TINGULI 32 - KITABI HABARI MOPIOHE

¹ “Dungohilo mai, wuu hulungo, wau̒ ohilaa mobisala; wuu dunia, polaalao̒ bulonga!

² Hinta pongaajaliu̒ motuhuta debo odelo didi, wau loloo-iyaau̒ humeheto debo odelo wambulo, debo odelo didi hipele-pelea toitaato huo̒yoto, wau didi moo̒ohuu̒ toitaato pipii-lomulowalo.

³ Wau̒ mamomuji mola tanggulo Eeya. Pohabariyalo odudaa̒ lo Allahu Taa̒alanto!

⁴ Eeya Tamoo-duulua olemu tamolotolo boli buheli, ilomata-Lio ngoa̒amilalo wimu-wimumuto, wau ngoa̒amila dala-Lio aadili. Allahu Taa̒ala limongoli tatapu wau molotolo hilao, diaaluo udiila juujulu to Olio, Tio hemohutu mai u mopiohe wau otutu.

⁵ Bo timongoli yito bangusa tadiila tatapu wau molotolo hilao, wau diilalo patuti mowali umati-Lio, bangusa tapolu-polu lou̒ diila juujulu wau dusa.

⁶ Wolo mao̒dito timongoli momaalasi opopiohu Eeya, wuu tau-tauwalo hihuulode wau diila o aakali? Diila maa Tio ti Paapamu, talopowali olemu, tahe lopowali olimongoli bangusa tuwau?

⁷ Eelailo mola jamani muloololio mai, poo̒tuota mao̒ jamani lo hihii-laidewalo u lopaluta mola. Wintuwaalo tomongo dulaa̒mu, alihu timongolio mopoo̒taa mai olemu.

⁸ Tou̒ Taa Laba-labaalo molanggato lolayadeo̒ huta, timii̒du bangusa tilantu mao̒ madalalio wolo ila tuwau odelo tamotolo kawasa.

⁹ Bo wali mai lei Yako botie tilulaoto Eeya duo̒lo batanga-Lio lohihilao.

¹⁰ Tio loo̒dungga olimongolio donggo hinao̒wa ode utoonulalo mao̒ totambati u moliilo tohuta luasi udiila tilolopani. Lapatao̒ Tio loduo̒la wau lolaalao̒ olimongolio wau helodaaha olimongolio debo odelo milikii-Lio.

¹¹ Debo odelo bulia uhelo poo̒laatao̒ walai̒o tumomboto yilau̒upio to polipii̒o u oa̒a-oa̒abu wau biloowolio toitaato popoo-lipii̒o,

¹² odieelo mola Eeya lohihilao lodelo umati-Lio, diaaluo ila deli wo-Lio.

¹³ Tio helohutu mai olimongolio u mongawasa to huhuu-ideyaalo; timongolio molamela tilapulo hahaa-laboluwalo wau mongilu hula lotiia̒ udiila taataala monto huludu botu. Timongolio loo̒tapu winulo lonto bungo lo ayu jaitun u lobutu mai lonto huta u obotu.

¹⁴ Sapi wau batade himba limongolio mongohi tilapulo dadaata susu; bibiahi mongolio laba-labaalo omutu, pale wau taluhu angguru limongolio laba-labaalo mopiohu.

¹⁵ Umati lo Eeya lowali kaya, bo yinao momalakala, timongolio hiliingohe, hibutuhe lou̒ aalo. Lapatao̒ timongolio lololaa mao̒ Allahu Taa̒ala, Talopowali mai olio wau diila mololimo Tamoo-poa̒ahua olio tamolotolo boli buheli.

¹⁶ Timongolio hemolubo balaahala, tilinggula Eeya lohiihia, omulukaa-Lio lobutu sababu ololeeto boito.

¹⁷ Timongolio helo podewo bake ode roroo-huwaalo moleeto udiila Allahu Taa̒ala, ode ila-ila udiila otaawa limongolio, ila-ila bohu udiila oohe lo loluuhuru limongolio.

