2 SAMUEL 1 - KITAB NU TUMPU ALLA LELE MA'IMAI'

I Daud nohongomo lele i Saul sinilakamo

¹ Salatan i Saul sinilakamo i Daud ninsusule'mo mae tempo'nyo aitu ia namba nahampate nompatundu' aha mian nu Amalek lantas jinojoongmo i Ziklag inguansinaa na kinopinnyo.

² Dodododopnyo tinokamo na olitau samian anu lengkat mae i binakemah'an i Saul. Salaku tanda sinusa'mo kalana ko anumo sinilaka baju'nyo binea-beaknyomo ka' pino una'annyomo tano' aita i ubaknyo. Ia nambamo hi Daud ka' toka tinolodadupu i ahopnyo nonsombah ia.

³ I Daud nompokilawa hi ia, “Lengkat mae iya na beleyum?” Tinaamannyo, “Aku nopalai mae lengkat ikiijo' hi aha kemah nu mian Israel.”

⁴ Pinokilawa i Daud, “Soba sisik mae pa' apaa na anu jinadimo kiijo' mae!” Tinaaman nu olitau aijo', “Suludadu mami anu namba nahampate nopalaimo mae ka' manjoo' hondo na anu sinilakamo, tibamo i Saul ka' i Yonatan.”

⁵ “Mosia sahingga nusumbu' nu beleyum?” pinokilawa i Daud hi ia.

⁶ Tinaamannyo, “Papatuannyo aitu aku kiita i Bungkutnyo nu Gilboa, lantas nontoamo i Saul naninsehamo i talombo'nyo ka' to kale-kaleta tiba to sulu-suludadu nu sampo bali'nyo anu nonsake'i ajahan nongohanimo kahanda'mo montumbuhi ia.

⁷ I Saul nosiloi no utu ihikunyo ka' nontoamo aku lantas aku ilaganyomo ka' tinaamankumo 'Apaa Tuanku.'

⁸ Pinokilawanyomo mae ihe na beleyum lantas pinoto'ingkumo hi ia, aku aiya mian nu Amalek.

⁹ Lantas pinoto'inyomo hi belengku, 'Soba po uuka mae ka' pateimo mae na aku! Tinadokmo hondo na belangku aiya ka' malia'mo silaka'.'

¹⁰ Sahingga ingohaniankumo na ia nokiijo' ka' pinateankumo, kalana ku sumbu' de ia motua' kalana madi'mo mahoson na tuminjo' memang ahi' ia silakamo. Lantas ingalangkumo na mahkota'nyo anu aijo' i ubaknyo ka' galang anu ilimanyo ka' aiya binoangkumo mae hi belento Tuanku.”

¹¹ Nohongo aijo' i Daud nombea-beakmo baju'nyo kalana nolibosmo hondo na ia ka' suludadunyo iwi-iwi' suele nombaumo sumo aijo'.

¹² Aha nohangimo ka' nontoongimo adatnyo susumo biasa obau de ko anumo silaka ka' mule' binapuasa'mo sampe i nalom, monginau' i Saul tiba i Yonatan ka' mule' monginau aha mian da'isan Israel mian anu pinalesayamo hi Tumpu kalana nanjoo'mo hondo na anu sinilaka nahampate aijo'.

¹³ Lapas aijo' pinokilawamo i Daud hi olitau aijo' anu nomboa mae lele aijo', “Beleyum mian anu lengkat mae iya?” Tinaamannyo, “Aku aiya mian nu Amalek, mian anu ola mamba mae mololo aiya ilipu' nu belento Tuanku.”

¹⁴ I Daud notatae, “Baani hondo na beleyum nompateimo tomundo' anu pinile'anmo TUMPU!”

¹⁵ Lantas ilaganyomo na suludadunyo samian ka' pinalentahnyo, “Pateimo na ia!” Mian aijo' nonjalo'mo olitau nu aha mian Amalek aijo' sampe ia sinilaka.

¹⁶ Koonyo i Daud hi olitau nu aha Amalek aijo', “Posi beleyum na nompokona hukuman mate aiya hi butong nu beleyum kalana nongakuimo tukooyum beleyum nompateimo tomundo' anu pinile'anmo nu Tumpu!”

I Daud nohangimo i Saul tiba i Yonatan

¹⁷ Lapas aijo' i Daud lewa'mo nohangi ka' nonyanyiakonmo i Saul tiba i Yonatan,

¹⁸ ka' pinalentahkonnyomo da nyanyian aiya opotinganakon hi aha tulunan nu bansa Yehuda (Nyanyian aiya tinulis i Kitab Yasar).

¹⁹ “Israel i bungkutnyo nu belemiu haha aijo' anu majo'on aita mae sinilakamo na to sulu-suludadu anu baani, to momo'ane nu negara, sinilakamo na aha salaku bunga bansa.

²⁰ O'amalakon da mian nu aha Gat boli nohongo mae lele haha aijo'. O'amalakon da jalan toto ise-ise' kiijo' i Askelon madi' nohumpak lele aijo'. Dumo boune nu aha Filistin lewa'mo bilahi, dumo boune nu aha mian halipulu talalomo mongaisakon kalame'an.

²¹ O to bungku-bungkutnyo haha aita' i Gilboa hongo mae na potataengku: Boli ko dondu'ok ka' ujan mohumpisi belemiu! Pojohok da manggas ka' mateges na ale' nu belemiu tiba padang nu belemiu. Kalana kiita'mo mae na pinanintimpasan nu kanta nu mian anu baani hondo. Ka' kanta i Saul mule' ingatakonmo madi'mo ilanya'an.

²² Pana' i Yonatan moko ala hondo mompatei. Bajak i Saul madi' monsumbu' kalibosan mompatei sampo bali', mohopu'i anu mongewa.

²³ I Saul tiba i Yonatan mongkanaya mian ka' okalibosi saja' mongka'oho' mosa'ngu' mau i uno nu kantumuu'an ka' ikasilakan; aha lebe malia' molingkudui alaimbelong, lebe mahoson molingkudui singa anu daagi bata'nyo.

²⁴ O boune nu Israel, haangi ka' tando'i na i Saul, tomundo' aijo'! Anu nombaju'imo belemiu nu hude buhitnyo momea' ka' mule' ma'ima' hondo, ka' nompakeimo belemiu nu mosoni' anu ko mainannyo ma'ima' hondo.

²⁵ Sinilakamo na to sulu-suludadu anu baani hondo pinisala'onmo i uno nu pahampatean ka' i bungkutnyo haha aita anu iliingmo i Yonatan nanimbantamo ka' ihojokmo.

²⁶ O utusku Yonatan, kinyonyoangku sinusa'mo hondo ka' nolibosmo, kalana beleyum ko angga'nyo hondo hi belengku. Kalibosan nu beleyum hi belengku talasanggo hondo.

²⁷ Sinilakamo na to sulu-suludadu nu bansa anu baani hondo Madi'mo kinokaliangannyo na toongon nu aha anu bau pahampate.”