YUNU 1 - KITABI HABARI MOPIOHE

Tei Yunu diila lodungohe palenta lo Eeya

¹ Tou̒ dulahee tuwau, Eeya lotahuda mai odelei Yunu, walae̒e Amitai.

² Tahudaa-Lio, “Ponao̒lo ode Niniwe, kota leidaa̒ boito, u monganjamu kota boito, sababu otaawa-U̒ deu̒ ulipulio moleeta daa̒.”

³ Bo tei Yunu tumbao̒ malo monggata ode dulungo wewo u lopolahi batanga lonto Eeya. Tio lonao̒ ode Yopa, wau leitaahua loo̒dungga mota kaapali u mamobite ode Spanyol. Lapatao̒ tio lomaayali mao̒ oonggosi lo naonao̒olio tio lobotula mola ode kaapali, tulusi tio lobite pee̒-pee̒enta wolo tahi pokalajawa to kaapali ode Spanyol, u mopolahi batanga monto Eeya.

^4-5 Tei Yunu lolaahe mola ode tambati u towalungio daa̒ wau malo tibalata teto, tulusi leinuloto daa̒. Lapatao̒ Eeya lopodungga mai dupoto huloyongo ode yitaato kaapali, tulusi lotoduolo mola dutalo ulaba-labaalo, ulopo baleango kaapali boito tilinggula ngopee̒ loa̒ahumu. Tahi pokalajawa to kaapali mailoohe daa̒ wau hiwuwa-wuwaatia̒ mei̒ tulungi, ngota-ngota ode dewalio lohihilao. U mopo kuulangi topotala bolo moa̒ahumo, timongolio malolapi detohu kaapali boito ode delomo deheto.

⁶ Tou̒ nakoda lokaapali boito lolaahe mola ode walungo, ilodunggalio tei Yunu mota teto donggo tuutuluhu. Lapatao̒ tio loloi̒ya mao̒, “Diila pongalo aakali yio̒ mowali motuluhe todelomo owowoluwoa odie botie! Ntali, pobungulo! Podua̒alo mao̒ ode dewaamu u mei̒ tulungi mai. Potaala tio mamodehu hilao to olanto tilinggula ito diila binaasa.”

⁷ Lapatao̒ tei Yunu wau nakoda boito lobotula mola ode yitaato, tahi pokalajawa to kaapali boito loloi̒ya ode timongota limongolio, “Dulo, pahutoonto alihu otaawanto tatoonu tao̒totala tilinggula ito ilodungga lobaala botie!” Timongolio malo mahutao̒, wau tanggulee Yunu u ilopahutalio.

⁸ Lapatao̒ uali mongolio odelei Yunu, “Wolo yio̒ taloo̒ sababu mai baala botie? Yio̒ lonto utoonu mai? Bangusa wolo? Yilongola yio̒ woluo tewe?”

⁹ Tametao̒ lei Yunu, “Wau̒ taulo Ibrani. Wau̒ hemolubo Eeya, Allahu Taa̒ala tosologa, talo powali mai deheto wau tudulio.”

¹⁰ Lapatao̒ sililitaalio mao̒ woloolo mola tio helo tolopani mopolahi batanga monto Eeya. Loo̒dungohe uito tahi pokalajawa to kaapali malebe yiloohe poli wau loloi̒ya mao̒ olio, “Buheli daa̒ huhutuumu boito!”

¹¹ Tou̒ boito dutalo lebe hemo pomata-mata mai, lapatao̒ tahi pokalajawa to kaapali lohintu mao̒ olio, “Wolo u musi pohutuo lami to olemu alihu dutalo botie moole?”

¹² Tametao̒ lei Yunu, “Tapilaalo mola wau̒ ode delomo deheto, tantu dutalo botie mamohuheli. Sababu otaawau̒, deu̒ wau̒-wau̒ulo taloo̒ sababu dutalo ulaba-labaalo botie lotudo mai olimongoli.”

¹³ Bo tahi pokalajawa to kaapali donggo hemo tolopani wolo tio̒opatea hemo luo̒odeo̒ kaapali boito ode tudulio. Bo dutalo olo bo lebe hemolilau mai, tilinggula bule limongolio diila ilohuna sama-samaata.

¹⁴ Sababu uito timongolio longiibode mola ode Eeya, “Yaa Eeya, mongowatotia momolohone, diila mao̒ binasawa mai mongowatotia sababu mohama nyawa lotaa udiila lohutu totala penu boli wolo ode mongowatotia. Yaa Eeya, Eeya malohutu mai wolo u kilahandaki lo Eeya.”

¹⁵ Lapatao̒ timongolio lopomahula mola olei Yunu ode delomo deheto. Yi dutalo boito malo huheli lolilau mai.

¹⁶ Tahi pokalajawa to kaapali boito mailoohe daa̒ to Eeya, wau lapatao̒ malo tirabua mao̒, timongolio helo podewo bake wau lodaantia sua̒li u hidala-dalala ode Eeya.

¹⁷ Tou̒ boito Eeya lopodungga mai tola leidaa̒ tuwau u loololoolao̒ olei Yunu. Yi tei Yunu malo tibiluloa̒ todelomo ombongo tola boito ngotilonggadu tolo hui wau otolu dulahu.