YAHYA 9 - KITABI HABARI MOPIOHE

Ti Isa lohutu taa pitoo̒ luli loo̒onto

¹ Tou̒ ti Isa nao̒nao̒, iloontonga-Lio taa pitoo̒ anggadu pilotutulio mai.

² Tahidudua̒ li Isa lohintu mao̒ odeli Isa, “Paaa̒ Guru, yilongola tau botie pilotutulio mai pitoo̒? Wolo kalana tio lohihilao odusa meaalo mongo dulaa̒lio tao̒dusa?”

³ Ti Isa lolametao̒, “Tio pitoo̒ diila sababu dusalio lohihilao meaalo dusa lomongo dulaa̒lio, bo alihu tau mowali moo̒onto mao̒ okokawasa lo Allahu Taa̒ala mokalaja todelomo batangalio.

⁴ Ngotilonggadu donggo dulahu, ito musi mokalaja mao̒ kalajaa-Lio lo talolao mai ola-U̒. Hui mamei dungga, wau penu boli ngotaa mao̒ diila tamowali mokalaja.

⁵ Ngotilonggadu Wau̒ todunia botie, Wau̒lo tinelo dunia.”

⁶ Lapatao̒ lotahuda odito ti Isa lonula loiyohu ode huta, wau longaaheo̒ yiyoo-Hio boito wolo huta. Lapatao̒ piloseka-Lio tomato lotau boito, tulusi lotahuda mao̒ olio,

⁷ “Ponao̒lo pobelesia mao̒ bayamu to Kulamu Siloam.” (Siloam boliilio ‘Ilutolia’.) Yi tau boito malonao̒ wau lopobelesi bayalio. Tou̒ tio lohualingai, tio malowali loo̒onto.

⁸ Mongo tiheedio wau tau-tauwalo tou̒ dipolulio mai loo̒onto olio hemohile-hile, ngoa̒amilalo malo loi̒ya, “Diila bo maatio botie tabiasaalio hulohuloa̒a hemohile-hile?”

⁹ Woluo talo loi̒ya, “Memangi maatio.” Bo woluo olo talo loi̒ya, “Diila, tio bo ngopee̒e motutuuwau wolo tau boito.” Bo tau boito lohihilao loloi̒ya, “Wawaatiaalo tio.”

¹⁰ “Woloolo mola waliilio tunggula yio̒ malowali loo̒onto?” uali mongolio olio.

¹¹ Tio lolametao̒, “Taa ilunte Isa boito lohutu mao̒ latao̒ ngoi̒di tulusi piloseka-Lio mai tomato lowatia wau lotahuda, ‘Ponao̒lo pobelesia mao̒ bayamu to Kulamu Siloam.’ Tulusi watia lonao̒. Wau tou̒ watia hemo pobelesi baya lowatia, watia malowali loo̒onto.”

¹² “Tou̒toonu tau boito?” yilintu mao̒ limongolio. Tio lolametao̒, “Diila otaawa.”

Taulo Parisi lotulete pasali u mopoo̒luli boito

^13-14 Todulahu boito dulahu Saabati tou̒ ti Isa longaaheo̒ huta wolo yiyoo-Hio u lohutu taa pitoo̒ boito lowali loo̒onto. Yi taa engontielio pitoo̒ boito dilelolio mota ode tau-tauwalo Parisi.

¹⁵ Timongolio olo lohintu mao̒ olio woloolo mola tio malowali loo̒onto. Tio lolametao̒, “Tio malodutu mai latao̒ tomato lowatia, lapatao̒ pilobelesi mao̒ lowatia latao̒ boito watia malowali loo̒onto.”

¹⁶ Dengolo lota towolota tau-tauwalo Parisi boito loloi̒ya, “Diila pongalo aakali taa ulohutu utie asaliilio mai lonto Allahu Taa̒ala, sababu Tio diila momandungi dulahu Saabati.” Bo taa wewo loloi̒ya, “Diila pongalo aakali taa odusa mohutu momoo̒-linggolabeyalo debo odelo utie?” Lapatao̒ tilumoodulo mola huhama u hihiihede towolota limongolio.

¹⁷ Yi tau-tauwalo Parisi boito luli lohintu mao̒ totau boito, “Wolo huhamaamu pasalii-Lio lo talohutu mai olemu loo̒onto?” “Tio nabi,” tametao̒ lotau boito.

¹⁸ Bo mongo tau̒wa lo Yahudi boito diila lohuto palacaya deu̒ tau boito memangi pitoo̒ tou̒ dipolulio mai wau botia malowali loo̒onto. Sababu uito timongolio malo tianga mongo dulaa̒lio,

¹⁹ wau lohintu mao̒, “Otutu tio botie walau̒mu tahe loi̒yamu pilotutulio mai pitoo̒? Woloolo mola tio malowali loo̒onto botia?”

