TINGULI 30 - KITABI HABARI MOPIOHE

Balakati lo Eeya to umati-Lio tamolilihu

¹ “Botia timongoli mowali molulaotao̒ towolota lobalakati wau laa̒anati debo odelo u tilombangai lowatia ode limongoli. Wonu timongoli maloo̒laasa ngoa̒amila polodutolo boito wau tumumula towolota lo babaa-ngusawalo deli tambati limongoli pilopo bubuu-ayaawa lo Eeya Allahu Taa̒ala limongoli, yi timongoli mamoe̒ela mola to tulaoto uilohi mai lowatia olimongoli.

² Wonu timongoli wau wali mai limongoli mohuto muli mohualinga ode Eeya Allahu Taa̒ala limongoli, wau wolo lealeaatu lohilao modungohe papaa-lentaa-Lio uwohi mai lowatia todulahee botie,

³ yi Eeya Allahu Taa̒ala limongoli mamomonu olimongoli. Timongoli mamuli deloo-Lio monto babaa-ngusawalo tou̒toonu timongoli pilopo bubuu-ayaawa, wau muli pomaa̒muluo-Lio.

⁴ Eleponu timongoli mopulepe penu boli ode utoonulalo mao̒ to ngoilanggubu dunia, Eeya Allahu Taa̒ala limongoli mamongambu olimongoli wau muli modelo olimongoli.

⁵ Yi timongoli mowali muli motolo miliki huta u muloololio mai pilotibiluloa̒ linene moya limongoli. Wau timongoli mapohutuo-Lio lebe mao̒ maa̒amulu, wau jumulaa limongoli lebe mola dadaata daa̒ wolo loluuhuru limongoli.

⁶ Timongoli wau wali mola limongoli mawohiya-Lio hilaa u moduduo̒, tilinggula timongoli motolia̒nga to Eeya Allahu Taa̒ala limongoli wolo lealeaatu lohilao wau mowali tulusi motibiluloa̒ tolipu boito.

⁷ Ngoa̒amila laa̒anati boito mapodehuo-Lio mai ode mumuu-suuwaalo limongoli tamolonua̒ wau hemodeehe olimongoli.

⁸ Timongoli mamuli modungohe to Eeya wau moponao̒ ngoa̒amila palentaa-Lio uilohi mai lowatia todulahee botie.

⁹ Eeya Allahu Taa̒ala limongoli mamohutu mai ngoa̒amila kelakela limongoli otilapulo; timongoli maa odadaata walao̒ wau dadaata bibiahu; hahaa-laboluwalo limongoli mamongohi mai tilapulo u dadaata daa̒. Eeya wolo sanangi lohilao mopowali olimongoli maa̒amulu, debo odelo Tio olo sanangi helopo maa̒amulu toli nenemoya limongoli.

¹⁰ Bo timongoli musi modungohe to Eeya Allahu Taa̒ala limongoli wau moponao̒ ngoa̒amila buto-I̒o utula-tuladee tobuku botie, buku Butoo̒ lo Eeya. Timongoli musi muli mohualingao̒ to Olio wolo lealeaatu lohilaa limongoli.

¹¹ Palenta uilohi mai lowatia ode limongoli botie diila boti mototolo olimongoli wau diila boti molaminga olo.

¹² Tambatilio diila tohulungo, tilinggula timongoli mohintu, ‘Tatoonu tamobotula mola odito u mohama mai ode olanto, alihu ito mowali modungohe wau moponao̒ mao̒?’

¹³ Tambatilio diila olo to ngotuali lodeheto, tilinggula timongoli mamohintu, ‘Tatoonu tao̒de ngotuali lodeheto mota mahama mai ode olanto, alihu ito mowali modungohe wau moponao̒ mao̒?’

¹⁴ Diila mao̒ pohintu odito, sababu palenta boito membibide daa̒ toli mongoli. Maa ilotaawa limongoli wau timongoli mowali molapali mao̒ wolo hahaapali, oditolio timongoli bolo moponao̒ wambai̒o.

¹⁵ Todulahee botie timongoli mowali molulaotao̒ towolota u mopiohu wau u moleeto, towolota tutumulo wau mate.

¹⁶ Todulahee botie wau̒ momalentai olimongoli u motolia̒nga to Eeya Allahu Taa̒ala limongoli wau modungohe to Olio boli moponao̒ mao̒ ngoa̒amila butoo̒ wau palentaa-Lio alihu timongoli maa̒amulu wau mowali bangusa uleidaa̒. Eeya Allahu Taa̒ala limongoli mamo balakati olimongoli tolipu udiilalo mohiheo potibiluloa̒ limongoli.

¹⁷ Bo wonu timongoli diila taaa̒ti wau diila mohuto modungohe, wau bo mopoluli mao̒ batanga limongoli polapalolio u molubo ila-ila wewo,

¹⁸ yi tantu timongoli pobinasaa-Lio, wau umulu limongoli diila tahumayaao̒ tolipu udiilalo mohiheo potibiluloa̒ limongoli. Eelai mao̒! Sua̒li boito mapiloo̒taa mai lowatia todulahee botie.

¹⁹ Botia timongoli mowali molulaotao̒ towolota tutumulo wau mate, towolota balakati lo Eeya wau laa̒anati-Lio. Hulungo wau dunia tiango mai lowatia mowali sakusi to putuusani limongoli. Tulaotilo tutumulo.

²⁰ Tolia̒ngilo Eeya Allahu Taa̒ala limongoli, podungohulo to Olio, wau tatapulo wau molotolo hilao to Olio. Yi timongoli wau wali mola limongoli matumumulo wau humayao̒ umulu tolipu u pilodanti lo Eeya odeli nenemoya limongoli, Abraham, Isihaka wau Yako.”