¹⁸ Timongolio helo malonga Tamoo-poa̒ahua olimongolio tamolotolo boli buheli, lolipataa Allahu Taa̒ala talongohi tutumulo.

¹⁹ Loo̒onto mai sua̒li boito, Eeya malo muluka, wau diila lololimo mongo wala-I̒o.

²⁰ Tahudaa-Lio mao̒, ‘Wau̒ diilalo mohuto motulungi mai olimongolio; penu boli oontonga-U̒ woloolo mola pulitio mao̒ limongolio. Sababu bangusa boito baa̒ngiyolo wau sama-samaata diila tatapu wau molotolo hilao.

²¹ Timongolio helohutu ola-U̒ lohiihia to udiila Allahu Taa̒ala, wau helo muluka tobui̒ lo balaahala limongolio. Yi pilohutu-U̒ umati-U̒ mohiihia to udiila bangusa, wau moingo tobangusa taa̒balolo.

²² Omulukaa-U̒ mamo hintalabu debo odelo tulu u momobu demola dunia lotaa mate. Tulu boito momobu dunia wau totoonulalo tilapulio, wau huhuu-ideyaalo demola wawaa-atiyoolo mao̒.

²³ Mololalaaita podungga-U̒ mai baala, Polentadu-U̒ ngoa̒amila panaa-U̒ ode limongolio.

²⁴ Timongolio maamate sababu polipitolo wau polangolo, wau sababu ngongoto u moo̒tihela hapato. Huliya-U̒ mao̒ timongolio dangapo lo binatangi mongantau, wau topango lotulidu obisa.

²⁵ Popaatea modelo mautu to dadaa-lalaalo; moo̒tihela hapato meidungga ode tau-tauwala tobele. Taa muda wau tadulahu humula mapo binasaalo, wau olo walao̒ unge wau taa umulu panggola.

²⁶ Wau̒ ohilaa mopo loloopu olimongolio sama-samaata, alihu timongolio diilalo o eela.

²⁷ Bo wau̒ diila motohilaa musu lo Isirai̒lu mopou̒daa̒ hilao; diila bolo timongolio tala molantobu wau moloi̒ya deu̒ timongolio mopoo̒laaheo̒ umati-U̒,’ lebe-lebe pomao̒ Wau̒lo talohutu mai uito.

²⁸ Isirai̒lu bangusa tuwau tadiila ohuhaama; pongotota diaaluo toli mongolio.

²⁹ Humayaalio timongolio molinepo, timongolio mamongalati, wau momikiilangi mola omomooli limongolio.

³⁰ Woloolo mola ngotaalio mowali mohilapita tangolihu lota, wau duulota mohilapita tamopulu lihu lota? Eeya, Allahu Taa̒ala limongolio, malo potali olimongolio; timongolio matolaa lo Allahu Taa̒ala tamolotolo boli buheli.

³¹ Musu lo Isirai̒lu motota deu̒ tamoo-duo̒lawa olimongolio diila debo odelo Allahu Taa̒ala tamoo-duo̒lawa Isirai̒lu.

³² Sababu timongolio moleeto debo odelo Sodom wau Gomora, debo odelo bungo lo angguru u mopaa̒ato wau opeedi hungolio.

³³ Taluhu angguru limongolio yito peedi lotulidu u obisa.

³⁴ Eeya moe̒elai huhutu lomusu umati-Lio wau mamo hukuumani olimongolio to wakutuulio.

³⁵ Eeya mamolontuli wau mohukuumani olimongolio, wau diilalo mohiheo timongolio modehu wau binasa; saaa̒ti obobinasa limongolio hua̒a meidungga.

³⁶ Eeya mamo poa̒ahu mai umati-Lio wau momonu mongo wato-Lio, wonu Tio moo̒onto olimongolio diila olotolo wau mai̒lo pulita lo lotolo.

³⁷ Yi Eeya mamohintu to umati-Lio, ‘Tou̒toonu ila-ila molotolo u hepomangga limongoli?’

