AMSAL 31 - KITAB NU TUMPU ALLA LELE MA'IMAI'

Pokinde' kona hi tomundo'

¹ Sumo uuka na potatae i Lemuel tina nu tomundo' nu aha lipu' Masa, pinoto'inyo hi anaknyo;

² “O anaku anu ku una' ikinyonyoangku anu ihampeakonkumo salaku bau pontaami do'angku. Apaa na anu tionyo ku taeakon hi beleyum?

³ Boli ola lewa' mombea-beasakon kahosonan nu butong nu beleyum kabai ola lewa' monsa'u kahosonan nu beleyum hi boune. Manjoo'mo na tomundo' anu ihansun kalana boune.

⁴ Inau' na i Lemuel! Monginum anggur ka' kinatageanmo monginum anu moko palangu, madi'mo pantas na timbali anu balakuasa.

⁵ Kalana de tomundo' monginumo inumon anu moko palangu nu kolilimimo na atulan ka' madi'mo montapali haknyo nu mian anu madi'mo moko ala mombau apa-apaa.

⁶ Inumon anu moko palangu aijo' bagi nu aha anu kasiasi ka' anu madi'mo ko anu opitaha-taha'imani.

⁷ Aha monginum da bolimo lewa' monginau aha kasiasi tiba kasusa'an nu aha.

⁸ Tinjohiakon na aha anu madi' moko ala montinjohi butong nu aha. Jagaiakon na hak nu mian iwi-iwi'anu madi' moko ala mombau apa-apaa.

⁹ Sangaja'iakon na aha, ka' jadimo mian kopian anu adin. Jagaiakon na hak nu mian anu kasiasi ka' mian anu pinosansalamo.”

Bengkele' anu pande

¹⁰ Bengkele' anu pande susa' na ohumpak; ia lebe ko angga'nyo nu lingkudui na intan anu jongkilaban.

¹¹ Langkai'nyo madi' kokakulangan apa-apaa; kalana palesaya hi ia.

¹² Ia madi' toho' mombau anu ma'idek hilangkai'nyo; i uno nu kantumuu'annyo ola saja' ka'ima'an na nu bau hi ia.

¹³ Ia makeke na mamba mongala hemput rami ka' monggunting bulu nu domba; lantas saja' mokalaja montonun.

¹⁴ Majo'on na mamba pongalapannyo mae anu okaan; susumo nu bau nu mian anu badagang oboa mae nu kapan.

¹⁵ Ia mobula daagi hondo subu-subu da montoukaimo anu okaan nu aha salaigan; ka' mombagi-bagiakon pakalaja'an hi to posa-posaihonnyo.

¹⁶ Ia molio tano' pongale'an lantas ingolinyomo; ia mongusahakon sa'angu' na ale' nu anggur anu ihumpaknyo na olinyo ipolioannyo.

¹⁷ Pinosadianyomo na butongnyo; da mokalaja totu-totu'u.

¹⁸ Nu sumbu' saba' iwi-iwi' na anu nu bau mompo 'untung; ia mokalaja sampe tonga' pahu.

¹⁹ Banang binaunyo; ka'hude tinonunnyomo.

²⁰ Ia madi' matongot hi mian anu kakulangan; ia manonong hi mian anu momoita tulung.

²¹ Ia madi' bata-bata de tempo' nu bakin tokamo mae; kalana baju de opusok mapanas na butong sinadiamo hi aha salaigan.

²² Posi ia nanontonun hude binau ampas; pakeannyo hude lenan mingkamumu' anu ma'ima' hondo na kina'ut.

²³ Langkai'nyo mian anu talasanggo; sala' samian anu aijo' hi aha polaya' nu kota'.

²⁴ Ia mongka'ut pakean ka' mule' pombutu'; lantas pinibaluknyomo i dagang.

²⁵ Ia oholomati ka' o'angga'i; ka' madi'bata-bata imihinyo mae.

²⁶ Madi' kopesa-pesa na ia motatae; potataenyo anu ko alati'nyo ma'ima'.

²⁷ Ia makeke hondo na mokalaja; ka' mompalahatikan ulusan nu aha salaigan.

²⁸ Ia nu holomati nu to ana-anaknyo; ka' nu puji' nu langkai'nyo.

²⁹ “Manjoo' na boune anu manonong” na koonyo nu langkai'nyo; “panyo beleyum na lebe ma'ima' nu lingkudui na aha iwi-iwi'.”

³⁰ Sahayanyo nu mian anu handa madi' timbali opalesaya, ka' kohandanyo madi' sampe toka sidu-sidutu'; panyo boune anu montuluti Tumpu pantas na opuji'.

³¹ Balosi na kanonongannyo iwi-iwi'; kalana ia boune anu pantas oholomati iyaya mae! 1