2 TAWARIKH 5 - KITAB NU TUMPU ALLA LELE MA'IMAI'

¹ Salatan ilapasmo na i Tomundo Salomo nombau Laigan nu Tumpu aijo', pino'una'nyomo iwi-iwi na salaka, mosni', i gudang nu laigan aijo' ka' talakonan tiba pakakas sangga'at anu sinombahkonmo i Daud, tuumanyo hi Tumpu.

Peti' Palajanjian nu Tumpu binoamo i Laigan nu Tumpu

² Lapas aijo' i Tomundo Salomo nompalentahmo iwi-iwi' na to pola-polaya' nu aha tulunan nu bansa ka' aha sa'anakan mae anu minsoop bansa Israel da sihuk mae i Yerusalem, da olalinmo na Peti' Palajanjian nu Tumpu lengkat mae i Sion oboa mamba i Laigan nu Tumpu.

³ Sahingga tinokamo na aha iwi-iwi' i Sinaa nu Lamean Montahop Hon nu Kau'.

⁴ Salatan iwi-iwi' na to pola-polaya' haha aijo' sinihukmo, to mia-mian nu Lewi nohangkatmo Peti' Palajanjian aijo'

⁵ lantas binoamo nu aha i Laigan nu Tumpu. Kemah nu Tumpu tiba iwi-iwi' na talakonannyo suele i lalinmo binao i Laigan nu Tumpu nu to ima-iman ka' mian nu aha Lewi.

⁶ I Tomundo Salomo ka' mian da'isan iwi-iwi' sinihukmo i ahop nu Peti' Palajanjian aijo' lantas nonsombahkonmo hi Tumpu domba ka' sapi' anu madi'mo pinoko bilang na konjoo'nyo.

⁷ Lapas aijo' to ima-imam nomposoopmo Peti' Palajanjian aijo' i uno nu Laigan nu Tumpu ka' pinokokonyomo i patu nu patong malaikat i uno nu Salipi' anu talalo hondo Susi'.

⁸ Polipik nu patong haha aijo' na timboka mongkukubi Peti' aijo' ka' kau' anu bau polembanan.

⁹ Kau' anu bau polembanan aijo' mantan hondo, sahingga puusnyo poti-potingkolong kantoan mokiijo' lengkat i ahop nu Salipi' anu Talalo Hondo Susi', panyo madi' kantoan i sambiha'nyo. (Sampe sinaa uuka aiya kau' haha aijo' daagi' kiijo').

¹⁰ I uno nu Peti' Palajanjian aijo' madi' ko anu sangga'at na ingisi, ola ahi' samata-mata kobakan nu batu ohua'. Batu ohua' aijo' pinosoopmo i Musa tempo'nyo daagi' kiijo' mae i Bungkutnyo nu Sinai, salatan Tumpu binalajanji'mo tiba bansa Israel tempo'nyo aha nompala'imo mae Mesir nambamo i Lipu' Kana'an.

Tumpu Tinalasanggomo

^11-14 Iwi-iwi' na imam anu daagi' i kiijo' lengkat iyaya mae na tampat nosadiamo da mongala bahagian apaa na anu obau sinaa aitu. Iwi-iwi' na anu lewa' manyanyi ka' mahaik musik, aha mae tulunan nu bansa Lewi, aijo'mo i Asaf, i Heman, i Yedutun ka' iwi-iwi' na aha anu sa'anakan mae nompusokmo baju' hude lenan. Mian nu Lewi haha aijo' tinuminjo sasu kabete'an mezbah ka' nontoongi simbal ka' kasapi. Ka' sangalu mule' nu aha 120 na to ima-imam anu mompuuhi tolompet. Nyanyian nu aha to panya-panyanyi pinohinggat-hinggatakonmo tiba musik tolompet, simbal ka' musik sangga'at. Sumo uuka na onyi'nyo nu nyanyian nu aha mompuji' Tumpu: “O puji' na Tumpu, kalana Ia manonong. Kalibosannyo sampe toka sidu-sidutu'.” Salatan to ima-imam nosabatmo lengkat mae i Laigan nu Tumpu aijo', monti-montiik Laigan aijo' kahomo jingka tandanyo tinokamo na Tumpu, sahingga aha madi'mo noko ala nolausakon apaa na anu binaumo nu aha, aijo'mo monsombah Tumpu.