TINGULI 4 - KITABI HABARI MOPIOHE

Tei Musa helo huntula tau lo Isirai̒lu alihu modungohe

¹ Lapatao̒ tei Musa loloi̒ya mao̒ ode bangusa boito, “Dungohe mao̒ ngoa̒amila butoo̒ upilo ngaajali mai lowatia ode limongoli, alihu timongoli mowali tumumulo tunggula motibiluloo̒ tohuta u mawohi mai lo Eeya, Allahu Taa̒ala loluuhuru limongoli ode limongoli.

² Wolo u pomalentai lowatia, diila mao̒ duhenga meaalo ilangiyalo penu boli ngoi̒di mao̒. Dungohe mao̒ totoonulalo palenta lo Eeya Allahu Taa̒ala limongoli u wohiu̒ mai olimongoli.

³ Timongoli loo̒onto lohihilao wolo u pilohutu lo Eeya Allahu Taa̒ala limongoli to Hui̒dee Peor. Timii̒du taa ulolubo Baa̒l totambati boito pilopo binasaa-Lio,

⁴ hiambola timongoli tadebo molotolo hilao to Eeya Allahu Taa̒ala limongoli donggo tumu-tumulo dilumutu botia.

⁵ Ngoa̒amila butoo̒ boito pongaajali mai lowatia ode limongoli debo odelo upilo malentai lo Eeya Allahu Taa̒ala laatia. Dungohe mao̒ ngoa̒amilalo boito tolipu u matuwoto wau potibiluloa̒ limongoli boito.

⁶ Pohutua mao̒ uito wolo tatapu wau molotolo hilao. Wonu timongoli mohutu mao̒ odito, yi otinepomu mowali moilaalo duo̒lo babaa-ngusawalo wewo. Wonu bolo timongolio moo̒dungohe pasali lo bubuu-too̒waalo boito, timongolio mamoloi̒ya, ‘Donggo boli tinepo wau toloi̒o bangusa uleidaa̒ boito!’

⁷ Bangusa leidaa̒ toonu tao̒ ila u odito modudulo wonu bolo palaluwolo debo odelo Eeya Allahu Taa̒alanto modudula to olanto? Tio molametai penu boli omolua wambao̒ ito mongiibode mei̒ tulungi mai to Olio.

⁸ Wau bangusa leidaa̒ toonu tao̒ bubuu-too̒waalo u odito aadili debo odelo bubuu-too̒waalo upilo ngaajali mai lowatia ode limongoli todulahee botie?

⁹ Poo̒tuota mao̒ wau eelai mola tio̒otutua, alihu ngotupa lo tutumulumu timongoli diila molipata wolo u masilakusia limongoli lohihilao. Wunggulia mao̒ ode walao̒ wau wombumu

¹⁰ pasali lo dulahee boito, tou̒ timongoli tilimihula totalu lo Eeya Allahu Taa̒ala limongoli to Hui̒dee Sinai. Tou̒ boito Tio lotahuda mai ode laatia, ‘Ambuwa mao̒ bangusa boito. Wau̒ ohilaa timongolio modungoheo̒ wolo umapo tunggulo-U̒ mai, alihu timongolio mobalaajali modungoheo̒ to Olau̒ ngotupa lo tutumulo, wau alihu timongolio mongaajali mao̒ mongo walai̒ mongolio u modungoheo̒ ola-U̒.’

¹¹ Wunggulia mao̒ ode mongo walai̒ mongoli woloolo mola timongoli lonao̒ mai wau tilimihula tobungo lohui̒dee u yilanggubei lopoloo̒ modio̒lomo debo odelo heengo mohulodu wau tululio lei̒-lei̒ita demola hulungo.

¹² Lapatao̒ Eeya lotahuda mai ode olemu lonto tulu wau timongoli loo̒dungohe sualaa-Lio, bo diila loo̒onto o-Lio todelomo modeli penuboli woloolo mola wambao̒.

¹³ Mola teto Tio lopo malalumu mai olemu wolo umusi pohutuo limongoli u moe̒elao̒ daantia u pilohutu-Lio mai woli mongoli. Mopuulo Palenta u matilula-Dio tobotu dulo pita boito musi pohutuo mao̒ limongoli.

¹⁴ Eeya lopoa̒hu mai olaatia mopoa̒ajali mao̒ olimongoli ngoa̒amila butoo̒ umusi dungohe mao̒ limongoli tolipu ude tuwoto wau potibiluloa̒ limongoli boito.”

Poe̒ela alihu diila mao̒ molubo ila wewo

¹⁵ “Eelai mao̒ tio̒otutua! Tou̒ Eeya lotahuda mai olimongoli lonto delomo tulu to Hui̒dee Sinai, timongoli diila loo̒onto wolo-wolo.

