YAHYA 20 - KITABI HABARI MOPIOHE

Kuubulu udiila otua

¹ Todulahu ahadi dimodupo, tou̒ donggo modio̒lomo, ti Maria Mahadalena lonao̒ ode kuubulu. Tio loo̒onto mao̒ botu poheu̒tio mahileilio lonto huango kuubulu boito.

² Yi tio tilumeteo̒ malo lolohe olei Simon Petrus wau muri tapilonu li Isa, wau loloi̒ya mao̒ olimongolio, “Eeya mahilama lotau lonto kuubulu, wau diila otaawa laatia tou̒toonu Tio pilopo balatio.”

³ Tulusi tei Petrus wau muri wewo boito malonao̒ ode kuubulu.

⁴ Duduulotalo hitetea̒, bo muri wewo boito lebe molinggaheo̒ wolei Petrus, wau tio leidungga mola leimulo tokuubulu.

⁵ Tio lomilohe mola ode delomo kuubulu wau loo̒onto latu dutudutu teto, bo tio diila tilumuwota mola.

⁶ Tei Simon-Petrus tunu-tunuhe lonto wulea, tulusi lato tilumuwota mola ode delomo kuubulu boito. Tio loo̒onto mao̒ latu dutudutu teto,

⁷ bo kaingi u pilolihutio to lunggongi Isa diaaluo to tiliilio bo leililibe wiwiwiwi.

⁸ Lapatao̒ muri tamaa leimulo tilunggulao̒ ode kuubulu, tilumuwota mola olo. Tio loo̒onto mao̒ wau palacaya. (

⁹ Tunggula tou̒ boito timongolio diipo mongalati wolo u tulatuladu todelomo Kitabi deu̒ Tio musi mobongu mai monto opopate.)

¹⁰ Lapatao̒ uito tahidudua̒ li Isa boito malo hualingo.

Ti Isa lopobilohe batanga toli Maria Mahadalena

¹¹ Ti Maria Mahadalena tilimihulao̒ totalu lokuubulu sambela hiyo-hiyongo. Tou̒ donggo hiyo-hiyongo, tio lomilohe mola ode delomo kuubulu,

¹² lapatao̒ maloo̒onto malai̒kati duulota hipakea moputio̒. Timongolio boito hihuloa̒a tobakasi lotambati milate li Isa, ngota towimbihu lunggongo wau tawewolio towimbihu oa̒ato.

¹³ Mamaa-lai̒katiyalo boito lohintu mao̒, “Ibu yilongola hiyo-hiyongo?” Ti Maria lolametao̒, “Eeya lowatia mahilamalio, wau diila otaawa lowatia tou̒toonu Tio pilopo balatio.”

¹⁴ Lapatao̒ tio loloi̒ya mao̒ odito, tio loili ode wulea wau loo̒onto li Isa tihutihula teto. Bo diila otaawalio deu̒ taboitolo ti Isa.

¹⁵ Ti Isa lohintu mao̒ olio, “Ibu, yilongola hiyo-hiyongo? Ti Ibu hemo lolohe olita?” Ti Maria hemo lantobu tau boito tamomengia, oditolio tio loloi̒ya mao̒, “Paaa̒, wonu ti Paaa̒ talopo limbata o-Lio lonteea, tulungia polelea mai olaatia tou̒toonu pilopo balata li Paaa̒ o-Lio, alihu watia mowali mohama o-Lio.”

¹⁶ Ti Isa lotahuda mao̒ olio, “Maria!” Ti Maria loili mao̒ odeli Isa tulusi loloi̒ya todelomo bahasa lo Ibrani, “Rabuni!” (Boliilio mao̒ “Guru”.)

¹⁷ “Diila mao̒ dihima Wau̒,” tahuda li Isa olio, “Sababu Wau̒ diipo lobotula mola odeli Paapa. Bo ponao̒lo mota ode mongo wutatu-U̒, wau polelea mao̒ olimongolio deu̒ botia Wau̒ mamo botula mola odeli Paapa-U̒ wau odeli Paapamu, Allahu Taa̒ala-U̒ wau Allahu Taa̒alamu.”