²⁰ Mongo dulaa̒ lotau boito lolametao̒, “Memangi tio botie walao̒ lamiaatia; wau tio memangi pitoo̒ anggadu pilotutulio mai.

²¹ Bo woloolo mola tio malowali loo̒onto botia, diila otaawa lamiaatia. Wau tatoonu talohutu olio malowali loo̒onto, uito olo diila otaawa lamiaatia. Yintuwalo olio, tio maleidaa̒; tio mowali molameto lohihilao.”

²² Mongo dulaa̒ lotau boito loloi̒ya mao̒ odito sababu timongolio moohe tomongo tau̒wa lo Yahudi; sababu timongolio boito malo heeluma, deu̒ tamo tolongaku mao̒ li Isa debo odelo Olongia Tamoo-poa̒ahua, diilalo mowali tumuwoto ode bele potabiaalo.

²³ Uito sababuulio mongo dulaa̒ lotau boito loloi̒ya mao̒, “Tio maleidaa̒; yintuwalo olio.”

²⁴ Lapatao̒ timongolio luli lotiango taa u engontielio pitoo̒ boito, wau loloi̒ya mao̒ olio, “Potadiaalo mola deu̒ yio̒ mamoloi̒ya mai u otutu. Otaawa lami tau boito taa odusa.”

²⁵ “Wolo tio odusa meaalo diila,” tametao̒ lotau boito, “diila otaawa lowatia. Bo tuwau sua̒li u otaawa lowatia; muloololio mai watia pitoo̒, botia watia maloo̒onto.”

²⁶ Lapatao̒ timongolio luli loloi̒ya mao̒ olio, “Mawolo u pilohutu-Lio olemu? Woloolo mola Tio lohutu olemu lowali loo̒onto?”

²⁷ Tau boito lolametao̒, “Mailungguli mai lowatia olimongoli bo timongoli diila mohuto modungohu. Yilongola timongoli ohilaa modungohe poli? Otanu timongoli ohilaa mowali muri-Lio olo?”

²⁸ Lapatao̒ timongolio malomuayo olio wau loloi̒ya mao̒, “Yio̒-yio̒olo muri-Lio; ami diila! Ami muri lei Musa.

²⁹ Otaawa lami deu̒ Allahu Taa̒ala malo tahuda odelei Musa. Bo pasali lotau boito, diila otaawa lami lonto utoonu asalii-Lio.”

³⁰ Tau boito lolametao̒, “Moo̒linggolabe daa̒ deu̒ diila otaawa limongoli lonto utoonu asalii-Lio, hiambola Tio malohutu olaatia lowali loo̒onto.

³¹ Otaawanto deu̒ Allahu Taa̒ala diila modungohe taa odusa, bo taa u mohulumati Allahu Taa̒ala, wau tamohutu kahandaki-Lio.

³² Tumulalo mai bohulo dunia diipo pee̒eta mao̒ ilodungohe woluo talohutu tau pilotutulio mai pitoo̒ malowali loo̒onto.

³³ Wonu tau boito diila monto Allahu Taa̒ala, tio diila mowali mohutu wolo-wolo.”

³⁴ Tametao̒ limongolio, “Wolo? Yio̒ tapolu-polu lodusa anggadu pilotutulio mai, yio̒ mamo ngaajali olami?” Yi tumulalo mai tou̒ boito tio dilinilio tumuwoto ode bele potabiaalo.

Pitoo̒ lorohani

³⁵ Ti Isa loo̒dungohe deu̒ tau boito mailinggi limongolio lonto bele potabiaalo. Tio malo lolohe tau boito lapatao̒ lotahuda olio, “Wolo yio̒ palacaya to Walao̒ Manusia?”

³⁶ Tau boito lolametao̒, “Tatoonu Tio. Tuani? Tulungia poo̒taa mai alihu watia palacaya o-Lio.”

³⁷ “Yio̒ maloo̒onto o-Lio,” tametao̒ li Isa. “Tioolo tamasaatia botie donggo hemobisala wolemu.”

³⁸ “Watotia, palacaya, Eeya,” loi̒ya mao̒ lotau boito, lapatao̒ losujudu mola tio totalu li Isa.

³⁹ Ti Isa lotahuda mao̒, “Wau̒ dungga-dungga mai ode dunia botie mai momutoo̒; alihu taa pitoo̒ mowali moo̒onto, wau taa moo̒onto, mowali pitoo̒.”

⁴⁰ Dengolo lota taulo Parisi tawoluo teto loo̒dungohe li Isa lotahuda odito, tulusi timongolio lohintu o-Lio, “Makusudu-Mu ami botie pitoo̒ olo?”

⁴¹ Ti Isa lolametao̒, “Humayaalio timongoli pitoo̒, timongoli diila odusa. Bo sababu timongoli malo loi̒ya, ‘Ami moo̒onto,’ uito boliilio mao̒ timongoli donggo odusa.”