¹⁶ Oditolio poo̒dahai mao̒ alihu timongoli diila bolo moo̒tapu dusa sababu mohutu duo̒lo batangamu lohihilao bui̒ u tuboolo todelomo modeli penuboli woloolo mola wambai̒o, talolai̒ meaalo taabua,

^17-18 bulungi meaalo tola, binatangi hia̒lapa meaalo binatangi wewolio.

¹⁹ Diila mao̒ pohutu dusa sababu molubo wau motiwato tou̒ wolo u oontonga limongoli tohulungo: mato lodulahu, hulalo wau bibii-natangiyalo. Eeya Allahu Taa̒ala limongoli lopoluli mao̒ babaa-ngusawalo wewo helolubo uu̒u-pangowalo boito.

²⁰ Bo timongoli yito bangusa tapilo aahu-Lio lonto Masiri, tambati limongoli helo dutolaa ulaba-labaalo. Timongoli dilelo-Lio mai yilumualao̒ lonto lipu boito, alihu mowali bangusaa-Lio masaatia botie.

²¹ Bo Eeya Allahu Taa̒ala limongoli malo muluka to olaatia sababu timongoli, wau Tio lotadia deu̒ watia diila tamobalango Dutulaa Yordan u tumuwoto ode huta molomiodu u mawohi-Lio mai olimongoli.

²² Diilalo mohiheo timongoli mamobalango wau motibiluloa̒ tohuta u molomiode boito; bo watia diila moduduo̒, sababu watia maamate tewe.

²³ Eelai mao̒ tio̒otutua! Diila mao̒ lipata daantia u pilohutu lo EEYA Allahu Taa̒alamu wolimongoli. Dungohi mao̒ palentaa-Lio; sama-samaata diila mao̒ pohutua duo̒lo batangamu bui̒ todelomo modeli penuboli woloolo mola wambai̒o, u tuboolo,

²⁴ sababu Eeya Allahu Taa̒ala limongoli debo odelo tulu umoo̒ pobu. Tio diila mohuto potutuu-wauwola penu boli loolo.

²⁵ Wau olo wonu timongoli de malohiheo lotibiluloa̒ tolipu boito wau mailo walao̒ wau wombu, diila mao̒ pohutu dusa sababu mohutu mao̒ duo̒lo batangamu bui̒ todelomo modeli penuboli woloolo mola wambai̒o. Huhutu boito tuwaulio u moleeto tomato lo Eeya Allahu Taa̒ala limongoli wau mamoo̒ muluka Olio.

²⁶ Potala hulungo wau dunia todulahee botie mowali sakusi deu̒ wonu timongoli diila modungoheo̒ olaatia, timongoli mahua̒a mooli monto huta u potibiluloa̒ limongoli to ngotuali lo Dutulaa Yordan boito. Timongoli diila tamohiheo motibiluloa̒ mota teto; timongoli mapo binasaalo sama-samaata.

²⁷ Eeya mamopo bubuua̒yawa olimongoli towolota lo babaa-ngusawalo wewo wau bo ngoi̒di towolota limongoli tadebo tumu-tumulo.

²⁸ Mota teto timongoli mataa̒luku wau hulumati to ila-ila u pilohutu wolo uluu̒ lomanusia, ila-ila lonto ayu wau botu udiila mowali moo̒onto wau moo̒dungohu, diila mowali molamela meaalo diila moo̒obo.

²⁹ Lapatao̒ timongoli mamololohe to Eeya Allahu Taa̒ala limongoli, wau wonu timongoli mololoheo̒ o-Lio wolo lealeaatu lohilaa limongoli, timongoli mamoo̒ dungga o-Lio.

³⁰ Wonu bolo timongoli odungga lo ngoa̒amila baala boito wau timongoli todelomo u suukali, yi timongoli mamuli mohualinga ode Eeya Allahu Taa̒ala limongoli wau modungoheo̒ o-Lio.

³¹ Eeya Allahu Taa̒ala limongoli yito Allahu Taa̒ala talaba-labaalo odehu hilao. Tio diila tamololaa mao̒ meaalo mopobinasa olimongoli, meaalo molipata daantia u pilohutu-Lio lohihilao wolo loluuhuru limongoli.

³² Tuleteyalo masa uilalu mola, lohiheo daa̒ tou̒ dipo-dipolulio timongoli pilotutu mai, tumulalo monto dulahee tou̒ Allahu Taa̒ala lopowali mao̒ manusia todunia botie. Lolohelo to ngoilanggubu dunia. Wolo sua̒li debo odelo polutui̒o lewe helowali tou̒ dipo-dipolulio mai? Wolo tingga woluo taa u loo̒dungohe pasali u lotoduo mai debo odelo utie?

