AYUB 30 - KITAB NU TUMPU ALLA LELE MA'IMAI'

¹ Panyo uuka aiya aku nukokojoi nu to oli-olitau, u'utu mae tuuma nu aha ola ku angga'i anu madi' ko kaliangannyo, molaya' dombangku tiba dedeng polaya'.

² Aha madi' ko kaliangannyo hi belengku kalana madi'mo ko kahosonan.

³ Aha no'ohopmo hondo ka' talalomo sinansala, sahingga lewa'mo mongkaan bakat nu kau' anu nanggasmo i tano' anu nategesmo ka' i liingmo hondo madi'mo ko lewo-lewo' nu mian.

⁴ Aha lewa' monggauti hemputi tano' anu ewa, lantas nukaanmo nu aha na honnyo ka' mule' bakatnyo.

⁵ Aha sinegan na nolaa' susumo nolaa' mian anu tomang.

⁶ Aha me lewa' jojoong i liang; i bolo' anu i sohipi' nu bungkutnyo aijo'mo na bau laigan nu aha.

⁷ I uno nu alas aha sola' molobo susumo binatang, mogombu-gombu na aha i uno nu kuhat.

⁸ Sanggo nu aha i madi'an ka' madi' ko angga'nyo, to mia-mian anu i laa'mo mae lengkat i lipu' nu aha.

⁹ Uuka aiya aha tinokamo mae ka' nongkokojoimo mae aku; de hi aha, aku aiya na ola ahi' bau timbali moko kojoo aha.

¹⁰ Aku na nutoa nu aha na anu ahi' madi' mingkaliangan ka' oka'idekimo, ka' mule' ohupku nutupe'i nu aha.

¹¹ Kalana aku binaumo nu Tumpu Allah da madi'mo nahoson, ka' madi'mo moko ala mombau apa-apaa, aha nompotudunmo tambuha' nu aha.

¹² Mian anu toto ide-idek na kinyonyoanyo haha aijo' nolambanimo mae aku i sasu ahopku ka' aku kinonamo nu balaa' aiya, memang i niatakonmo nu aha.

¹³ Jalanku ginolotakonmo nu aha da aku opateimo; madi' kino samian pe'e na anu nontewa' aha tempo'nyo aha nolambani mae.

¹⁴ Sumomo ahi' iyaba' na aha tinoka mae nombuntuli mesen anu bau kahosonanku; nosangaja'mo mae hingga-hinggat na aha tinoka mae nongutuni butongku.

¹⁵ Anu talalo ahi' okabuhuk na nontuda'i mae butongku; sumomo ahi' mombun na nompuhakon angga'nyo nu butongku tinilahabakonnyomo; susumo kundom notulu, i madi'anmo kino kasananganku.

¹⁶ Uuka aiya aku kinoboli' natemo; madi' gana' ko kapaga'annyo na kasansalanku.

¹⁷ De pihimo bukungku iwi-iwi' umuntukmo; untuk anu taha-tahahumo madi'mo ko kamingkotannyo.

¹⁸ Tinonganmo nu Tumpu Allah i gogohong nu baju'ku sahingga baju'ku ninsasambemo i butongku.

¹⁹ Aku ilumbu'akon-Nyomo i uno nu hensek, aku me susumo duhehe!

²⁰ Aku nomoitamo tulung hi Belento, O Tumpu Allah, Belento madi' mae nontaami; de aku balado'a, belento madi' mae mompajuli.

²¹ Belento talalomo mae masigo hi belengku sinin na kahosonan nu Belento pinonsakisamo mae aku.

²² Belento nompojohokmo mae aku da nutilahabakonmo nu mombun, i uno nu antong anu makansang hondo Belento nombali-balikakonmo aku.

²³ Ku sumbu', na Belento nomboamo aku i tampat anu monsilakai, pomposihukan ka' bau kajojoongan nu anu daagi' tumuu' iwi-iwi'.

²⁴ Kadaka' Belento nolambanimo mae mian anu tinuda'anmo nu balaa' anu madi'mo moko ala mombau apa-apaa me samata-mata mongkakaase da okalibosi?

²⁵ Te misa' aku i humangmo ahi' tiba mian anu sinusa'mo, ka' mongkalibosimo mian anu madi'anmo ko apa-apaa?

²⁶ Aku mongima-imani ka'ima'an nu kantumuu'an ka' jingka, panyo kasusa'an ka' pikat na tinokamo mae.

²⁷ Aku binea-beakmo nu kapatean ka' kasusa'an anu taha-tahahumo; sansina-sinaa mompaka panjoo' mo na kasansala'anku.

²⁸ I uno nu pikat, madi' ko jingka-jingkanyo, aku mahalajanganmo; tinuminjo na aku i ahop nu mian da'isan, nomoita tulung.

²⁹ Potataengku talalomo hondo nolibos susumo keek nu serigala ka' tomonsi' unta.

³⁰ Kilitku no'itomo; butongku notoyo'mo kalana ingu nu mian.

³¹ U'utu mae i hongongku na musik lame' hondo, uuka aiya memo ahi' haang tiba tando' na daagi'.