YOSUA 1 - KITABI HABARI MOPIOHE

Allahu Taa̒ala lopoa̒hu olei Yosua lohama huta lo Kanaa̒n

¹ Lapatao̒ tei Musa yilate, wato lo Eeya boito, Eeya helo tahuda mai ode wakili lei Musa, deu̒yito-yito tei Yosua walae̒e Nun.

² Tahuda lo Eeya, “Wato-U̒ tei Musa mailate. Yi botia opiohelio yio̒ wau ngoilanggubu umati lo Isirai̒lu motidapa-dapato u mobalango Dutulaa Yordan, wau tumuwota mota ode lipu uwohi-U̒ mao̒ olimongolio.

³ Wau̒ malo tahuda mai odelei Musa deu̒ timii̒du madala potidutaa̒ limongoli mailohi-U̒ mai olemu, Yosua, wau ode ngoilanggubu umati-U̒.

⁴ Madalamu mabua̒-bua̒de monto huta datahu u luasi daa̒ udelita to huliaalio demola hihui̒-hui̒dea lo Libanon totilayo wau monto Dutulaa Eperat u leidaa̒ boito to tiimuru tulusi meituwoto lipu bangusa lo Het demola Lau Tenga to otolopa.

⁵ Penu boli ngotaa mao̒ diaaluo tamambo mopoo̒laaheo̒ olemu, Yosua, ngotupa lo tutumulumu. Sababu Wau̒ malaito pee̒-pee̒enta wolemu debo odelo Wau̒ omoo̒omolu pee̒-pee̒enta wolei Musa.

⁶ Mamusi yio̒ yakini wau buheli, sababu yio̒ mamodelo bangusa botie tou̒ timongolio motibiluloa̒ tolipu u pilodanti-U̒ odeli nenemoya limongolio.

⁷ Bo, mamusi yio̒ tio̒otutua yakini wau buheli. Yio̒ musi modaha mao̒ alihu yio̒ modungohe ngoa̒amila butoo̒ uilohi odelei Musa wato-U̒ boito olemu, wau diila mao̒ palongamu penu boli ngoi̒di mao̒, yi yio̒ maa otilapulo.

⁸ Buku lo butoo̒ botie musi laito pobacaamu mao̒ to umati-U̒. Poo̒olaata mao̒ buku boito hui wau dulahu, alihu laito yio̒ moponao̒ ngoa̒amila utula-tuladee todelomio. Wonu yio̒ moponao̒ mao̒ ngoa̒amilalo boito, tutumulumu maa maa̒amulu wau otilapulo.

⁹ Eelai mao̒, Wau̒ malo malentai olemu alihu yio̒ tio̒otutua yakini wau buheli! Diila mao̒ oohe meaalo diila botie o sumaangati, sababu Wau̒ Eeya Allahu Taa̒alamu pee̒-pee̒enta wolemu penu boli ode utoonu ponao̒wamu.”

Tei Yosua longohi mao̒ palenta wau potuhata ode umati lo Isirai̒lu

¹⁰ Yi tei Yosua lomalentao̒ mongo tau̒wa umati lo Isirai̒lu

¹¹ alihu momalito ode ngoilanggubu polokemawa umati lo Isirai̒lu wau mongohi mao̒ palenta botie, “Podapato mao̒ tomeu̒, sababu donggo tolo hui mola poli timongoli musi mobalanga Dutulaa Yordan u motihuloa̒ tolipu uwohi mai lo Eeya Allahu Taa̒ala limongoli ode limongoli.”

¹² Ode suku Ruben, suku Gad, wau ngotayadu suku Manasye, tei Yosua loloi̒ya mao̒,

¹³ “Eelai mao̒! Tei Musa wato lo Eeya boito malo loi̒ya olimongoli deu̒ huta to ambahu tiimuru lo Dutulaa Yordan botie yilohi mai lo Eeya Allahu Taa̒ala limongoli ode limongoli u mowali huta limongoli.

¹⁴ Ngoa̒amila walao̒ wau dile taabua limongoli boli bibiahi mongoli mowali motibiluloa̒ tewe, bo tamoo-hipatea limongoli musi motidapato mopaatea wau motimulo wolo tau-tauwalo Isirai̒lu wewolio mobalanga mota Dutulaa Yordan.

¹⁵ Timongoli musi motulungi olimongolio tunggula timongolio motibiluloa̒ tohuta ambahu otolopa lo Dutulaa Yordan botie uilohi mai lo Allahu Taa̒ala limongoli ode limongolio. Lapatio mao̒ Eeya mongohi mai u aamani ode ngoilanggubu bangusa lo Isirai̒lu, deu̒yito timongoli mowali muli mohualinga mota ode huta limongoli lohihilao to ambahu tiimuru lo Yordan botie, uilohi lei Musa wato lo Eeya boito ode limongoli.”

¹⁶ Yi suku Ruben, Gad, wau ngotayadu suku Manasye boito malo lametao̒, “Wolo wambai̒o upilo malentamu mai olami, mapohutuo mao̒ lami, wau penu boli ode utoonu pohehulamu olami, yi ami mamonao̒.

¹⁷ Ami mamodungohe olemu, tutuuwauwa olo debo odelo ami modungohe olei Musa. Pohileaala dua̒ Eeya Allahu Taa̒alamu pee̒-pee̒enta wolemu debo odelo Tio pee̒-pee̒nta wolei Musa!

¹⁸ Timii̒du taa udiila mohuto taa̒aluku to okokawasamu, meaalo diila moduduo̒ palentamu, mahukuu-maniyola mate. Mamusi yio̒ yakini wau buheli!”