³³ Wolo tingga woluo bangusa tadebo tumu-tumulo lapatao̒ lodungohe ila tuwau helo bisala ode limongolio lonto tulu, debo odelo u ilolaasawa limongoli?

³⁴ Wolo tingga woluo ila tuwau u buheli mohama mao̒ bangusa tuwau monto babaa-ngusawalo tawoluo tulusi mopowali mao̒ olimongolio umatilio lohihilao, debo odelo u pilohutu lo Eeya Allahu Taa̒ala limongoli ode limongoli to Masiri? Timongoli loo̒onto lohihilao woloolo mola Allahu Taa̒ala wolo olootolo uleidaa̒ lopodungga mai baala wau popaatea, helo kalaja totoonulalo moo̒linggolabe wau helohutu susuu-aliyaalo moo̒tihela hapato.

³⁵ Ngoa̒amila boito pilobilohei lo Eeya ode limongoli u mopobukuti mao̒ deu̒ bo Eeya boito Allahu Taa̒ala, wau diaaluo taweewo.

³⁶ Lonto hulungo Tio lopo dungohei sualaa-Lio to olimongoli u longaajali olimongoli; todunia botie Tio malo pobiloheo̒ tulu-Lio upolu-polutuo̒, lonto tulu boito Tio helo tahuda mai olimongoli.

³⁷ Sababu Tio momonu loluuhuru limongoli, yi timongoli matilulao-Tio; wolo kawasaa-Lio uleidaa̒, timongoli madilelo-Lio yilumualao̒ lonto Masiri.

³⁸ Babaa-ngusawalo talebe udaa̒ wau lebe molotolo pilopolahi-Lio lonto talu limongoli, wau lodepita olimongoli ode lipu limongolio uilohi-Lio olimongoli, lipu botia mowali miliki limongoli.

³⁹ Sababu uito pototaalo lou̒ tau todulahee botie wau diila mao̒ lipata: Eeya tatuwa-tuwaulo Allahu Taa̒ala tohulungo wau todunia; diaaluo taweewo.

⁴⁰ Dungohi mao̒ ngoa̒amila butoo̒ uwohi mai lowatia todulahee botie, yi timongoli wau wali mola limongoli maa aamani sontosa wau maa̒amulu wau tulusi mola tumumulo tolipu uwohi mai lo Eeya Allahu Taa̒ala limongoli mowali miliki limongoli u ohiheo-hiheolo mao̒.”

Kokoo-tawaalo potiduo̒lalo to ambahu tiimuru lo Dutulaa Yordan

⁴¹ Lapatao̒ tei Musa lolunu mao̒ totolu kota to ambahu tiimuru lo Dutulaa Yordan

⁴² lowali kota potiduo̒lalo, tambati lotaa mowali mopoa̒ahu batanga wonu tio wolo diila sangaja malomate tau yila-yilateelo mao̒ tadiila musulio. Tio mowali mopolahi batanga ode tala tuwau lokota boito alihu diila pateelio mate-mateelo mao̒ olo.

⁴³ Ode suku Rubeni pilopo dapato kota Bejer todatahu lengge-lengge tohuta luasi udelita; ode suku Gad kota lo Ramot tomadala Gilead, wau ode suku tau lei Manasye kota Golan tomadala lo Basan.

Bangusa lo Isirai̒lu yilohia Butoo̒ lo Allahu Taa̒ala

⁴⁴ Lapatao̒ tei Musa longohi mao̒ bubuu-too̒waalo wau wuwuu-uduwaalo Allahu Taa̒ala ode bangusa lo Isirai̒lu.

^45-46 Sua̒li boito pilohutulio lapatao̒ timongolio yilumualai lonto Masiri wau woluo to lumbaya ambahu tiimuru lo Dutulaa Yordan, tataalua wolo kota Bet-Peor. Madala boito bakasi madala lei Sihon, olongia taulo Amori, tamuloololio mai pare-pareenta to kota Hesybon. Tei Musa wau bangusa lo Isirai̒lu lopoo̒laaheo̒ olio tou̒ timongolio yilumualai lonto Masiri.

⁴⁷ Timongolio lotibiluloa̒ tohuta li Olongia Sihon boito, wau olo tohuta li Olongia Og lonto Basan, olongia ngota lo Amori uwewo tabilu-biluloa̒ to ambahu tiimuru lo Dutulaa Yordan.

⁴⁸ Huta boito bua̒-bua̒de mola lonto kota lo Aroer tobiihu Dutulaa Arnon, tulusi ode tilayo demola Hui̒dee Siryon, deu̒yito-yito Hui̒dee Hermon,

⁴⁹ wau ngoilanggubu madala to ambahu tiimuru lo Dutulaa Yordan ode huliaalio demola Lau Tenga tobungo lo Hui̒dee Pisga.