TINGULI 31 - KITABI HABARI MOPIOHE

Tei Yosua lowali pilopo buulota wolei Musa

¹ Tei Musa luli lobisala ode bangusa lo Isirai̒lu,

² ualio mao̒, “Botia umulu lowatia mangohetuto dulo pulu lotaunu wau watia diilalo mambo mowali tau̒wa limongoli. Ngopohia leeto Eeya malo tahuda mai deu̒ watia diila mowali mobalango Dutulaa Yordan.

³ Eeya Allahu Taa̒ala limongoli lohihilao mamonao̒ totalu limongoli wau mopobinasa babaa-ngusawalo tahi biluloa̒wa mota teto, tilinggula timongoli moo̒ tibiluloa̒a tohuta limongolio. Tei Yosua mamowali tau̒wa limongoli, debo odelo u pilotahuda mai lo Eeya.

⁴ Eeya mamopo binasa babaa-ngusawalo boito, debo odelo Tio helopo olaaheo̒ olei Sihon wolei Og, olongia taulo Amori, wau helo ngaantulu lipu limongolio.

⁵ Eeya mamongohi olimongoli u moo̒ohaama toli mongolio, lapatao̒ timongolio musi pohutuo mao̒ limongoli tuhata debo odelo uiloi̒ya mai lowatia ode limongoli.

⁶ Mamusi timongoli ohilaa molotolo wau buheli! Diila mao̒ oohe toli mongolio, sababu Eeya Allahu Taa̒ala limongoli lohihilao tamaa motulungi mai olimongoli. Tio diila tamopo kikiio̒ hilao meaalo mololaa mao̒ olimongoli.”

⁷ Lapatao̒ tei Musa malo tiangai olei Yosua wau totalu lo ngoilanggubu bangusa lo Isirai̒lu tio loloi̒ya mao̒ olio, “Mamusi yio̒ molotolo hilao wau buheli, Yosua! Yio̒lo tamamodelo bangusa botie u motibiluloa̒ tolipu u pilodanti mai lo Eeya odeli nenemoya limongolio.

⁸ Eeya lohihilao tamodelo wau motulungi mai olemu. Tio diila tamopo kikiio̒ hilao meaalo mololaa mao̒ olemu. Sababu uito diila mao̒ oohe meaalo molawalo.”

Butoo̒ lo Eeya musi pobacaalo timii̒du pitu lotaunu mola pee̒enta

⁹ Lapatao̒ tei Musa loluladeo̒ butoo̒ lo Eeya Allahu Taa̒ala wau yilohilio ode mongo iimamu lo Lewi tatiluugasia u mongulusi Bulua Daantia, wau ode mongo tau̒wa lo Isirai̒lu.

¹⁰ Tio lomalentao̒ olimongolio, “To motii̒du pulito taunu u optulio, todelomo taunu polulutalo biloli to potihunggu lo Wombohe Duungo,

¹¹ timongoli musi mopobaca mao̒ bubuu-too̒waalo botie wolo suala u moo̒ohuu̒ totau-tauwalo Isirai̒lu tamonao̒ mai molubo Eeya Allahu Taa̒ala limongoli totambati u tilulao-Tio mao̒.

¹² Ahuliilo ngoa̒amila talolai̒, taabua wau taau̒ kekeei̒ boli tau deli tahi biluloa̒wa to kokoo-tawaalo limongoli motia̒mbu modungohe u pobacaalo boito, alihu timongolio mopoo̒olato mohulumati to Eeya Allahu Taa̒ala limongoli boli tatapu wau molotolo hilao modungohe papaa-lentaa-Lio.

¹³ Wolo dudelo boito mongo walai̒ mongoli tadiipo pee̒nta mao̒ loo̒dungohe pasali butoo̒ lo Eeya Allahu Taa̒ala limongoli mowali modungoheo̒ wau mopoo̒olato mohulumati to Eeya ngotilonggadu timongolio tumu-tumula tolipu udiilalo mohiheo potibiluloa̒ limongoli to ngotuali lo Dutulaa Yordan.”

Papaa-lentawalo pulitio uilohi mai lo Eeya odelei Musa

¹⁴ Lapatao̒ Eeya lotahuda mai odelei Musa, “Tutumulumu diilalo mohiheo. Oditolio, tiangaalo mai tei Yosua wau delowa mota tio ode Kema-U̒, alihu Wau̒ mowali mongohi popoo-tuhatawalo to olio.” Yi malonao̒ tei Musa wolei Yosua ode Kema lo Eeya,

¹⁵ wau Eeya malo pobilohei batanga ode limongolio todelomo patoo̒ heengo totili huhebu lo Kema.

