1 TOMU-TOMUNDO' 16 - KITAB NU TUMPU ALLA LELE MA'IMAI'

¹ Sahingga notataemo na Tumpu hi Nabi Yehu anak i Hanani, tukoo-Nyo, “Potokakon na potuunon-Ku aiya hi Baesa,

² 'Naipuan mae beleyum misa' mian anu talasanggo, panyo' beleyum i hangkat-Kumo binau polaya' nu mian Israel anu pinalesayamo hi beleng-Ku. Uuka aiya beleyum binaladosa'mo susumo i Yerobeam ka' nonsaduakonmo mian nu Israel anu pinalesayamo hi beleng-Ku binaladosa'mo, sahingga Aku notambuha'mo.

³ Kalana aijo' Ku pateimo na beleyum ka' belemiu salaigan susumo anu binaung-kumo hi Yerobeam.

⁴ Mian anu i uno nu laigan anu silaka i uno nu kota, dedeng na mongkan, ka' aha anu silaka i sambiha' nu kota, tomonsi' na montoluki.’ ”

^5-7 Apaa na anu pinotuunmo nu Tumpu aijo' hi Baesa ka' aha salaigan pinoto'imo i Nabi Yehu, kalana i Baesa nombaumo kalakuan anu ma'idek hi mata nu Tumpu, i Baesa nonsaduakonmo da notambuha' na Tumpu, misa' ola kalana ia nompateimo iwi-iwi' na aha salaigan i Yerobeam. Sisikon sangga'at mongkona i Baesa, tiba kabaaniannyo tinulismo i kitab Sisikon nu to Tomu-tomundo' Israel. I Baesa sinilakamo lantas i lamunmo i Tirza. I Ela anaknyo momo'ane na nombolosi ia binau tomundo'.

I Ela, tomundo' nu Israel

⁸ I taun ko uampulu'nyomo ka' anom na i Tomundo' Asa nompalentah Yehuda, i Ela anak i Baesa binaumo tomundo' nu Israel. Ia nompalentah kiijo' mae i Tirza i ngohua' na taun na kinopinnyo.

⁹ I Zimri, samian na suludadu anu matangkas na pangkatnyo anu mongkapalai sambagian na gombuan nu suludadu anu sumake' i kareta nosa'angu'mo da mongewa i Ela. Daagi' kinosansinaan kiijo' mae i Tirza, i Ela lewa'mo binatawa' sahingga nalangumo i laigan i Arza, anu momposadia kapalaluan nu aha salaigan i tomundo'.

¹⁰ Lantas i Zimri ninsoopmo ka' pinateannyomo na i Ela. Han aijo' jinadi i taun ko uampulu'nyomo ka' popitu' na i Tomundo' Asa nompalentah Yehuda.

¹¹ Madi' pinin salatan i Zimri tinimbalimo tomundo' pinateannyomo iwi-iwi' na aha salaigan i Tomundo' Baesa. Ka' mule' anak nu utus i Baesa iwi-iwi' anu to momo'ane ka' mule' to sanga-sangalu nu aha sa'anakan mae, madi' daagi' ko anu pinotumuu'.

¹² Susumo apaa na anu pinoto'imo nu Tumpu hi nabi Yehu mongkona i Baesa, iwi-iwi' na aha salaigan.

¹³ I Baesa tiba i Ela, anaknyo nonsombahmo to pilo-pilogot ka' mule' nonsaduakonmo mian nu Israel nombaumo dosa'. Kalana aijo' aha nonsaduakonmo da Tumpu nontambuha', Tumpu Allah na anu tionyo o sombah nu mian Israel.

¹⁴ Sisikon sangga'at anu mongkona i Ela, tinulismo i kitab Sisikon nu to Tomu-tomundo' Israel.

I Zimri, tomundo' nu Israel

¹⁵ I taun ko uampulu'nyomo ka' popitu' na i Tomundo' Asa nompalentah Yehuda i Zimri tinimbalimo Tomundo' nu Israel ka' nompalentahmo kiijo' i Tirza ola ingipitun na kopinnyo. Tempo'nyo aitu suludadu nu Israel nontumbuhimo Gibeton, kota' nu aha Filistin.

¹⁶ Salatan i hongomo nu aha na i Zimri nombau posa'angu'an mongewa i tomundo' ka' mompateimo, i sinaamo aijo' kiijo' i kemah nu aha aijo' aha iwi-iwi' nohangkatmo i Omri talenga' nu aha, binaumo salaku tomundo' nu Israel.

¹⁷ Lapas aijo' i omri tiba gombuan nu suludadunyo nompala'imo Gibeton lantas nambamo nontumbuhi Tirza.

¹⁸ Salatan tinoa i Zimri taalu' kota' aijo' pinotundu'mo, ia ninsoopmo i Laigan nu tomundo' ka' pinapuannyomo na laigan nu tomundo' aijo', hingga-hinggat tiba butongnyo sahingga ia sinilakamo.

