2 PETRUS 1 - KITAB NU TUMPU ALLA LELE MA'IMAI'

¹ To Utu-utus anu totu-totu'u pinalesayamo sumo kami! I Yesus Kristus, aijo'mo Tumpu ka' Tomundo anu Momposalamat kita, nompotimbalimo kita palesaya hi Ia, kalana Ia nombaumo anu totu'u. Sulat aiya lengkat mae hi Simon Petrus, samian na posaihon ka' rasul i Yesus Kristus.

² O'amalakon da Tumpu mombee'i balakat ka' ka'ima'an hi belemiu molabi-labi, kalana belemiu nonsumbu'mo Tumpu ka' i Yesus Tumpunto.

Tumpu nolaga ka' nompile'i

³ Tumpu nontoongimo kuasanyo salaku Tumpu da mombee'mo hi kita iwi-iwi na apaa anu opalalui i kantumuu'anto mombau palentah nu Tumpu. Ia nombau aijo' osumbu'to i han apaa na anu binaumo i Yesus Kristus, anu nolagamo kita da mongoa'i kuasanyo ka' kanonongan-Nyo.

⁴ Tiba jalan anu sumo aijo' na Tumpu nombee'imo kita to bala-balakat anu ko angga'nyo ka' madi' ko gampanyo anu jinanji'-Nyomo. Kalana balakat haha aijo' sahingga belemiu nolapasmo i han anu ma'idek anu lewa' okamilui ka' anu nongideimo dunia aiya, ka' komiu nohumpakmo atulan nu Tumpu.

⁵ Mokonyo aijo', bala usaha totu-totu'u ka tataap palesaya hi Kristus ka' palesaya miu aijo' otiwai ahi' nu kantumuu'an anu ma'ima'. Tuangnyo nu kantumuu'an anu ma'ima' belemiu palalu ahi' timbali mian anu pande,

⁶ ka' tuangnyo nu kapandean, komiu tionyo ahi' moko ala mongkuasai butong. Ka' tuangnyo nu moko ala mongkuasai butong tionyo ahi' belemiu mompokopiani butong ka sabaan na mongahopi iwi-iwi na apaa. Tuangnyo nu sabaan de mongahopimo iwi-iwi na apaa, belemiu tionyo ahi' mombatuki pongka'oho' nu Tumpu.

⁷ Ka' tumuu' mombatuki pongka'oho' nu Tumpu tionyo ahi' otiwai nu mongkalibosi to utu-utus anu pokakana na iman. Ka' mule' de komiu mongkalibosi to utu-utus anu pokakana na iman tionyo ahi' otiwai nu mongkalibosi iwi-iwi'na mian.

⁸ Iwi-iwi' aijo' atina'mo na bau-baunyo anu opalalui nu belemiu. De bauon haha aijo' daagi' ka' molabi-labi hi belemiu, komiu mompaka ko kahanda'mo mule' ka' mingkaliangan, ka' monsumbu' i Yesus Kristus Tumpunto lebe ma'ima' mule'.

⁹ Panyo mian anu madi' ko bauon haha aijo' pikilannyo soki; ia madi' moko ala montoa ka' nu kolilimimo na to dosa-dosa'nyo anu uutu mae pinolomasmo.

¹⁰ Kalana aijo', to utu-utus bala usaha da belemiu anu i lagamo nu Tumpu ka' pinile'an-Nyomo na butong miu lebe mompaka bala usaha mule'. De belemiu mombau aijo', belemiu madi' mompala'i kapalesaya'an miu.

¹¹ Tiba jalan anu sumo aijo' komiu obee'i hak totu-totu'u da minsoop i Kalaja'an anu sampe toka sidu-sidutu' lengkat mae hi Tumpu ka' Tomundo anu Momposalamat kita i Yesus Kristus.

¹² Kalana aijo', aku saja' mompotuka' belemiu mongkona han anu sinanggomo aijo', mau mule' belemiu nonsumbu'mo ka' pinalesayamo hondo i pangajalan lengkat mae hi Tumpu anu tinalimamo miu aijo'.

¹³ De aku daagi' tumuu', ku oa'i pantas na saja' mompotuka' belemiu i hahan aijo'.

¹⁴ Kalana kusumbu', saba' madi'mo daagi' pin aku mompala'imo dunia aiya, kalana Tumpunto i Yesus Kristus nompoto'imo mana-manasa hi belengku.

¹⁵ Jadi aku saja' bala usaha da mau mule' aku silakamo, belemiu saja' montutugi hahan aiya.

Anu tinoamo nu mata na katalasanggoan i Kristus

¹⁶ Tempo'nyo kami nompoto'i hi belemiu i Yesus Kristus Tumpunto toka talasanggo hondo, kami madi' nohongo hi sisik anu toto bale-baleko' anu ola pohumpakan puji' nu mian. Katalasanggoan i Kristus aijo' tinoamo mami nu posi mata mami.

¹⁷ Kami kiijo' mae tempo'nyo Ia ingadatan ka' pinotalasanggo nu Tumpu Tuumanto. Tempo'nyo aitu i hongo na potatae lengkat mae hi Anu Talasanggo anu notatae hi Ia, “Aiyamo na Anak-Ku anu ku ku kalibosi. Ia momposanang kinyonyoang-Ku!”

¹⁸ Posi kami na nohongo potatae aijo' tinoka lengkat mae i suluga' tempo'nyo kami daagi' hingga-hinggat tiba Ia kiita' mae i bungkut-Nyo anu susi' aijo'.

¹⁹ Mokonyo aijo' kami lebe mule' palesaya totu-totu'u hi potuunon nu Tumpu anu pinolelemo nu to nabi-nabi. Lebe ma'ima' belemiu mongintoomakon potuunon aijo', kalana potuunon aijo' sumo sulu' anu monjingkai tampat anu pintung sampe pe dunia nu jingkai nu hiusinyo nu jingka tolohinsi'mo, ka' jingka nu mandala' sasu kabete'an monjingkaimo uno nu kinyonyoa miu.

²⁰ Anu lebe penting hondo tionyo o inau' nu belemiu na aiya: Potuunon nu Tumpu anu pinotokakon nu to nabi-nabi, madi' timbali o alati'i nu posi pikilan.

²¹ Kalana, madi' toho' potuunon nu Tumpu opolele ola kalana pongka'oho' nu mian. Panyo Roh nu Tumpu na mongkuasai mian da mompotokakon potuunon anu lengkat mae hi Tumpu Allah.