2 TOMU-TOMUNDO' 22 - KITAB NU TUMPU ALLA LELE MA'IMAI'

I Yosia tomundo' nu Yehuda

¹ Umun i Yosia ualu'mo na taun tempo'nyo ia tinimbalimo tomundo' i Yehuda, ka' ia nompalentahmo i Yerusalem 31 na taun na kinopinnyo. Sanggo nu tinanyo i Yedida anak i Adaya, mian nu Bozkat.

² I Yosia nombaumo hahan anu momposanang kinyonyoa nu Tumpu. Ia nontihomo kalakuan i Tomundo' Daud mompolee'nyo ka' tinulutannyomo totu-totu'u na atulan nu Tumpu Allah.

Kitab atulan nu Tumpu Po'ule'mo i humpak

^3-4 I Tomundo' Yosia ko gulu tulisnyo samian sanggonyo i Safan anak i Azalya, makumpu i Mesulam. I taun ko sampulu'nyo ka' ualu' na taun na i Tomundo' Yosia nompalentah, i tomundo' nombee'imo palentah hi gulu tulisnyo sumo uuka. “Lako' hi Imam Hilkia Imam Daka' kiijo' i Laigan nu Tumpu, ka' poto'i hi ia da nu poto'i mae pa' sangkukamo na konjoo'nyo nu Doi anu lewa'mo i limu'an nu to ima-imam anu monjaga i sabatan pinso-pinsoopan i Laigan nu Tumpu.

⁵ Pokau na ia da nu bee'mo na doi aijo' hi to mia-mian anu monjagai kalaja mompokopiani Laigan nu Tumpu. Tionyo ahi' doi aijo' ogunakon nu aha bau pombayan tambonyo nu mian anu mokalaja.

⁶ To mia-mian tukang kau', anu mongkapalai kalaja aijo', ka' anu montukangi batu, ka' mule' anu bau pongoli kau' ka' batu anu opalalui.

⁷ To mia-mian anu monjagai kalaja aijo' hodi' hondo na kinyonyoa nu aha, jadi madi'mo palalu opoita hi aha na lapulan pa' sangkuka na doi anu sinabatakonmo nu aha.”

⁸ Jadi palentah i tomundo' pinoto'imo i Safan hi Hilkia, lantas i Hilkia nonsisikmo hi Safan tukoonyo ia nohumpakmo kitab atulan nu Tumpu i Laigan nu Tumpu. I Hilkia nombee'mo kitab aijo' hi Safan ka' binasa'mo i Safan.

⁹ Noko basa' ia ninsusule'mo hi tomundo' ka' nompoto'imo doi anu pino'una' i Laigan nu Tumpu aijo' ingalamo ka' binee'mo hi to posa-posaihon i tomundo', hi to mia-mian anu monjagai kalaja mompokopiani Laigan nu Tumpu.

¹⁰ Lapas aijo' pinoto'imo i Safan, “I Hilkia nombee'mo mae kitab aiya hi belengku.” Lantas kitab aijo' binasa'mo i Safan da nu hongo i tomundo'.

¹¹ Nohongo onyi' nu kitab aijo' binea-beakmo i tomundo' na baju'nyo kalana sinusa'mo hondo na kinyonyoanyo.

¹² Lantas pinalentahmo i tomundo' sumo uuka na koonyo hi Imam Hilkia, i Ahikam anak i Safan, i Akhbor anak i Mikha, i Safan gulu tulis nu negara ka' i Asaya anu saja' monsangalui i tomundo':

¹³ “Lako' mamba hi Tumpu ka' pokilawa mae mosia na isi nu kitab aiya mongkona aku ka' mongkona iwi-iwi' na mian da'isan nu Yehuda. Tumpu notambuha'mo hi kita kalana mompolee'to madi'mo nompojalan palentah haha aijo' anu tinulismo i unonyo.”

¹⁴ Sahingga nambamo na i Hilkia, i Ahikam, tiba i Akhbor, i Safan tiba i Asaya hi samian na boune sanggonyo i Hulda mompoita pikilan pa' mosia na koonyo. Ia nabi jojoong i kampung anu sala'je binau i kota' Yerusalem. Sanggo nu langkai'nyo i Salum anak i Tikwa, makumpu i Harhas; ia mian anu saja' mongkalesang baju' anu opusok de monsombahmo Tumpu, i Laigan nu Tumpu. Salatan i Hulda nohongomo apaa na anu sinisikmo nu aha,

¹⁵ ia nonsaimo aha da po'ule' minsusule' hi tomundo' ka' toka mompoto'i

¹⁶ potatae nu Tumpu sumo uuka: “Ku hukummo na Yerusalem ka' iwi-iwi' na mian anu i kiijo' susumo anu tinulismo i kitab anu sala-sala'je binasa' i tomundo'.

¹⁷ Aha nohikumo Aku ka' nonsombahkonmo koloban hi pilogot sangga'at. Iwi-iwi' na anu binaumo nu aha nonsungkelekmo kinyonyoang-Ku sahingga Aku pinusamo. Aku nontambuha'imo Yerusalem, ka' tanbuha'ku aiya madi'mo ku poko sabanakon.

¹⁸ Panyo mongkona i Tomundo' Yosia sumo uuka na potuunon-Ku, Tumpu Allah nu Israel, 'Salatan i hongomo nu beleyum na onyi' nu kitab aiya,

¹⁹ beleyum nompele-pele'mo ka' nangaku sinala'mo hi beleng-Ku. Pinopobuhuk-Kumo na Yerusalem na hukuman ka' mian anu jojoong i kiijo'. Ku potimbalimo na kota' aijo' sa'angu' na kota' anu okabuhuk hondo de otoa, ka' sanggo Yerusalem ku potimbalimo sanggo anu kinutukan. Panyo salatan beleyum nohongomo anu binau pinompobuhuku aijo', beleyum i humangmo ka' nombea-beakmo baju' salaku tanda sinusa'mo hondo na kinyonyoa nu beleyum. I hongong-Kumo na do'a nu beleyum,

²⁰ kalana aitu hukuman anu o pokona hi Yerusalem madi'mo Ku totu'uakon de beleyum daagi' tutuu'. Beleyum silaka ma'i-ma'ima'.’ ” Sahingga ninsusule'mo hi tomundo' na mian haha aijo' anu sinainyo mae ka' pinoto'inyomo na potunon aijo'.