¹⁶ Tahuda mai lo Eeya odelei Musa, “Opopatemu diilalo mohiheo. Lapatio mao̒ yio̒ monao̒, bangusa lo Isirai̒lu diilalo tatapu wau molotolo hilao to ola-U̒ wau mamomaahe daantia u pilohutu-U̒ woli mongolio. Timongolio mamololaa mao̒ ola-U̒ mota molubo ila-ila u hetuboolo tolipu udiilalo mohiheo potuwota limongolio.

¹⁷ Wonu uito motoduo mai, omulukaa-U̒ mamo walihuhu toli mongolio. Timongolio matolaa-U̒ wau pobinasaa-U̒. Dadaata baala moo̒tihela hapato mamolemba olimongolio lapatao̒ timongolio mamongalati mao̒ deu̒ ngoa̒amila boito motoduo sababu Wau̒, Allahu Taa̒ala limongolio, diilalo pee̒-pee̒enta woli mongolio.

¹⁸ Tou̒ boito Wau̒ diila mohuto motulungi olimongolio, sababu timongolio malolubo ila-ila wewo wau helohutu u moleeto.

¹⁹ Botia tuladeelo lahu botie wau poo̒olata mao̒ to bangusa lo Isirai̒lu odelo ososakusi ode limongolio.

²⁰ Timongolio madeloo-U̒ ode lipu ukaya wau molomiodu, debo odelo u pilodanti-U̒ odeli nenemoya limongolio. Mota teto timongolio matumumulo lou̒ sanangi wau mamoo̒tapu ngoa̒amila ua̒alo u palaluo limongolio. Bo todulahee momooli timongolio mamo palingo wau molubo ila-ila wewo. Timongolio mamo potouli ola-U̒ wau momaahe daantia-U̒,

²¹ wau dadaata baala tilahuo̒ ulaba-labaalo mamei dungga mao̒ tolimongolio. Bo lahu botie madebo polahuwola wau pomake odelo ososakusi ode limongolio. Tumbao̒ botia tou̒ timongolio diipo deloo-U̒ mota ode lipu u pilodanti-U̒ mai, otaawa-U̒ dalalo pikiilangi limongolio.”

²² Todulahee boito olo tei Musa loluladeeo̒ lahu boito, lapatao̒ helo poa̒ajali mao̒ to bangusa lo Isirai̒lu.

²³ Lapatao̒ Eeya lotahuda odelei Yosua, walae̒e Nun, tahudaa-Lio, “Mamusi yio̒ molotolo hilao wau buheli, Yosua! Yio̒ mamodelo bangusa lo Isirai̒lu tumuwoto ode lipu u pilodanti-U̒ mai olimongolio, wau Wau̒ mamo tulungi olimongolio.”

²⁴ Lapatao̒ tei Musa loluladeeo̒ butoo̒ lo Allahu Taa̒ala todelomo buku tuwau. Tio loluladeeo̒ wolo ulintapo tumulalo mai monto bohulio demola pulitio.

²⁵ Tou̒ mailapato, tio loloi̒ya mao̒ ode mongo iimamu lo Lewi tatiluugasi u mongulusi Bulua Daantia,

²⁶ “Hamaawa mao̒ buku Butoo̒ lo Allahu Taa̒ala botie, wau podutua mao̒ to ambahu Bulua Daantia lo Eeya Allahu Taa̒ala limongoli, alihu debo woluo mota teto odelo ososakusi to bangusa boito.

²⁷ Otaawa lowatia timongolio baa̒ngiyolo daa̒ wau ohilaa momalakala. Penu boli watia donggo tumu-tumula olo timongolio hemo malakala to Eeya; tidiyolo de, wonu watia mailate mao̒!

²⁸ Botia ahuliilo ngoa̒amila tau̒wa bangusa lo Isirai̒lu wau mongo polowila motia̒mbu mai totalu lowatia, alihu watia moo̒ potunggulao̒ susuu-aliyaalo botie ode limongolio. Hulungo wau dunia tiango mai lowatia odelo sakusi toli mongoli.

²⁹ Otaawa lowatia deu̒ lapatao̒ watia mate mao̒, tau-tauwalo boito mamowali moleeto wau diila mololimo wolo u mapilo ngaajali mao̒ lowatia ode limongolio. Wau de timongolio odungga lobaala, sababu lopomuluka to Eeya helohutu wolo u dilini-Lio.”

Lahu lei Musa

³⁰ Lapatao̒ tei Musa helo lapali mao̒ lahu botie tunggula yilapato sambela ngoilanggubu bangusa lo Isirai̒lu hidungohe.