AYUB 1 - KITAB NU TUMPU ALLA LELE MA'IMAI'

I Ayub sinobanmo nu ibilis

¹ I tano' Us daagi' ko samian na mo'ane anu jinojoong sanggonyo i Ayub. Ia nonsombah Tumpu Allah ka' montuluti hondo Ia. Ia mian anu ma'ima' hondo na kinyonyoanyo ka' madi' hondo lewa' mombau anu ma'idek.

² Ia kino to ana-anak mo'ane aha popitu' ka' aha totolu' na boune.

³ Ka' mule' ia ko to posa-posaihon manjoo' hondo, 7.000 na domba, 3.000 na unta, 1.000 na sapi', ka' 500 na keledai. Osanggomo pe'e na mian aijo', ia mian anu kaya hondo anu jojoong i da'erah sasu kabete'an.

⁴ Aha popitu' na to ana-anak mo'ane i Ayub ko kabiasa'an saja' mombau bau-bauon i laigan nu aha toto samian mobolo-bolos. I bau-bauon aijo' aha toto-totolu' na anak i Ayub anu toto bou-boune suele ahi' olaga, lantas aha mongkakaanmo ka' monginu-inum hingga-hinggat.

⁵ Salatan lapasmo na bau-bauon i Ayub mobulamo subu-subu ka' nonsombahkonmo koloban kona hi to ana-anaknyo toto samian da aha nu'ampuni nu Tumpu. Kalana nututugi i Ayub ihe na monsumbu'anaknyo haha aijo' binaladosa'mo ka' nongalumo Tumpu Allah mau madi' tinotonggolakon.

⁶ Daagi' kino sansinaan to mala-malaekat kiita' i suluga' nangadapmo hi Tumpu, ka' Anu Lewa' Monggoda kiijo'mo hi aha suele hingga-hinggat.

⁷ Pinokilawamo nu Tumpu na ia, “Lengkat mae iya na beleyum?” Tinaaman nu Anu Lewa' Monggoda, “Aku sala'je mae lewa' i namba nonsongkohi dunia ka' nolajangi tinoka-toka iyayamae.”

⁸ Lantas pinokilawamo nu Tumpu, “Pa' totu-totu'u tinoamo nu beleyum na mianku i Ayub? I dunia aiya songko-songko madi' ko mian anu ma'ima' na kinyonyoa sumo ia. Ia monsombah Aku ka' totu-totu'u madi' lewa' mombau anu ma'idek.”

⁹ Panyo Anu lewa' Monggoda nontaami, “Memang i Ayub monsombah belento, kalana ia mohumpak balosnyo lengkat hi belento.

¹⁰ Ia, aha salaigan ka' iwi-iwi' na kakaya'annyo saja' nutoakon nu Belento. Kalajanyo nubalakati nu Belento, ka' ia obee'i nu Belento manjo' hondo na potu'on, lipu' songko-sogko nusongkohimo nu potu'onnyo.

¹¹ Panyo de maluannyo iwi-iwi' na kakaya'annyo aijo' o'alamo nu Belento, tantu nutotobi'akonmo na belento!”

¹² Jadi pinoto'imo nu Tumpu hi Anu Monggoda aijo', “Ma'ima'mo desumo itina', baumo pa' oposiamo na kakaya'an i Ayub iwi-iwi' asan boli oko mondoke ia.” Lantas Anu Monggoda aijo' nambamo pinala'iannyomo na Tumpu.

To ana-anak ka' kakaya'an i Ayub iningkotmo

¹³ Ilapas aijo' madi' pinin to ana-anak i Ayub hau-haunyo mombau-baoun i laigan nu utus tu'a nu aha.

^14-15 Monti-montiik posaihon nu aha samian tinokamo mae popopadeka' i laigan i Ayub nompoto'i, “O tuan, aha mian nu Syeba tinokamo mae nontumbuhi kami hau-haunyo sapi' iwi-iwi' mompajeko ale' ka' keledai iwi-iwi' hau-haunyo mongotot madi' majo'on lengkat i kiijo'. Pinahuhuakonmo nu aha na binatang haha aijo', ka' to posa-posaihon nu Belento tuan. Pinaha pateanmo nuaha na anu i kiijo'. Olamo aku aiya na noko ala nopalai mae da mompoto'i hi belento Tuan.”

¹⁶ Daagi' hau-haunyo ia motatae, tinokamo mae mule' na posaihon anu ko ohua'nyo nompoto'i, “Iwi-iwi' na domba nu Belento Tuan tiba aha anu lewa' molaya' sinosakmo nu kilat sahingga sinilakamo iwi-iwi'. Olamo aku aiya na noko ala nopalai mae da mompoto'i hi belento Tuan.”

¹⁷ Ia ma'isa ilapas na notatae, tinokamo mae mule' na posaihon anu kototolu'nyo nompoto'i, “Toto'lu na gombuan nu tololang aha mian nu Kasdim nontomangmo iwi-iwi' na unta nu Belento Tuan. Ka' nompateimo to posa-posaihon. Olamo aku aiya na noko ala nopalai mae da mompoto'i hi belento Tuan.”

¹⁸ Daagi' hau-haunyo ia motatae, tinokamo mae mule' na posaihon sangga'at anu momboa mae lele, “To ana-anak nu Belento Tuan hau-haunyomo nombau-bauon i laigan nu anak nu Belento Tuan anu tumpe-tumpenyo.

¹⁹ Monti-montiik tinokamo mae na tombusisi' lengkat mae i sasu padang bone' ka' nontuda'imo laigan aijo' sahingga nonsilakaimo iwi-iwi' na anak nu Belento Tuan. Olamo aku aiya na noko ala nopalai mae da mompoto'i hi Belento Tuan.”

²⁰ Lantas tinuminjomo na i Ayub ka' binea-beaknyomo na baju' nyo salaku tanda sinusa'mo hondo na kinyonyoanyo. Kiniisnyomo na ubaknyo lantas tinolodadupumo ka' notatae,

²¹ “Aku ihampeakon ola lima sampulu' sumo aitu mule' na aku de silakamo ola butong hondo-hondo. Tumpu na nombee'mo, Tumpu mule' na mongala. Ku puji' na sanggo-Nyo.”

²² Jadi, maumo i Ayub nongoa'imo iwi-iwi' na balaa' susumo aijo', ia madi' nombau dosa' ka' madi' nompisala'i Tumpu Allah.