TINGULI 5 - KITABI HABARI MOPIOHE

Mopuulo Palenta lo Allahu Taa̒ala

¹ Tei Musa longambu mai ngoilanggubu bangusa lo Isirai̒lu, lapatao̒ loloi̒ya mao̒ olimongolio, “Mongo wutato, dungohi mao̒ bubuu-too̒waalo uwohi mai lowatia todulahee botie olemu. Pobalaajalia mao̒ bubuu-too̒waalo boito, wau dungohi mao̒ wolo tatapu wau molotolo hilao.

² To Hui̒dee Sinai Eeya Allahu Taa̒alanto lohutu mai daantia tuwau,

³ diila bo wambao̒ wolo loluuhurunto, bo wolanto ngoa̒amila teewe.

⁴ Lonto tulu toitaato hui̒dee boito Eeya ohilaa motahuda tulusi woli mongoli.

⁵ Bo sababu timongoli moohe lotulu wau diila buheli motao̒de mola hui̒dee, yi watia tou̒ boito tilimihulao̒ towolota limongoli wolo Eeya u lopo tunggulao̒ tahuda lo Eeya ode limongoli. Eeya lopo malalumu mai,

⁶ ‘Wau̒lo Eeya Allahu Taa̒ala limongoli talodelo mai olimongoli yilumualao̒ lonto Masiri, tambati limongoli pilowatolio olimongoli.

⁷ Diila mao̒ polubo ila-ila wewo, tubowaalo Wau̒ wambai̒o.

⁸ Diila mao̒ pohutua duo̒lo batangamu bui̒ u penu boli debo odelo wolo wambai̒o uwoluo tohulungo, todunia meaalo todelomo taluhu towalungo lo huta.

⁹ Diila mao̒ polubo bui̒ debo odelo uito sababu Wau̒ Eeya Allahu Taa̒ala limongoli wau diila mohuto potutuu-wauwola penu boli loolo. Tau-tauwalo tamolonua̒ ola-U̒ hukuu-maniyo-U̒ demola wali otolulio wau opatio.

¹⁰ Bo Wau̒ mopo bilohei ponu-U̒ ode hilihu-lihua wali monto tau-tauwalo tamo tolia̒nga ola-U̒ wau modungohe palentaa-U̒

¹¹ Diila mao̒ polanggula tanggulu-U̒ wolo majanunu, sababu Wau̒, Eeya Allahu Taa̒ala limongoli, mohukuumani mai penu boli tatoonu wambai̒o tamopohuna tanggulu-U̒ diila to tambatilo.

¹² Polamea mola dulahu Saabati wau hulumatia mao̒ odelo dulahu umantali, sababu Wau̒lo Eeya Allahu Taa̒ala limongoli tamo malentai olimongoli.

¹³ Timongoli wohiya-U̒ mai wolomohui u mokalaja,

¹⁴ bo todulahu u opitulio yito dulahu pohuheliyalo u tolomodu ode ola-U̒, Eeya Allahu Taa̒ala limongoli. Todulahee boito diaaluo penu boli ngotaa mao̒ tamowali mokalaja, mopio timongoli, mongo walau̒mu, mongo watomu, bibiahumu meaalo tau deli tabilu-biluloa̒ to lipumu. Mongo watomu musi mohuheli debo odelo timongoli lohihilao.

¹⁵ Eelai mola deu̒ timongoli muloololio mai pilowatolio to Masiri, lapatao̒ bilebasia lo Eeya Allahu Taa̒ala limongoli wolo olootolo uleidaa̒. Sababu uito timongoli palentaa-U̒ mai u mopolame mao̒ dulahu Saabati.

¹⁶ Hulumatiyalo wau taala mao̒ tiyamo wau tiilamu; ui-uitolo palentaa-U̒, Eeya Allahu Taa̒ala limongoli, alihu timongoli moa̒ahu wau otutumulo hayahaya tolipu u mawohi-U̒ mai olimongoli.

¹⁷ Diila mao̒ pomate mate-mateelo mao̒.

