Aspenas da mongulus i Daniel tiba aha totolu' na sangalunyo. Koonyo i Daniel,

¹² “Soba uji' mae na kami kopinnyo sampulu'an na sinaa; bee'i mae na kami mau ola sahanyo utan tiba uee da okaan ka' o inum.

¹³ Salatan sampulu'anmo na sinaa toaje mae na butong mami tiba butong nu to oli-olitau haha aijo' anu mongkaan, kaanon anu tinantukanmo i tomundo', lantas alamo na kaputusan pa' mosia na tanga'an nu beleyum.”

¹⁴ Mian anu monjagai i tomundo' nonsitujuimo ka' nombaumo da monsoba-soba kopinnyo sinampulu'an na sinaa.

¹⁵ Salatan tempo'nyo ningkotmo aha tinoa lebemo sinehat ka' mule' nahosonmo ilingkuduannyomo nu aha iwi-iwi' na to oli-olitau anu mohumpak kaanon i meja' nu tomundo'.

¹⁶ Me puusnyo aitu na mian anu monjagai i tomundo' aijo', madi'mo nontatuakon hi aha anu okaan tiba anu o inum, anu titinantukanmo i tomundo', lantas ola ahi' utan tiba uee.

¹⁷ Tumpu nombee'imo hi aha opa-opat na olitau aijo' kapandean bapikin ka' pande mule' na mombau pakalaja'an i uno nu sa'angu' na pakalaja'an. Ka' mule' i Daniel binee'an-Nyo kapandean da timbali montalangkan anu nu potoa nu Tumpu tiba anu opo'ipiakon.

¹⁸ Salatan ilapasmo tinotolu' na taun na nosikolah susumo anu tinantukanmo nu tomundo' aijo', i Aspenas nomboamo iwi-iwi' na olitau haha aijo' nangadap hi tomundo' Nebukadnezar.

¹⁹ Salatan pinoki-pokilawamo i tomundo' hi aha iwi-iwi' sinumbu'mo i tomundo' talu' i Daniel, i Hananya, i Misael, tiba i Azarya molingkudui sangga'at mongkona iwi-iwi na han. Jadi nontampu'unimo na aha nokalaja i laigan nu tomundo'.

²⁰ De i tomundo' mompoto'imo hahan anu palalu katalangan tiba anu opopikilakon nu toa saba' pokinde' tiba pikilan nu aha opa-opat na olitau haha aijo', pinsampulu' lipat na polingkuduinyo pokinde' tiba pikilan nu aha iwi-iwi' anu lewa' montahi'i ka' mule' anu kopangatahuan i uno nu songko-songko na kalaja'annyo.

²¹ I Daniel tataap mokalaja i laigan nu tomundo' sampe tinoka hi Tomundo' Koresy anu lengkat mae i Persia nonompatundu'mo Babel.