2 TAWARIKH 35 - KITAB NU TUMPU ALLA LELE MA'IMAI'

I Yosia nolame'akonmo Paskah

¹ Lapas aijo' i Yosia nolame'akonmo Paskah kiijo' i Yerusalem bau salaku pongadati Tumpu. Domba anu okolot i lamean aijo' kinolotmo i tanggan 14 bitu'on anu momonanyo.

² I Yosia nombagi-bagimo kalaja hi to ima-imam anu tionyo ahi' nukalaja nu aha i Laigan nu Tumpu, ka' pinoto'inyo da nukalaja nu aha ma'i-ma'ima'.

³ To mia-mian nu Lewi anu binee'anmo kalaja samata-mata mombau anu nu palentahkon nu Tumpu, ka' anu tinimbalimo to gulu-gulu' nu aha Israel nohumpak palentah sumo uuka hi Yosia, “Po'una' na Peti' palajanjian nu Tumpu anu susi' aijo' i Laigan nu Tumpu anu binaumo i Tomundo Salomo anak i Daud anu momo'ane. Madi'mo daagi' timbali lewa' olali-lalin nu belemiu. Obau apaa na anu nu palentahkon nu Tumpu Allah nu belemiu ka' bansa Israel mian anu pinalesayamo hi Ia.

⁴ Posadiamo na gombuan nu belemiu i Laigan nu Tumpu ka' toongi na kalaja anu binagi-bagimo anu tinantukanmo hi belemiu i Tomundo Daud ka' i Tomundo Salomo anaknyo momo'ane.

⁵ O'atun ima-ima' na gombuan nu belemiu aijo' sahingga daagi' saja' ko anu atina' mae hi belemiu na montulungi, toto sa'angu' na gombuan nu mian Israel i Laigan nu Tumpu.

⁶ Belemiu na tionyo mongkolot domba anu osombahkon i lamean nu Paskah. Mokonyo aitu posadia na butong miu da timbali monsombah Tumpu, ka' posadiamo suele na iwi-iwi na koloban anu osombahkon hi Tumpu, da tiba jalan anu sumo aijo' to mia-mian nu Israel sangga'at timbali moko ala mombau apaa na anu pinalentahkonmo nu Tumpu hi Musa.”

⁷ Da to mia-mian anu toka mae i lamean Paskah aijo' timbali moko ala monsombahkon koloban Paskah, i Tomundo Yosia nombee'mo posi potu'onnyo 30.000 na domba, anak nu domba ka' mee' bata'nyo, ka' mule' 3.000 na sapi' lakinyo.

⁸ To mia-mian anu ko pangkatnyo mokalaja hi Yosia suele nombee'mo bau pontulungi to ima-imam ka' aha mian nu Lewi anu aijo' hi aha mian da'isan. To mia-mian anu ko pangkatnyo anu binee'an kalaja i Laigan nu Tumpu, aijo'mo i Imam Daka' Hilkia, tiba i Zakharia ka' i Yehiel, aha toto-totolu' nombee'mo hi to ima-imam 2.600 anak nu domba ka' mee' anu daagi' bata'nyo ka' 300 na sapi' lakinyo da osombahkon i lamean aijo'.

⁹ To pola-polaya' nu aha mian Lewi aijo'mo: i Konanya, i Semaya tiba i Netaneel utusnyo, i Hasabya, i Yeiel, tiba i Yozabad, nombe'mo hi aha mian nu Lewi 5.000 na anak nu domba ka' mee' bata' nyo ka' mule' 500 na sapi' lakinyo anu osombahkon i lamean aijo'.

¹⁰ Salatan sinadiamo iwi-iwi' na anu opake i lamean Paskah aijo', to ima-imam ka' gombuan haha aijo' nu aha mian nu Lewi nongalamo tampat nuaha toto sanggombu susumo anu pinalentahkonmo i tomundo.

¹¹ Lantas kinolotmo nu aha na binatang anu osombahkon i lamean Paskah aijo'; mian nu aha Lewi na mongkiliti ka' to ima-imam na mompipi'akon baso' nu binatang aijo' i mezbah.

¹² Batu-batu aha sangauwan anu tinoka i kiijo' nohumpak sa'angu' na binatang anu osombahkon salaku koloban anu opotunu. Tiba jalan anu sumo aijo' aha timbalimo noko ala nonsombahkon koloban ka' nombatukimo atulan anu tuli-tulis i kitab atulan i Musa.

¹³ Lantas mian nu aha Lewi haha aijo' nontapa'imo koloban anu sinombahkon i Paskah, susumo koonyo nu atulan, ka' nongkulua'imo koloban haha aijo' anu pinosi po'iwi'mo i pamutu', i kuhon tano' ka' kuhon besak, lapas aijo' antoknyo sinukotanmo nu aha da sampamo obagi-bagiakon hi to mia-mian.

