2 TAWARIKH 29 - KITAB NU TUMPU ALLA LELE MA'IMAI'

I Hizkia tomundo' nu Yehuda

¹ I Hizkia tinimbalimo tomundo' nu Yehuda salatan umunnyo 25 mo na taun, ka' ia nompalentahmo i Yerusalem 29 na taun na kinopinnyo. Sanggo nu tinanyo i Abia, anak i Zakharia.

² I Hizkia saja' nombau anu momposanang kinyonyoa nu Tumpu susumo i Tomundo Daud mompolee'nyo.

I Hizkia nomposusi'mo Laigan nu Tumpu

³ I bitu'on anu momonanyo kona i taun mule' anu momonanyo na ia nompalentah, i Hizkia nontuhea'akonmo sabatan iwi-iwi' Laigan nu Tumpu ka' nompalentahmo mian mompokopiani.

⁴ To ima-imam ka' aha mian nu Lewi pinalentahnyomo da toka mae sihuk i popasan sasu kabete'an Laigan nu Tumpu,

⁵ ka' pinoto'inyomo hi aha kiijo' mae. Ia notatae, “Belemiu to mia-mian nu Lewi tionyo ahi' mompatikolomo butong nu belemiu da mombau apaa na anu nukahanda'i nu Tumpu, ka' momposusi' Laigan nu Tumpu. Tumpu Allah nu mompolee' nu belemiu. Iwi-iwi' na anu nompohenyu Laigan nu Tumpu aijo' tionyo o'alini.

⁶ Mompolee' to madi'mo nontuluti Tumpu Allah-nto ka' aha saja'mo nombau anu madi' momposanang kinyonyoa nu Tumpu. Aha madi'mo nontapali Ia, ka' madi'mo nongadati tampat kajojoongan-Nyo.

⁷ Aha nontumbanmo iwi-iwi' sabatan nu Laigan nu Tumpu ka' nompoho'mo sulu'nyo iwi-iwi'. Aha madi'mo nompapu kamangian i Laigan nu Tumpu ka' madi'mo nonsombahkon hi Tumpu Allah koloban anu opotunu anu saja osombahkon nu mian Israel.

⁸ Lantas Tumpu notambuha'mo sahingga nohukumo mian nu Yehuda ka' Yerusalem. Ka' belemiu iwi-iwi' nonsumbu'mo apaa na anu binaumo nu Tumpu aijo' nompotolokengkengmo ka' kinabuhukmo.

⁹ To tu'a-tu'anyonto sinilakamo tempo'nyo nahampate ka' to ana-anak tiba bengkele'to binoamo salaku mian anu i ahop.

¹⁰ Uuka aiya aku kahanda'mo mombau palajanjian tiba Tumpu, Tumpu Allah nu Israel, da Ia madi'mo montambuha'i kita.

¹¹ To ana-anaku, bolimo montanda'i pipiin, kalana belemiumo na pinile'an nu Tumpu da monsombah ka' palesaya hi ia ka' mule' mompapu kamangian ka' mongatun mian da'isan da monsombah Tumpu.”

^12-14 To mia-mian nu Lewi anu tinoka tempo'nyo aitu aijo'mo: Lengkat mae hi aha sa'anakan i Kehab; i Mehat anak i Amasai, tiba i Yo'el anak i Azarya. Lengkat mae hi aha sa'anakan i Merari: i Kis, anak i Abdi, ka' i Azarya anak i Yehaleleel. Lengkat mae hi aha sa'anakan i Gerson: i Yoah anak i Zima, tiba i Eden anak i Yoah. Lengkat mae hi aha sa'anakan i Elisafan: i Simri tiba i Yeiel. Lengkat mae hi aha sa'anakan i Asaf: i Zakharia tiba i Matanyo. Lengkat mae hi aha sa'anakan i Heman: i Yehiel tiba i Simei. Lengkat mae hi aha sa'anakan i Yedutun: i Semaya tiba i Uziel.

^15-16 Lapas aijo' aha nomposihukmo to mia-mian nu Lewi sangga'at, ka' aha iwi-iwi' nomposusi'mo butong nu aha. Lapas aijo', to ima-imam ninsoopmo i Laigan nu Tumpu susumo anu pinalentahkonmo nu tomundo, ka' nomposusi'mo butong susumo koonyo nu atulan nu Tumpu. Iwi-iwi' na anu nahumimi'mo sinabatakonmo i popasan nu Laigan nu Tumpu. Lantas binoamo nu mian Lewi i Bangka'nyo nu Kidron i sambiha'nyo nu kota.

¹⁷ Kalaja aijo' tinampu'unan i tanggan sa'angu' bitu'on anu momona. Tanggan dalapan ilapasmo na aha nomposusi' iwi-iwi' popasan Laigan nu Tumpu tinoka-toka i balai sasu ahopnyo. Salatan ingualun sinaamo aha po'ule' mule' nomposusi' Laigan nu Tumpu aijo' iwi-iwi', sampe kalaja aijo' i ningkot kinakonamo i tanggan 16 bitu'onmo ai-aijo'.

Laigan nu Tumpu po'ule'mo binee' hi Tumpu Allah

¹⁸ Lantas mian nu Lewi haha aijo' nompoto'imo hi Tomundo Hizkia, “Kami noko posusi'mo Laigan nu Tumpu iwi-iwi', tibamo mezbah anu pompotunuan koloban, meja' bau pompotimpasan roti anu osombahkon, ka' iwi-iwi' na pakakasnyo.

