2 YOHANES 1 - KITAB NU TUMPU ALLA LELE MA'IMAI'

¹ Toka hi Pontina'on anu pinile'anmo nu Tumpu, ka' toka hi to ana-anak nu Pontina'on. Sulat aiya lengkat mae hi belengku, polaya' nu jama'at anu totu-totu'u mongkanonongi komiu. Misa' ola aku, panyo iwi-iwi' na mian anu nonsumbu'mo Tumpu anu totu'u, suele ahi' mongkanonongi komiu.

² Kalana Tumpu utumo i uno nu kinyonyoanto, ka' saja'mo mombaya'i kita sampe toka sidu-sidutu'.

³ O'amalakon da kita nu bee'i mae balakat, ka' ka'ima'an nu Tumpu Tuuma, ka' i Yesus Kristus Anak nu Tuuma aijo'. O'amalakon da iwi-iwi' aijo' saja' daagi' aiya hi kita ka' mule' kinyonyoanto hodi' ka' ko kalibosan.

Kahondoan ka' kalibosan

⁴ Aku lame' hondo na nonsumbu' taalu' daagi' ko to ana-anak nu kita Pontina'on anu tumuu' mombatuki pangajalan nu Tumpu, susumo anu pinalentahkonmo nu Tumpu Tuuma hi kita.

⁵ Kalana aijo', Pontina'on, ku poita sabole-bole da kita iwi-iwi' mompaha kali-kalibosi. Anu ku poto'i aiya misa' sa'angu' na palentah anu sala'je; palentah aiya binee'mo hi kita salatanmo pe'e kita nontampu'unimo pinalesaya.

⁶ Mongkalibosi alati'nyo tumuu' mombatuki iwi-iwi' palentah nu Tumpu. Ka' palentah anu i hongomo miu salatanmo pe'e momonanyo, aijo'mo komiu tionyo ahi' tumuu' mompaha kali-kalibosi samian ka' samian.

⁷ Manjoo'mo na anu baleko' nololomo i songko-songko na dunia. Ahamo atina' na to mia-mian anu madi' mompalesaya i Yesus Kristus anu tinokamo i dunia sumo samian na mian. Mian anu sumo aijo' atina'mo na anu mongakali ka' Sampo Bali' i Kristus.

⁸ Mokonyo aijo' obala'ingati, boli sampe talabakas na komiu hi apaa na anu ingusahakonmo mami bau bagi miu. Bala usaha da komiu mohumpakje tamboonyo iwi-iwi' lengkat mae hi Tumpu.

⁹ Mian anu madi' montoongi pangajalan i Kristus, ka' ola mule' monggeo-geoakon apaa na ingajanakonmo i Kristus, mian aijo' madi' ko Tumpunyo. Mian anu tataap i uno nu pangajalan i Kristus, alati'nyo daagi'mo ko Tumpu Tuuma ka' mule' Anak.

¹⁰ Kalana aijo' de daagi' ko mian toka ka' mompolele hi belemiu pangajalan anu madi' ingajanakon i Kristus, boli montalima mian aijo' i laigan miu kabai monsalan do'ai ia.

¹¹ Kalana mian anu monsalan do'ai mian anu sumo aijo', singkonamo sumo mian aijo' mombau anu ma'idek.

Pontudui sisik

¹² Manjoo' hondo na anu palalu ku poto'i hi belemiu, panyo ku tutugi lebe ma'ima' boli ola mompakatu sulat. Bisa-bisa' aku moko ala mamba molenga komiu ka' mompaha ko basi-basisikje tiba komiu, da kinyonyoanto totu-totu'u lame'.

¹³ To ana-anak nu utus boune nu kita Pontina'on anu suele pinile'anmo nu Tumpu nompakatu mae salan do'a toka hi kita Pontina'on.