2 TOMU-TOMUNDO' 20 - KITAB NU TUMPU ALLA LELE MA'IMAI'

I Tomundo' Hizkia nasakitmo ka' pino'alinmo

¹ Tempo'mo aitu na i Tomundo' Hizkia kinonamo nu bisun anu daka' hondo sahingga me sangkiding silakamo. I Nabi Yesaya anak i Amos nambamo nontoa ia ka' pinoto'inyomo, “Pinotuun mae nu Tumpu da opokopiani na belento Tomundo' mongatun iwi-iwi'na ulusan kalana belento Tomundo' madi'mo ma'alin. Madi'mo pin na belento Tomundo' silakamo.”

² I Hizkia nobalikmo no ahop nokiijo' i mesen lantas ia binalado'amo.

³ “O Tumpu, inau'akon mae na aku aiya anu nokalajamo ma'i-ma'ima' hi belento, ka' aku madi' lewa' tinageo' na kinyonyoa.”

⁴ I Hizkia pinala'ianmo i Yesaya, panyo ma'isa pe'e ia nosabat nompala'i popasan laigan nu tomundo' anu aijo' i totonga'nyo, sinaimo nu Tumpu na ia

⁵ da po'ule' minsusule' hi Hizkia, tomundo' nu mian anu pinalesayamo hi Tumpu ka' mompoto'i potunonku sumo uuka, “Aku Tumpu, Tumpu Allah anu nusombah i Daud mompolee' nu beleyum nohongomo do'a nu beleyum ka' nontoamo lolu' nu beleyum. Ku po'alinmo na beleyum hipuan beleyum mambamo i laigan-Ku.

⁶ Ku tuangimo na umun nu beleyum daagi' 15 na taun. Beleyum ka' kota' Yerusalem ku pobebasmo da madi'mo nu palentah i tomundo' Asyur. Kota aiya Ku jagaimo da Aku o'angga'i ka' kalana Aku saja' sabole-bole monginau' apaa na anu jinanji'-Kumo hi Daud posaihon-Ku.”

⁷ Lantas pinokaumo i Yesaya na mian nompija-pijak bua' nu ara da mahutak, lantas pinokelanyomo i bisun aijo' hi tomundo' da ma'alin.

⁸ I Tomundo' Hizkia nompokilawamo, “Apaa na bau pontandaian Tumpu mompaalin aku, sahingga hipuan aku moko alamo mamba i Laigan nu Tumpu?”

⁹ Tinaaman i Yesaya, “Tumpu mombee'ije bau pontandaian hi belento Tomundo' da osumbu' taalu' Ia mongganapi ahi' apaa na anu jinanji'-Nyomo. Jadi iya na oka'ima'i nu belento Tomundo'; lolung nu batu nu sinaa na pontoan jam, anu binaumo i Tomundo' Ahas midedensu' mokiijo' 10 na gohitnyo kabai tolosule' mae mo'uuka 10 na gohitnyo?”

¹⁰ I Hizkian notataemo, “De mombau lolung aijo' mideden su' mokiijo' 10 na gohitnyo na dengke ahi'. Kalana aijo' baumo, tolo ule' mo'uuka mae 10 na gohitnyo.”

¹¹ I Yesaya binalado'amo hi Tumpu, lantas binaumo nu Tumpu na lolung aijo' tolosule' mo'uuka mae 10 na gohitnyo i lolung nu batu nu sinaa anu pontoaan jam.

To mia-mian anu lengkat mae i Babel

¹² Tempo'mo aitu na i tomundo' Babel, aijo'mo i Merodakh-Baladan anak i Baldan nohongomo lele i Tomundo' Hizkia sala'je na'alin i sakitnyo. Sahingga ia nonsaimo mian da momboa sulatnyo ka' palasen obee' hi Hizkia.

¹³ I Hizkia nolabotmo ma'i-ma'ima' mian haha aijo' ka' pinotoanyo na kakaya'annyo aijo'mo mosoni' ka' salaka, to lampa-lampa, ka' minya-minya' ka' iwi-iwi' na talakonan nu suludadunyo. Iwi-iwi' apaa na anu kiijo' i laigan nu tomundo' ka' anu i songko-songko na kalaja'annyo pinaha potoanyomo hi aha madi' ko anu madi' pinotoanyo.

¹⁴ Lapas aijo' i Nabi Yesaya nangadapmo hi Tomundo' Hizkia ka' pinokilawanyo, “Lengkat mae iya na mian haha aitu? Mosia na koonyo nu aha?” Tinaaman i Hizkia, “Aha lengkat mae i Babel, lipu' anu majo'on hondo.”

¹⁵ “Apaa na kahanda' tinoa nu aha i laigan nu tomundo',” na koonyo i Yesaya mule'. “Iwi-iwi'!” na koonyo i Hizkia. “Madi' ko halata' i uno nu laigan nu tomundo' na madi' pinotoangku hi aha.”

¹⁶ Lantas notataemo na i Yesaya, hi “Tomundo' tokaje mae

¹⁷ na tempo'nyo iwi-iwi' na kakaya'an anu atina' i laigan nu tomundo' kajojoongan nu beleyum, ka' anu i humpak nu mompolee' nu beleyum sampe sinaa aiya, saidi' mae oboamo i Babel. Madi' ko anu tontuha'.

¹⁸ To maku-makumpu nu beleyum daagi' ko anu o'ala ka' o hangkat timbali pangkat mokalaja i laigan nu tomundo' mombau apaa na anu nu palentahkon i tomundo' Babel.”

¹⁹ Tinaaman i Tomundo' Hizkia, “Ma'ima' mule' na potuunon nu Tumpu anu pinotokamo nu beleyum hi belengku,” Tinaamannyo sumo aijo', kalana tinutugannyo: “Asan kalaja'anku de daagi' aku tutuu' sabole-bole saja' ma'i-ma'ima' mae madi' ko anu mompoposia ka' saja' bilahi.”

Pupuusnyomo na i Hizkia nompalentah

²⁰ Sisikon sangga'at mongkona i Tomundo' Hizkia ka' mongkona hasin nu kabaaniannyo, ka mosia na ia nombau kolam ka' jalan nu uee da mo'ili mamba i kota', iwi-iwi' tinulismo i kitab Sisikon nu to Tomu-tomundo' Yehuda.

²¹ I Hizkia sinilakamo lantas i Manasye anaknyo na tinimbali tomundo' nombolosakon ia.