¹⁸ Yi ti Maria malonao̒ lopoo̒taa to tahidudua̒ li Isa deu̒ tio maloo̒onto Eeya wau deu̒ Eeya malo tahuda mai ngoa̒amilalo boito olio.

Ti Isa lopobilohe batanga-Lio to tahidudua̒ o-Lio

¹⁹ Todulahu ahadi boitolo, tou̒ maahui, tahidudua̒ li Isa lotia̒mbu mao̒ tobele ngowale wolo huhuu-hebuwaalo hiu̒ntia, sababu timongolio moohe to tahidihima kawasa lo Yahudi. Debolo ti Isa lonao̒ mai wau tilimihulao̒ tohuungi mongolio wau lotahuda, “Salamu moa̒ahu olemu.”

²⁰ Lapatao̒ lotahuda odito, ti Isa lopo biloheo̒ olimongolio uluu̒ wau tutua̒lobe-Lio. Tou̒ loo̒onto mao̒ to Eeya, timongolio lengahee daa̒.

²¹ Lapatao̒ ti Isa pee̒entapo lotahuda mao̒ olimongolio, “Salamu moa̒ahu olemu. Debo odelo ti Paapa-U̒ lolao mai ola-U̒, odito olo Wau̒ mamolao olimongoli.”

²² Lapatao̒ ti Isa lopo hiipao̒ napasi-Lio ode limongolio wau lotahuda mao̒, “Tolimowalo Rohullah.

²³ Wonu timongoli mongambungu dusa lo tahingota-ngotaawa, Allahu Taa̒ala olo mongambungu mai olio. Wonu timongoli diila mongambungu dusa lo tahingota-ngotaawa, Allahu Taa̒ala olo diila mongambungu olio.”

Ti Isa wolei Tomas

²⁴ Tei Tomas (tai̒lunte “Pingi”) ngotaalio lo tamo pulaa duulota muri li Isa, diaaluo pee̒-pee̒enta wolo tawewo tou̒ ti Isa leidungga mai.

²⁵ Yi tahidudua̒ li Isa wewolio loloi̒ya mao̒ odelei Tomas, “Ami maloo̒onto Eeya!” Bo tei Tomas lolametao̒, “Wonu watia diipo loo̒onto bakasi lopaku to uluu̒-Lio, diipo lopodutu tingoongoa lo uluu̒ laatia to babaa kasiyalo pali lopaku boito wau diipo lopodutu uluu̒ laatia to tutua̒lobe-Lio sama-samaata watia diila mohuto palacaya.”

²⁶ Ngodiminggu lapatio mao̒ tahidudua̒ li Isa woluo poli totambati boito, wau tei Tomasi woluo olo. Huhebu ngoa̒amila hiu̒ntia. Boti Isa malonao̒ mai wau tilimihulao̒ tohuungi mongolio, lapatao̒ lotahuda, “Salamu moa̒ahu olemu.”

²⁷ Lapatao̒ ti Isa lotahuda odelei Tomas, “Bilohilo mai uluu̒u-U̒, wau podutua mai tingoongoa lo uluu̒mu teea. Wudua mai uluu̒mu wau podutua to tutua̒lobe-U̒. Diila mao̒ polingu poli, bo pomalacayalo!”

²⁸ Tei Tomas malo loi̒ya odeli Isa, “Eeyau̒ wau Allahu Taa̒alau̒!”

²⁹ Yi ti Isa lotahuda mao̒ olio, “Yio̒ palacaya sababu maloo̒onto ola-U̒, diila odito? Potisanangilo tutu taa palacaya eleponu diila moo̒onto ola-U̒!”

Patuju lobuku botie

³⁰ Debo donggo dadaata poli totoonulalo moo̒linggolabe wewo u hepilohutu li Isa totalu lo tahidudua̒ o-Lio, bo diila tiluladio todelomo buku botie.

³¹ Bo ngoa̒amilalo botie tiluladio mai, alihu timongoli palacaya deu̒ ti Isa yito Olongia Tamoo-poa̒ahua, Walao̒ Allahu Taa̒ala, wau sababu palacaya to o-Lio, timongoli mamoo̒tapu tutumulo.