AMSAL 29 - KITAB NU TUMPU ALLA LELE MA'IMAI'

¹ Ihe na ola saja' monggagakon de opokinde'i, toka na tempo'nyo timbali hansun ka' madi' daagi' opoko ala opokopiani.

² De bisuannyo mian anu adin na mompalentah, mian da'isan bilahimo. Panyo de bisuannyo mian anu ma'idek na kinyonyoanyo na balakuasa, mian da'isan monta'up kasansala'an.

³ Ihe na mongka'ima'i kapandean bapikin, momposanang kinyonyoa nu tuumanyo. Ihe na mosangalu tiba anu lewa' masala' ola mombeasakon doinyo.

⁴ De anu balakuasa mompalahatikan ka'adilan, lipu'nyo saidi timbali mahoson. Panyo de ia ola mompalalui doi, lipu'nyo saidi'mae timbali hansun.

⁵ Ihe na mompuji sangko sangalunyo, nompokonamo so'o hi butongnyo.

⁶ Mian anu ma'idek na kinyonyoanyo nuposikonamo nu so'onyo, mian anu madi'tageo' na kinyonyoanyo, mongoa'i sanang ka' bilahi nakan tumuu'onnyo.

⁷ Mian anu manonong monsumbu' haknyo, nu mian anu madi' moko ala mombau apa-apaa, panyo mian anu ma'idek na kinyonyoanyo madi' monsumbu'.

⁸ Mian anu ola saja' mongalu monsaduakon kahengge'an ikota', panyo mian anu pande mompo'aman ka'ada'an.

⁹ De ko mian anu pande ka' mian anu ponga'na mahampalakala mian anu ponga' aijo' ola mangamu' ka' kumojo sahingga monsaduakon kahengge'an.

¹⁰ Mian anu madi'tageo' na kinyonyoanyo nuka'ideki nu mian anu ka'oho mompatei, panyo nusangaja'i nu mian anu manonong.

¹¹ Mian anu ponga', de pusamo madi' nu pohowini, panyo mian anu pande sabaan ka' nutahan na pusanyo.

¹² De anu balakuasa palesaya hi lele anu madi' totu'u, pegawenyo iwi-iwi' timbali mo maidek na kinyonyoanyo.

¹³ Samian na anu kasiasi ka' anu mombe'i kasansala'an ko pokakanannyo ua-ua'aha binee'an nu Tumpu mata da montoa jingka nu kantumuu'an.

¹⁴ De i tomundo mongala-alapakon hak nu mian anu moko ala mombau apa-apaa taun-toka sataun ia tataap saja mompalentah.

¹⁵ Pangajalan pokinde' mompotimbali mian da pande. Anak anu saja' obatukakon hi pongka'oho'nyo saidi' mae mongambangi tinanyo.

¹⁶ De mian anu ma'idek na kinyonyoanyo na balakuasa anu mombau anu ma'idek konjojoo'nyomo. Panyo mian anu madi'tageo' na kinyonyoanyo daagi montoa kahansunan nu mian anu ma'idek na kinyonyoanyo.

¹⁷ O'ajan na anak nu beleyum, sahingga ia saidi mae mombee' ka'amanan hi beleyum, ka' timbali momposanang kinyonyoa nu beleyum.

¹⁸ Bansa anu madi' nohumpak pangajalan lengkat mae hi Tumpu, timbali bansa anu saja' mombau kahengge'an. Mohumpak kabilahian kantumuu'an namian anu tulu-tulutan hi atulan nu Tumpu.

¹⁹ Samian na posaihon madi' opoko ala o pogulu' ola obee'i pokinde', Ia mangalati', panyo madi' ko palahatiannyo.

²⁰ Lebe manjoo' na anu oataha'imani hi mian anu ponga', ka'de mule' hi mian anu motatae, madi' pe'e opopikilakon.

²¹ Posaihon anu opopo'ense daagi' pe'e olitau, kabai daagi langkoyang ahennyo timbalimo panggaga.

²² Mian anu malia' pusa monsaduakon manjoo' na mian mahanggaga ka' baladosa'mo.

²³ Mian anu takabun saidi mae madi'mo o'adati mian anu madi' takabun saidi mae o puji'mo.

²⁴ Mian anu mokalaja hingga-hinggat tiba topo buling, alati'nyo mongka'ideki mo posi butongnyo. De ia talang-talangan i pomputusian palakala, ia saidi mae obee'imo hukuman. Panyo de ia ola momohokot, ia nukonamo nu kutuk nu Tumpu Allah.

²⁵ Mabuhuk hi pongka'oho' nu mian, monsaduakon kasusa'an. Palesayamo hi Tumpu, sahingga beleyum madi'mo ko anu mompoposia.

²⁶ Manjoo' na mian molio-lio da okalibosi nu mian anu balakuasa, panyo anu mombee'i ka'adilan ola ahi' samata-mata Tumpu.

²⁷ Mian anu manonong madi' mongka'ima'i mian anu ma'idek na kinyonyoanyo; mian anu ma'idek na kinyonyoanyo mongka'ideki mian anu manonong.