³⁸ Timongolio molamela tabo u podewo limongoli, wau mongilu taluhu angguru u pobake limongoli. Ahuliilo timongolio monao̒ mai motulungi olimongoli, hulii mao̒ timongolio mowali tamoo-duo̒lawa olimongoli.

³⁹ Bilohilo, Wau̒ Allahu Taa̒ala Taa Tuwa-tuwaulo, diaaluo Allahu Taa̒ala ngopohia Wau̒. Wau̒ momate-mateelo mao̒ wau mopotumulo, momali wau mopoo̒luli mao̒. Wonu Wau̒ mopohutu mai, diaaluo penu boli ngotaa mao̒ tamowali moluwali.

⁴⁰ Domi Wau̒ lohihilao, Allahu Taa̒ala tatumu-tumulo, bintao̒o-U̒ uluu̒u-U̒ wau motadia:

⁴¹ Wau̒ mamo dumbata wamilu-U̒ u molilingga, wau moponao̒ polo hukuumani. Tontulio-U̒ ngoa̒amila tuwali-U̒.

⁴² Papaana-U̒ malomuwa loduhu limongolio; ngoa̒amila tamo teehengi ola-U̒ patee-U̒ mate-mateelo mao̒ wolo wamilu-U̒. Diila poluli-U̒ penu boli tatoonu tamo luwali ola-U̒; tahi tahangia wau tahipalia olo musi mate olo.

⁴³ Wuu babaa-ngusawalo, pujiaalo umati lo Eeya, sababu Eeya mohukuumani ngoa̒amila tamomate-mateelo mao̒ olimongolio. Tio momalasi niyati to musu-Lio bo mongambungu mao̒ dusa lo umati-Lio.”

⁴⁴ Tei Musa wolei Yosua walae̒e Nun helo lapali mao̒ lahu boito, tilinggula ngoilanggubu bangusa lo Isirai̒lu loo̒dungoheo̒.

Tei Musa helongohi popoo-tuhatawalo pulitio

⁴⁵ Tou̒ yilapato lopo tunggulao̒ pongaajali lo Eeya ode bangusa lo Isirai̒lu,

⁴⁶ tei Musa loloi̒ya mao̒, “Poo̒tuotalo ngoa̒amila palenta uilohi mai lowatia ode limongoli todulahee botie. Pongaajalia mao̒ tomongo walai̒ mongoli, alihu timongolio wolo tatapu wau molotolo hilao moponao̒ ngoa̒amila butoo̒ lo Eeya.

⁴⁷ Pongaajali boito diila bo loi̒ya toongi, bo ode tutumuli mongoli. Dungohi mao̒ ngoa̒amila palenta boito, alihu humayao̒ umulu limongoli tolipu udiilalo mohiheo potibiluloa̒ limongoli to ngotuali lo Dutulaa Yordan.”

⁴⁸ Todulahee boito olo Eeya lotahuda odelei Musa,

⁴⁹ “Ponao̒lo mola ode hihui̒-hui̒dea lo Abarim tolipu lo Moab to ngotuali lokota Yerikho. Lapatao̒ potao̒odulo mola ode Hui̒dee Nebo wau bilohelo mota huta lo Kanaa̒n udiilalo mohiheo wuduwo-U̒ mai ode bangusa lo Isirai̒lu.

⁵⁰ Yio̒ maamate toitaato hui̒dee boito, debo odelo tei Haruna wutatumu yilate to Hui̒dee Hor.

⁵¹ Timongoli duulota diila tatapu wau molotolo hilao to ola-U̒ wau diila mohulumati ola-U̒ totalu bangusa lo Isirai̒lu tou̒ timongoli mola tobutu lotaluhu Meriba, totili lokota Kades, tohuta luasi udelita lo Sin.

⁵² Sababu uito yio̒ diila mowali tumuwoto ode lipu u wohi-U̒ mao̒ ode bangusa lo Isirai̒lu; yio̒ bo mowali momiloheo̒ monto u molamingo.”