¹⁹ Kami mule' po'ule'mo nongala to paka-pakakas anu ingalinakonmo i tomundo Ahas tempo'nyo i madi'mo nontapali Tumpu, tempo'nyo ia daagi' nompalentah. Iwi-iwi' na pakakas haha aijo' po'ule'mo pinake mami samata-mata batu kapalaluan nu Tumpu, ka' uuka aiya pino'una'mo i ahop nu mezbah.”

²⁰ I Tomundo Hizkia madi'mo nontanda'i pipin, ia nolagamo to mia-mian anu talasanggo, lantas aha nambamo hingga-hinggat i Laigan nu Tumpu.

²¹ Da bau koloban pongampuni dosa' hi auwan i tomundo ka' hi mian da'isan nu Yehuda ka da bau pomposusi' Laigan nu Tumpu, aha nomboamo 7 na sapi' lakinyo, 7 na domba lakinyo, 7 na anak nu domba, ka' 7 na mee' lakinyo. I tomundo nompalentahmo to ima-imam lee' mae i Harun da monsombahkon binatang haha aijo' i mezbah salaku koloban anu opotunu.

²² Sapi' haha aijo' pinaha kolotmo lantas baso'nyo dinudu'akonmo nu to ima-imam i mezbah. Lantas sumo aijo' mule' na aha nombau domba anu popitu' aijo' ka' anak nu domba anu popitu' aijo' suele.

²³ Lantas ingalaje nu aha na mee' haha aijo' ka' binoa nu aha hi tomundo ka' hi mian da'isan anu hau-haunyo monsombah Tumpu i kiijo', lantas aha iwi-iwi' nompotiikmo lima nu aha i mee' haha aijo'.

²⁴ Lapas aitu mee' haha aijo' pinahang kolotakonmo nu to ima-imam ka' baso'nyo dinudu'akonmo i mezbah salaku koloban pongampuni dosa' nu mian da'isan iwi-iwi'. Han aijo' binaumo nu aha kalana pinalentahkonmo nu tomundo da obau na koloban anu opotunu ka' koloban pongampuni dosa' hi aha iwi-iwi' mian da'isan nu Israel.

²⁵ Susumo apaa na anu pinoto'imo nu Tumpu hi Daud anu pinotokakon i Nabi Gad, anu mokalaja hi tomundo, ka' anu pinotokakonmo i Nabi Natan, i tomundo nombee'imo kalaja i Laigan nu Tumpu na aha mian nu Lewi mongkuti' kasapi ka' gambuus,

²⁶ susumo anu lewa' pinake i Daud. Ka' mule' suele to ima-imam binee'anmo kalaja mompuhi tolompet.

²⁷ I Hizkia nombee'imo tanda da koloban anu osombahkon otampu'unimo na monsombahkon. Hau-haunyo koloban osombahkon, to mia-mian monyanyimo nyanyian pompuji' Tumpu ka' to mia-mian anu mompahaikakon musik mompuhimo tolompet ka' mule' pakakas musik sangga'at.

^28-29 I Tomundo Hizkia ka' mule' to mia-mian anu i kiijo' tinolodadupumo monsombah Tumpu, hau-haunyo aijo' to mia-mian anu manyanyi sabole-bolemo, manyanyi ka' mule' to mia-mian anu mompahaikakon musik sabole-bolemo nompahaikakon musiknyo sahingga koloban haha aijo' iwi-iwi' singkapmo noangot.

³⁰ I tomundo ka' to mia-mian anu tasanggo nompokaumo da aha mian nu Lewi monyanyiakon pompuji' Tumpu anu tinulis i tomundo Daud ka' i Nabi Asaf. Iwi-iwi' mian i lame'mo hondo na nonyanyi ka' aha tinolodadupumo ka' nonsombahmo Tumpu Allah.

³¹ Ilapas na aijo' pinoto'imo i Hizkia, “Kalana belemiu uuka aiya pinosadiamo samata-mata mokalaja hi Tumpu, sahingga anu osombahkon salaku pontalima kase nu belemiu, belemiu tionyo ahi' momboa mae koloban i Laigan nu Tumpu.” Lantas iwi-iwi' na mian anu i kiijo' nomboamo anu osombahkon haha aijo', ka' daagi' mule' suele ko mian nomboa kasanangan nu kinyonyoanyo binatang anu osombahkon salaku koloban anu opotunu.

³² Aha nomboamo mae 70 na sapi' lakinyo, 100 na domba, ka' 200 na anak nu domba ka' nonsombahkonmo bau koloban hi Tumpu anu opotunu.

³³ Aha nomboamo mae mule' 600 na sapi' lakinyo ka' 3.000 na domba da osombahkon ka' okaan hingga-hinggat nu mian anu sinihukmo.

³⁴ To ima-imam anu nomposusi'mo butongnyo madi' da'isan na mongkiliti binatang haha aijo'. Kalana aitu aha tinulunganmo nu to mia-mian Lewi, kalana mian nu Lewi na talalo tulu-tulutan hi atulan nu momposusi'. Aha tataap montulungi sampeje sukupmo na imam anu momposusi'mo butongnyo.

³⁵ Misa' ola koloban anu opotunu na osombahkon, panyo mule' suele to ima-imam nonsombahkonmo, lompo'nyo nu koloban anu binau pinontalima kase, anu kinaanmo nu mian da'isan. Aha mule' suele nonsombahkonmo anggur anu dinudu'akonmo i koloban anu pinotunumo aijo'. Sumo aijo' na po'ule' nombau mosia na monsombah Tumpu i Laigan nu Tumpu.

³⁶ Sahingga sinanangmo na kinyonyoa i Tomundo Hizkia tiba miannyo anu nu palentah kalana madi' pinin Tumpu Allah nontulungimo aha sahingga noko alamo nombau iwi-iwi' aijo'.