SISIKON NU TO RASUL-RASUL 12 - KITAB NU TUMPU ALLA LELE MA'IMAI'

Kino pintu-pintuangnyomo na monsakisa

¹ I tempo'mo aitu na i Tomundo Herodes lewa'mo nonsansala to jama-jama'at mian Kristen.

² Ia nompalentah i Yakobus, utus i Yohanes opatei nu bajak.

³ Salatan i Herodes nontoa saba' kalakuannyo aijo' momposanang kinyonyoa nu to mia-mian Yahudi, ia nompaka bau mule' anu sumo aijo'; ia nonsai mian mohakop i Petrus suele. Han aijo' jinadi tempo'nyo Sinaa Daka' Roti Anu Madi' Mompake Ragi.

⁴ Pinoko hakop, i Petrus pinosoopmo i uno nu talungku'. Opat na tompukan nu suludadu pinalentahkon da monjagai i Petrus kiijo' – toto santompuk miannyo aha opat na suludadu. Ilapas na lamean nu Paskah, atina'je ka' i Herodes nomputusi i Petrus i ahop nu mian da'isan.

⁵ Jadi i Petrus pinosoop i uno nu talungku'; panyo to jama-jama'at ola ahi' saja' nondo'akon i Petrus totu-totu'u hi Tumpu.

I Petrus sinabatakonmo i talungku'

⁶ Pihi-pihi ma'isa pe'e i Herodes nompopangadap i Petrus hi mian da'isan, i Petrus male-male' pinungu nu ohua' na pompungu i totonga' nu ohua' na suludadu anu monjagai. I tumban nu talungku' to sulu-suludadu sangga'at suele hau-haunyo monjagai talungku'.

⁷ Monti-montiik malaikat nu Tumpu tinuminjo i kiijo' ka' kino sahaya nonjingkai uno nu kaman nu talungku' aijo'. Malaikat aijo' noliko i Petrus sampe ia nobula. Lantas malaikat aijo' notatae, “He, dongan pobula!” Tempo'nyo aijo' mule' nanabu'mo na lante' besak i lima i Petrus.

⁸ Lapas aijo', malaikat aijo' notataemo, “Pusokmo na baju'um ka' putimo na sapatuum.” Saba' i Petrus nompusok baju'nyo ka' nomputi sapatunyo. Lapas aitu malaikat aijo' notatae mule', “Pusokmo na juba'um ka' batukimo mae na aku.”

⁹ Sahingga i Petrus nombatukimo malaikat aijo' nosabat lengkat i talungku'. Panyo i Petrus madi' monsumbu' apaa na anu hau-haunyo binaumo nu malaikat aijo' memang hahan anu totu-totu'u jinadimo. I Petrus nonsangka aijo' ola han anu kinohiabakon.

¹⁰ Tempo'nyo aha noliu-liumo tampat ponjagaian i pasasubahan ka' i ko ohua'nyo, aha tinokamo i pontumban besak, anu mokiijo' i kota. Pontumban aijo' mosi tontuhea', lantas aha nosabat ka' i lumajang montulu i sa'angu' na jalan soki. Monti-montiik malaikat aijo' nompala'imo i Petrus.

¹¹ Ilapas aitu, atina'je ka' i Petrus tinolo sukap i apaa na anu jinadimo hi ia, lantas ia notatae, “Uuka aiya sinumbu'kumo taalu' i Tumpu totu-totu'u nonsaimo mae malaikat-Nyo da molapasakon aku i kuasa i Herodes ka' lengkat i sangga-sangga'atan anu nubau nu bansa Yahudi hi belengku.”

¹² Noko sinsumbu' apaa na anu jinadimo aijo', i Petrus nambamo nokiijo' i laigan i Maria, tina i Yohanes anu o sanggohi mule' i Markus. I kiijo' da'isan na mian binala gombu ka' hau-haunyo balado'a.

¹³ I Petrus nongkutetek pontumban nu sabatan, lantas samian na posaihon boune sanggonyo i Rode, tinoka nontuhea'akon pontumban.

¹⁴ Balo sinumbu'nyo na lewo' i Petrus. Kalana lame'nyo ia lia-lia' po'ule' ninsoop madi' nontuhea'akon pontumban, lantas nompoto'i hi to mia-mian i kiijo', tukoonyo i Petrus daagi' kiijo' i sambiha'nyo.

¹⁵ “Beleyum ulawon!” na koonyo nu aha. Panyo i Rode monggagakon tukoonyo aijo' totu-totu'u i Petrus. Sahingga aha notatae, “Itina' malaikatnyo!”

¹⁶ Hau-haunyo aitu, i Petrus saja'mo nongkutetek pontumban. Sahingga salatan aha nontuhea'akonmo pontumban ka' nontoa i Petrus, aha binangang hondo.

¹⁷ I Petrus nombee'i tanda nu limanyo da aha momohokot, lapas aijo' ia nonsisikakonmo mosia na Tumpu nomboa ia nosabat lengkat i talungku'. Lantas ia notatae, “Poto'iakonmo na aiya hi Yakobus ka' suele hi to utu-utus sangga'at.” Lapas aitu i Petrus nompala'imo tampat aijo' ka' nokiijo'mo i tampat sangga'at.

¹⁸ Dodododopnyo subu-subu tinimbalimo na kahengge'an aijo' hi suludadu anu nonjagai. Aha biningung hondo hi apaa na anu jinadimo hi Petrus.

¹⁹ Lantas i Herodes nonsai mian molio i Petrus, panyo aha madi' nompahakabot ia. Jadi i Herodes nompalentahkonmo da aha anu nonjagai aijo' lewa' o pokilawa ka' o pateimo. Lapas aitu i Herodes namba lengkat i Yudea ka' jinojoong tino pia-pia manga i Kaisarea.

Kinapatean i Herodes

²⁰ I Herodes notambuha'mo hondo hi to mia-mian nu Tirus ka' Sidon. Mokonyo aijo' aha nohingga-hinggat tinoka nangadap hi ia. Momonanyo aha nonsale'i Blastus, anu mongkapalai laigan daka' i Herodes, da ia nontinjohi aha. Lapas aitu aha nambamo nangadap hi Herodes, lantas nompoita baladame, kalana lipu' nu aha montaha'imani kaanon lengkat hi lipu' i Herodes.

²¹ Daagi' kino sansinaan anu noko tantukanmo, i Herodes nompusokmo pakean nu kadaka'annyo lantas sinumuhangmo i kulusi nu kalaja'an ka' mulai binapidato i ahop nu layat.

²² Layat anu hau-haunyo mohongo aijo' notatae daka-daka', “Aiyamo na potatae nu tominuat, misa' potatae nu mian!”

²³ I tempo'mo aitu na malaikat nu Tumpu nohapa' i Herodes, kalana ia madi' mongadati Tumpu. I Herodes kinaan nu ias lantas i mate.

²⁴ Sahingga potatae nu Tumpu nompaka togilele jo'o-jo'on ka' nompaka padodomo.

²⁵ Sinailapas i Barnabas ka' i Saulus nompomingkot kalaja nu aha, aha ninsusule'mo lengkat mae i Yerusalem nomboa i Yohanes Markus nohingga-hinggat tiba aha.