TINGULI 24 - KITABI HABARI MOPIOHE

Wuu̒du pasali lou̒ motalaki wau muli monika

¹ “Humaya mao̒ talolai̒ ngota monika wolo tadulahu ngota, wau lapatao̒ diilalo ilohilao olio sababu tio loo̒dungga hitua-tuawua u moo̒olita olio. Lapatao̒ talolai̒ boito mohudu mao̒ tuladu talaki to olio wau mopolaaheo̒ olio monto belelio.

² Lapatao̒ taabua boito monika wolo ngotaalio lo talolai̒ wewo.

³ Bo lapatio mao̒ dengolo mola wakutu talolai̒ boito diilalo mohuto to olio, tulusi mongohi mao̒ tuladu talaki to olio wau mopolaaheo̒ olio. Meaalo otanu olo dile tao̒luolio boito mate.

⁴ To delomo dulo sua̒li dile talolai tabohulio diilalo mowali monika wolo taabua boito; tio musi momiloheo̒ olio odelo taabua tamalo ponajisi. Wonu tio debo monika mao̒ olio, huhutu boito debo odelo mohina to Eeya Allahu Taa̒ala limongoli. Timongoli diila mowali mohutu dusa debo odelo leetio boito tolipu uilohi mai lo Eeya ode limongoli.”

Wuu̒du u hidala-dalaala

⁵ “Talolai̒ ngota taboheeli monika mao̒ diila mowali ahulalo tumuwoto suludadu wau monao̒ mopaatea meaalo mohutu mao̒ tilolahepalo tuugasi uwewolio. Tio musi lopatolo monto tuugasi ngotilonggadu ngotaunu mola u mongulusi mao̒ dileaalio wau mopo sanangi mao̒ hilaa lodilelio.

⁶ Wonu timongoli mopo bulotao̒ u hitua-tuawaua ode taawewo, diila mao̒ pohama botu odelo pongaku u pomake lotau boito u pohilingalo palelio. Lou̒ mohama botu boito, timongoli molambata pokaakasi upomake lo ngaalaa̒lio u pohumbuta mola tutumulo.

⁷ Taa u mopoteteo̒ taa ngobangusaalio tulusi mopohutu mao̒ olio odelo wato meaalo mopotali olio, musi hukuu-maniyolo mate. Lou̒ odito timongoli mopodiaa̒a ololeeto boito.

⁸ Wonu bolo woluo ngongoto lo alipo umoo̒ topotala, pohutua mao̒ wolo ulintapo wolo upilo malentai lomongo iimamu lo Lewi ode limongoli; dudui̒ mao̒ potuhata uilohi mai lowatia ode limongolio.

⁹ Eelai mola wolo u pilohutu mai lo Eeya Allahu Taa̒ala limongoli odeli Miriyama todelomo nonao̒ limongoli yilumualai lonto Masiri.

¹⁰ Wonu timongoli mopobuloto u hitua-tuawua ode timongotamu, diila mao̒ potuwota ode delomo belelio u mohama boo̒lio upilo ngakualio.

¹¹ Yimailo to bulemengio wau polulia mao̒ tio lohihilao tamodelo mai ode limongoli.

¹² Wonu tau boito mosikini, boo̒ boito diila mowali otongamu oo̒onua,

¹³ bo musi powalingolo ode olio timii̒du hui, alihu tio mowali mopomake mao̒ tou̒ motuluhu. Yi tio mamosukuru wau Eeya Allahu Taa̒ala limongoli mamo tuhatawa woli mongoli.

¹⁴ Diila mao̒ pohama pae̒eda ulaba-labaalo ode taa hewupaalo tamosikini wau ilodiaaluo, mopio taa ngobangusamu, meaalo tau deli tabilu-biluloa̒ totala tuwau lokota limongoli.

¹⁵ Timii̒du dulahu tou̒ diipo dulahee tumolopaa mota timongoli musi momayali mao̒ wupaalio tou̒ kalaja u dulahio tuwau boito; tio mohaalapu doi boito sababu tio palalu todoi boito. Wonu timongoli diila momayali mao̒ wupaalio, tio mamo ngiibode ode Eeya u mei̒ tulungi mai to olimongoli, wau timongoli poi̒laalo-Lio odusa.

¹⁶ Diila mao̒ hukuumania mate tomongo dulaa̒ sababu ololeeto u pilohutu lowalai̒o, wau diila mao̒ hukuumania mate towalao̒ sababu ololeeto u pilohutu lomongo dulaa̒lio. Ngota-ngota bo mowali hukuumaniyolo mate sababu ololeeto upilo hutulio lohihilao.

¹⁷ Diila mao̒ polambata haku lotau deli wau walao̒ tadidu otiilo otiyamo, wau diila mao̒ pohama pakeyangi ngotaalio lojanda u pongakuwalo.

¹⁸ Eelai mola deu̒ timongoli mapee̒enta lowali wato to Masiri wau yilopatai lo Eeya Allahu Taa̒ala limongoli; uitolo sababuulio watia longohi mai wuu̒du botie ode limongoli.

¹⁹ Wonu bolo timongoli mohimoa̒a tilapulo huta limongoli, diila mao̒ pohualinga mota mohama panggeyango pale uleitolaa. Pale boito musi poluli mao̒ ode tau deli, walao̒ tadidu otiilo otiyamo wau ode tahi jandawa, alihu timongoli balakatia lo Eeya Allahu Taa̒ala limongoli todelomo totoonulalo kelakela limongoli.

^20-21 Lapatio mao̒ timongoli pee̒entapo molipu hungo lo jaitun wau hungo lo angguru limongoli, diila mao̒ pohualinga u mohimoa̒ huhuu-ngowaalo uleitolaa. Uito musi poluli mao̒ limongoli ode tau deli, walao̒ tadidu otiilo otiyamo wau tahi jandawa.

²² Eelai mola deu̒ timongoli mapee̒enta lowali wato to Masiri; uitolo sababuulio watia longohi mai wuu̒du botie ode limongoli.