1 SAMUEL 29 - KITAB NU TUMPU ALLA LELE MA'IMAI'

I Daud sinaimo nu aha mian Filistin da minsusule'mo

¹ Aha mian nu Filistin nomposihukmo suludadunyo iwi-iwi' i Afek, ka' suele aha mian nu Israel binakemahmo koko mata nu uee i Bangka'nyo Yizreel.

² Aha oli-olima' na tomundo' nu aha mian Filistin i lumajangmo tiba to sulu-suludadunyo toto samian daagi ko anu aha sa'atu na mian ka' samadala na mian; I Daud tiba suludadunyo i lumajang i mihije mae hingga-hinggat tiba i tomundo' Akhis.

³ To sulu-suludadu nu aha mian Filistin anu daka' na pangkatnyo nontoamo aijo' mae aha lantas ilelekanmo nu aha; “Mian nu Ibrani haha aijo' apaa na nu bau nu aha i aiya?” Tinaaman i Akhis, “Aiya i Daud anu toho'mo binee'an pangkat nokalaja hi Tomundo' Saul nu aha Israel. Ia gagana'mo pinin na jinojoong hi belengku. Salatanmo pe'e ia tinoka sangkut sinaa aiya, ma'isa toho' kino kasala'annyo.”

⁴ Panyo to sulu-suludadu anu daka' na pangkatnyo nu aha mian Filistin nontambuha'imo i Akhis ka' nompoto'i hi ia, “Saimo na mian aijo' minsusule' i kota anu binee'mo nu beleyum hi ia. Ia madi' timbali mamba mahampate hingga-hinggat tiba kita; boli-boli ia mule' ahi' na mompahampateakon mae kita kiijo' mae i tampat pahampatean. Temisa' aiyamo na kasampatan anu ma'ima' hondo hi ia, mongala kinyonyoa nu tomundo'nyo, aijo'mo mompatei suludadunto?

⁵ Temisa' iamo aijo' na i Daud? Hi iamo aijo' na to bou-boune u'utu mae nonsalelei ka' nonyanyiakon sumo uuka, 'I Saul nompateimo momada-madala na sampo bali'nyo panyo i Daud mopulu-pulu' na madala.’ ”

⁶ Lantas i lagamo i Akhis na i Daud ka' pinoto'inyomo hi ia, “Ko Tumpu anu tumuu' ku palesaya na beleyum memang montuluti aku. Sanang na aku de beleyum monsangalui aku mamba mahampate. Kalana salatanmo pe'e beleyum tinoka hi belengku sangkut uuka aiya, madai' kokasala'an nu beleyum. Panyo tomundo' haha aijo' sangga'at madi' mongka'ima'i beleyum.

⁷ Kalana aijo' pinsusule'mo ma'i-ma'ima' ka' boli mombau apa-apaa anu moko pa'idek kinyonyoa nu aha.”

⁸ Tinaaman i Daud, “Kasala'an apaa na anu binaungkumo kita Tomundo'? De susumo anu tinaloakon nu belento Tomundo', belento Tomundo' madi' nontoa kasala'an apa-apaa hi belengku aiya salatanmo pe'e aku nombau apa-apaa na anu pinalentahkonmo nu belento Tomundo' sangkutnyo uuka aiya, ka' daka' aku madi' opobee' mamba mahampate mongewa sampo bali' nu belento Tomundo'?”

⁹ Tinaaman na i Akhis, “Da nu sumbu' nu beleyum saba' beleyum ku akui tulu-tulutan sumomo malaikat nu Tumpu Allah. Panyo suludadu haha aijo' anu toto daka-daka' na pangkatnyo nomputusimo beleyum tukoonyo nu aha beleyum madi' timbali mamba mahampate hingga-hinggat tiba kami.

¹⁰ Mokonyo aijo' Daud, dodop belemiu iwi-iwi' anu nompala'imo mae i Saul lantas nambamo mae hi belengku, dodop subu-subu hondo pobulamo ka' lako'mo lia-lia' de sinaa bete'mo.”

¹¹ Kalana aijo' dodododopnyo subu-subu nambamo na i Daud tiba to sulu-suludadunyo ninsusule'mo i lipu' nu Filistin panyo suludadu nu Filistin haha aijo' na nambamo ahi' i Yizreel.