¹⁹ Aijo' jinadimo sumo aijo' kalana ia nombaumo kalakuan anu ma'idek hi mata nu Tumpu. Susumo i Tomundo' Yerobeam, i Zimri suele binaladosa'mo hi Tumpu, ka' nonsaduakonmo suele mian nu Israel binaladosa'mo.

²⁰ Sisikon sangga'at mongkona i Zimri tibamo posa'angu'an anu lewa'mo tinanga'anyo da mombau anu ma'idek tinulismo i kitab Sisikon nu to Tomu-tomundo' Israel.

I Omri, tomundo' nu Israel

²¹ Tempo'nyo aitu bansa Israel nobagi-bagimo kalana daagi' ko anu mongkahanda'i da i Tibni anak i Ginat na timbali tomundo', panyo' daagi' mule' ahi' ko anu mongkahanda'i da i Omri na timbali tomundo'.

²² Ahennyo tinongala hi aha anu mongka'ima'i i Omri. Salatan i Tibni sinilakamo i Omri tinimbalimo tomundo'.

²³ Aijo' jinadi i taun kotolumpulu'nyomo ka' sa'angu' na i Tomundo' Asa nompalentah Yehuda. I Omri nompalentahmo salaku tomundo' nu Israel sinampulu' ka' ohua' na taun na kinopinnyo.

²⁴ Panyo' lapas aijo' ia nongolimo sa'angu' na bungkutnyo olinyo 6.000 na doi salaka hi mian sanggonyo i Semer. Lantas ia nombaumo sa'angu' na kota' i bungkutnyo aijo'ka' sinanggohannyo Samaria, pinosanggonyomo hi Semer, tumpunyo u'utu mae nu bungkutnyo aijo'.

²⁵ I Omri saja'mo nombau dosa' anu lebe daka', i lingkuduannyomo na anu lewa' binau nu to tomu-tomundo' anu nompalentahmo ma'isa pe'e kino ianyo.

²⁶ Pokakana susumo i Yerobeam i Omri suele binaladosa'mo ka' nonsaduakonmo mian nu Israel binaladosa'mo ka' nonsombahmo pilogot. Kalana aijo' aha nonsaduakonmo sahingga Tumpu notambuha'mo. Tumpu Allah na anu tionyo ahi' osombah nu mian Israel.

²⁷ Sisikon sangga'at mongkona i Tomundo' Omri, ka' iwi-iwi' na anu binaunyomo tinulismo i kitab Sisikon nu to Tomu-tomundo' Israel.

²⁸ Salatan i Omri sinilakamo ka' i lamunmo kiijo' i Samaria i Ahab anaknyo na binaumo tomundo' nombolosi ia.

I Ahab, tomundo' nu Israel

²⁹ I taun ko tolumpulu'nyomo ka' ualu' na i Tomundo' Asa nompalentah Yehuda, i Ahab anak i Omri tinimbalimo tomundo' nu Israel, ka' nompalentahmo i Samaria inguampulu' ka' ohua' na taun na kinopinnyo.

³⁰ Ia saja'mo nombau dosa' anu lebe daka' i mata nu Tumpu, ilingkuduannyomo na to tomu-tomundo' anu ma'isa pe'e kino ianyo.

³¹ Ma'isa na'osa na ia i kantumuu'annyo lewa' mombau dosa' susumo i Tomundo' Yerobeam, pakalaus ia nongosoai mule' i Izebel anak i Tomundo' Etbaal mian nu Sidon, ka' mule' ia nonsombahmo Baal.

³² Ia nombaumo laigan i Samaria bau ponsomban Baal, ka' i uno nu laigan ponsomban aijo' suele binaunyomo sa'angu' na mezbah bau pontalakanian pilogot.

³³ Binaunyo mule' patong pilogot Boune Asyera. Manjoo' hondo na dosa' anu binaunyomo molingkudui anu binau nu to tomu-tomundo' iwi-iwi' i Israel anu nompalentahmo ma'isa pe'e kino iannyo. Kalana aijo' ia nonsaduakonmo sahingga Tumpu notambuha'mo, Tumpu Allah anu tionyo ahi' osombah nu mian nu Israel.

³⁴ Tempo'nyo i Ahab nompalentahmo, kota Yerikho po'ule'mo binau i Hiel mian nu Betel. Panyo' susumo anu pinoto'imo nu Tumpu ma'isa pe'e kino ianyo anak i Nun da opoto'i hi Hiel, tukoo-Nyo anaknyo ohu-ohua': i Abiram anu tumpe-tumpenyo silakamo de i Hiel mompotinjomo pundasi nu kota' ka' i Segub anu tatampalui'nyo silakamo, de i Hiel mompokonamo tumban nu sabatan daka' nu kota aijo'.