¹⁸ Diila mao̒ pojina.

¹⁹ Diila mao̒ potao̒.

²⁰ Diila mao̒ pongohi sakusi u wimbulo pasali lotaa wewo.

²¹ Diila mao̒ potohilaa uolo taa wewo: belelio, hutalio, dilelio taabua, mongo watolio, bibiahio, kolodailio meaalo penu boli wolo wambai̒o u tilolo hakuulio.’

²² Ui-uitolo palenta uilohi mai lo Eeya ode limongoli tou̒ timongoli hia̒mbua tohui̒dee. Tou̒ Tio lotahuda mai wolo suala lobulonggodu lonto tulu wau heengo u mohulodu, Tio longohi mai papaa-lentawalo boito, wau diila taweewo. Lapatao̒ Tio loluladeo̒ tobotulei dulo pita wau longohi mai ode olau̒.”

Taulo Isirai̒lu hiduita

²³ “Tou̒ ngoilanggubu hui̒dee yilumai̒to wau timongoli loo̒dungohe suala lonto u modio̒lomo, ngoa̒amila tau̒wa losuku limongoli wau tahimuloa lolipu lonao̒ mai ode laatia.

²⁴ Uali mongolio mao̒, ‘Eeya Allahu Taa̒alanto malo pobilohei odudaa̒ wau ololama-Hio tou̒ ami loo̒dungohe helo tahuda mai lonto tulu. Todulahee botie ami malo sakusi deu̒ memangi otanu ode manusia u debo tumu-tumulo, eleponu Allahu Taa̒ala malo tahuda mao̒ olio.

²⁵ Bo yilongola ami musi mopo bataru mao̒ nyawa lami poli? Tulu u moo̒tihela hapato boito mamopo binasa mao̒ olami! Ami yakini deu̒ ami maamate wonu moo̒dungohe Eeya Allahu Taa̒ala muli motahuda mai.

²⁶ Wolo tingga woluo manusia tadebo tumu-tumulo lapatao̒ loo̒dungohe Allahu Taa̒ala tatumu-tumulo helo tahuda mai lonto tulu?

²⁷ Sababu uito, ponao̒lo Musa, dungohi mao̒ ngoa̒amila u potahuda mai lo Eeya Allahu Taa̒alanto, lapatao̒ potunggula mai ode olami wolo u pilotahuda-Lio mai olemu. Ami mamo dungohe wau taaa̒ti.’

²⁸ Loo̒dungohe uito, Eeya lotahuda mai ode laatia, ‘Wau̒ maloo̒ dungohe wolo uiloi̒a lobangusa boito, wau otutuulo mao̒ uali mongolio.

²⁹ Ntali wonu timongolio laito opongolaasa odito! Ntali wonu timongolio laito mohulumati ola-U̒ wau modungohe ngoa̒amila palentaa-U̒ tilinggula timongolio wau wali mola limongolio moa̒ahu u ohiheo-hiheolo mao̒!

³⁰ Ponao̒lo botia wau ahuliilo bangusa boito muli mohualinga mota ode kemalio ngota-ngota.

³¹ Bo yio̒, Musa, muli pohualingai wau potibiluloo̒lo teea wola-U̒; to olemu mawohiya-U̒ mai ngoa̒amila butoo̒ wau palentaa-U̒. Poa̒ajalia mao̒ olimongolio, alihu timongolio modungoheo̒ tolipu uwohi-U̒ mai olimongolio.’

³² Mongo wutato, dungohi mao̒ wolo tatapu wau molotolo hilao totoonulalo upilo malentai lo Eeya Allahu Taa̒ala limongoli ode limongoli. Diila mao̒ lambanga penu boli tuwau mao̒ monto papaa-lentawalo boito.

³³ Pohutua mao̒ ngoa̒amila upilo malentai lo Eeya Allahu Taa̒ala limongoli ode limongoli alihu timongoli moa̒ahu wau mowali motitatapu tolipu u mapoti biluloa̒ limongoli.”