2 SAMUEL 4 - KITAB NU TUMPU ALLA LELE MA'IMAI'

I Isyboset pinateanmo

^1-4 Lee' i Saul sangga'at i Mefiboset anak mo'ane i Yonatan. Ia pengko' na lumajang salatan umunnyo ingolima'mo na taun, tempo'nyo i Saul tiba i Yonatan sinilakamo. Kalana salatan nohongomo lele aha sinilakamo kiijo' i Yizreel mian anu montamongi i Mefiboset nonguba'mo ia ka' nopadeka', pa nyo kalana boune aijo' kino sia-sia'mo sahingga anak aijo' nanabu'mo, mokonyo aijo' ia pinengko'mo. Salatan i Isyboset anak mo'ane i Saul nohongomo taalu' i Abner pinateanmo kiijo' mae i Hebron ia madi'mo binaani ka' iwi-iwi' na bansa Israel nabuhukmo. I Isyboset tiba suludadunyo ua aha anu matangkas na pangkatnyo anu mongkapali tompukan nu suludadu anu lewa' montumbuhi de mahampatemo: samian sanggonyo i Baana ka' samian mule' sanggonyo i Rekhab. Aha anak i Rimon, anu lengkat mae i Beerot, aha tulunan mae nu bansa Benyamin. (Beerot minsoop da'erah nu aha Benyamin. Tumpu nu lipu' ikiijo' nopalaimo namba i Gataim ka' jinojoongmo kiijo' mae tempo'nyo aitu).

⁵ Ua aha na suludadu anu matangkas na pangkatnyo aijo', aijo'mo i Rekhab tiba i Baana nambamo i laigan hi Isyboset, aha tinoka ikiijo' sonsu unmo na sinaa, tempo'nyo aitu i Isyboset hau-haunyo ihoyotmo sonsu un sinaa.

⁶ Boune anu lewa' opoka-pokau i laigan tempo'nyo aitu hau-haunyo mompile'i gandum natatundu'mo ka' kinahoyotanmo. Kalana aijo' i Rekhab tiba i Baana noko ala nonjolo ninsoop.

⁷ Aha balomo ninsoop i uno nu salipi' kikinahoyotan i Isyboset, kiijo' ia hau-haunyo binobogonmo lantas jinalo'mo nu aha, sahingga ia sinilakamo. Ubaknyo pinolomo nu aha ka' binoamo nu aha. Sinampahu na aha i lumajang ninsusule' nontulu Bangka'nyo nu Yordan.

⁸ Tinoka ikiijo' binee'mo nu aha na ubak i Isyboset hi Daud kiijo' i Hebron ka' pinoto'inyo, “Aiyamo na ubak i Isyboset anak mo'ane i Saul, sampo bali' nu belento Tomundo' anu ko tanga'anmo mompatei belento Tomundo'. Sinaa aiya sinitujuanmo nu Tumpu na mombalosakon apa-apaa na anu binaumo i Saul tiba lee'nyo mae hi belento Tomundo'.”

⁹ Panyo tinaaman i Daud, “Tumpu anu tumuu' anu nomposalamatmo aku, da madi' nohumpak kasilaka'an, na monsumbu' apaa na anu ku taloakon aiya memang totu'u.

¹⁰ Tempo'nyo kiijo' mae i Ziklag daagi kinomian nompoto'i mae hi belengku tukoonyo i Saul sinilakamo, au'aitu na koonyo nu mian aijo' ia momboa mae lele anu ma'ima'. Panyo ia ihakopkumo ka' pinateankumo. Aijo'mo na tambonyo binee'ku hi ia salaku bau pombalosi lele anu binoanyomo mae aijo'.

¹¹ Jadi lebe maboat mule' nahukumannyo anu ku nabu'akon hi mian anu nombaumo anu ma'idek kalana nompateimo mian anu madi' ko sala'nyo ka' anu hau-haunyo hoyo-hoyot i posi laigannyo! Uuka aiya ku balosakonmo hi belemiu kalana belemiu nompateimo ka' belemiu madi'mo tumuu' i dunia aiya!”

¹² Lapas aijo' nompalentahmo to sulu-suludadunyo na i Daud da mompateimo i Rekhab tiba i Baana. Pinoko patean nuaha, limanyo tiba tengkenyo nu aha kinolongakonmo nu aha ka' sinegot 'mo koko kolam. Panyo ubak i Isyboset ingala ka' ilamun ikota' aijo' suele i uno nu pinolamunan i Abner.