¹⁴ Lapas aijo' aha mian nu Lewi nombagi-bagije anu bahagianmo nu aha ka' anu nu to ima-imam lee' mae i Harun. Kalana sangkutnyo pinihi na to ima-imam haha aijo' nokalaja nonsombahkon binatang salaku koloban anu opotunu, ka' nompapui lompo'nyo nu koloban haha aijo'.

¹⁵ To mia-mian anu pande na mahaik musik aha sa'anakan mae i Asaf anu minsoop tulunan mae nu bansa Lewi, jojoong i tampat anu tinantukanmo i Tomundo Daud hi aha. Aiya na sanggo nu aha: i Asaf, i Heman tiba i Yedutun ka' samian na nabi anu mokalaja hi tomundo. To mia-mian anu monjaga iwi-iwi' sabatan daka' madi' timbali mompala'i ponjaga'an nu aha, kalana aha timbali molame'akon Paskah i tampat ponjaga'an nu aha nu boaije nu aha mian nu Lewi sangga'at nabagi nu aha.

¹⁶ I sinaa aitu iwi-iwi' na anu nubau nu aha nombatuki apaa na anu nu palentahkon i tomundo Yosia bau polame'akon Paskah, tibamo suele apa-apaa na anu osombahkon i mezbah.

¹⁷ Pitunsinaa na kopinnyo na mian da'isan nu aha Israel jojoong i kiijo' molame'akon Paskah ka' lamean nu Roti anu Madi' ko Raginyo.

¹⁸ Paskah anu sumo aijo' madi'mo toho' po'ule' i lame'akon salatanmo pe'e i Nabi Semuel. To Tomu-tomundo anu momonamo nompalentah anu ma'isa pe'e kino i Yosia nompalentah salaku tomundo, ma'isa toho' nolame'akon Paskah susumo anu i lame'akonmo,

¹⁹ i taun kosampulu'nyomo ka' ualu' na i Yosia nompalentah aijo', anu ilame'akonmo i tomundo tiba to ima-imam, aha mian nu Lewi, mian nu aha Yehuda ka' Israel, tiba mian anu jojoong i Yerusalem.

I Yosia madi'mo nompalentah

²⁰ Salatan pinoko baumo i Tomundo Yosia na iwi-iwi' aijo' salaku bau pongadatinyo Laigan nu Tumpu; i Nekho tomundo nu Mesir nongkapalaimo mae suludadunyo kahanda'mo mahampate kiijo' i Karkemis koko Kaunyo nu Efrat. I Yosia binala'usahamo da boli mae ia toka,

²¹ panyo i Nekho nompotuunmo mae sumo uuka na koonyo toka hi Yosia, “Pahampatean aiya misa' mongkasosoli beleyum, tomundo' nu Yehuda! Aku toka misa' mongewa beleyum, panyo mongewa to sampo-sampo bali'ku ka' Tumpu Allah nompalentahmo mae aku da sampamo obau na palentah aiya. Tumpu Allah na aiya monsangaja'i aku, kalana aijo' boli molawan Ia, dumo saidi' mae Beleyum nu pateimo.”

²² Panyo i Yosia sabole-bole ahi' nongewa, ka' madi'mo nongka'oho' montuluti apaa na anu pinoto'imo nu Tumpu Allah hi Tomundo Nekho. I Yosia nompusokmo sumo mian sangga'at lantas nambamo i tampat pahampatean anu kiijo' i bangka'nyo nu Megido.

²³ Hau-haunyo nahampate aijo' i Tomundo Yosia kinonamo nu pana'. Lantas pinokaunyomo na to posa-posaihonnyo da oboa na ia i sambiha'nyo nu pahampatean kalana daka' hondo na belanyo.

²⁴ Aijo' i kaletanyo i hangkatmo nu aha na ia ka' ilalin nokiijo' i kaleta sangga'at anu daagi' i kiijo' lantas binoamo i Yerusalem. I kiijo' mae ia sinilakamo ka' i lamunmo i pinolamuna to tomu-tomundo. Iwi-iwi' na mian da'isan nu aha Yehuda ka' Yerusalem nohangimo kalana ia sinilakamo.

²⁵ I Nabi Yeremia nontulismo sa'angu' na nyanyian bau pohangi i Tomundo Yosia. Sampe sangkutnyo tempo' uuka aiya nyanyian aijo' daagi' saja' onyanyi nu to panya-panyanyi i Israel, mau mo'ane kabai boune, de mombaumo adat monginau' i Yosia sinilakamo. Nyanyian aijo' pinosa'angu'mo i kitab nu nyanyi-nyanyian anu bau ponyanyiakon mian silaka.

²⁶ Sisikon sangga'at mongkona i Yosia, mosia na ia talalo hondo mongka'ima'i Tumpu, mosia na ia montuluti hondo iwi-iwi' atulan nu Tumpu,

²⁷ de okodo-kodo'i na sisikon, mongkona kantumuu'annyo iwi-iwi' lengkat pe'e momonanyo sampe i pupuusnyomo, aijo' tinulismo i kitab Sisikon nu to Tomu-tomundo Israel ka' Yehuda.