TINGULI 22 - KITABI HABARI MOPIOHE

¹ Wonu bolo sapi boito meaalo himba miliki lotaa ngobangusa limongoli lapalolo wau timongoli moo̒onto mao̒ binatangi boito, yi diila mao̒ potitihutu debo odelo diila motota, bo muli delowalo binatangi boito ode taa ohuu̒wolio.

² Wonu taa ohuu̒wolio molaminga belelio, meaalo diila otaawa limongoli tatoonu taa ohuu̒wolio, yi delowa mao̒ binatangi boito ode bele limongoli. Wonu bolo taa ohuu̒wolio monao̒ mai mololohe binatangi boito, wudua mao̒ olio.

³ Pohutua mao̒ odito olo wonu timongoli moo̒dungga kolodai tuwau, kaingi ngopata, meaalo penu boli wolo wambai̒o miliki lotaa ngobangusamu.

⁴ Wonu bolo kolodai tuwau meaalo sapi miliki lotaa ngobangusamu meibalata to dalalo, diila mao̒ potia̒akali deu̒ diila otaawa limongoli, bo tulungia mao̒ tio muli mopobongu mai binatangi boito.

⁵ Taabua diila mowali mohipake debo odelo talolai̒ wau talolai̒ diila mowali mohipake debo odelo taabua, sababu taa u mohutu odito olonuo̒ Eeya Allahu Taa̒ala limongoli.

⁶ Wonu timongoli moo̒dungga beelea tuwau lobulungi tobungo lo ayu meaalo tohuta wolo tiilo bulungi donggo hulohuloo̒ toitaato putitio meaalo pee̒-pee̒enta wolo mongo walai̒o, diila mao̒ hamawa tiilo bulungi boito.

⁷ Timongoli mowali mahama mao̒ mongo walao̒ bulungi boito, bo polulia mao̒ tiilolio tumomboto, alihu timongoli otutumulo hayahaya wau tumumulo maa̒amulu.

⁸ Wonu bolo timongoli momongu bele, timongoli musi mopohuli mao̒ bala palipalita tobiihu watopio. Yi timongoli diila tamomanta wonu woluo taa modehu monto watopo boito lapatao̒ mate.

⁹ Diila mao̒ pomulowa pilomulo wewo to ilengi lo angguru limongoli ngopophia bungo lo angguru. Wonu timongoli debo momulo olo, timongoli diila mowali mohama mao̒ tilapulo ilengi boito, mopio monto angguru, meaalo monto pilomulo wewolio.

¹⁰ Diila mao̒ pangeya sapi tuwau wau kolodai tuwau to popadeo̒ ngomato.

¹¹ Diila mao̒ pomake pakeyangi upilohutu monto lambuto binatangi u moa̒aluti wau lineni todelomo hewoola ngopita.

¹² Pohutua mao̒ rumbai-rumbai to opato huudu lo pakeyangi limongoli.”

Wuu̒du tomimbihu wumbuta lo talolai̒ wau taabua

¹³ “Humaya mao̒ ngotaalio lo talolai̒ monika wolo ngotaalio lo tadulahu, wau lapatao̒ tio diilalo ilohilao olio.

¹⁴ Tio musi mohutu mao̒ potuludu upaluti deu̒ dilelio boito diilalo tadulahu tou̒ timongolio lonika.

¹⁵ Todelomo sua̒li boito mongo dulaa̒ lotaabua boito musi mohama mao̒ kaingi lo buleintiti u obakasi duhulio, u mopo bukuti mao̒ deu̒ walai̒ mongolio tou̒ boito donggo tadulahu. Kaingi boito musi pobilohu mao̒ limongolio ode tahimuloa lokota to bubutoo̒.

¹⁶ Tiyamo lo tadulahu boito musi moloi̒ya mao̒ ode limongolio, ‘Mailudu mao̒ lowatia walao̒ watia ode tau botie lowali dilelio, bo botia tio diilalo ohilaa olio.

¹⁷ Tio lopotuludu wau loloi̒ya deu̒ dilelio diilalo tadulahu tou̒ timongolio lonika. Bo bukutiilio utie deu̒ walao̒ watia tou̒ boito donggo tadulahu. Poo̒tuoti mao̒ bakasi loduhu tokaingi bulaintitilio botie!’

¹⁸ Yi tahimuloa lokota musi motiangai talolai̒ boito wau momate olio.

¹⁹ Timongolio olo musi modinta olio wolo ngohetuto pita doi talaa̒ wau mohudu doi boito ode moluhengio, sababu tio malo poa̒ibu mao̒ batanga lo ngotaalio taabua lo Isirai̒lu. Donggo poli taabua boito musi debo mowali dilelio, wau diila mowali bua̒yaalo ngotupa lo tutumulio.

²⁰ Bo humaya mao̒ potuludu boito otutu wau diila obukuti deu̒ dilelio boito donggo tadulahu tou̒ lonika mao̒,

²¹ yi taabua boito musi deloolo ode huhebu bele lomongo dulaa̒lio. To tambati boito mongo lolai̒ monto kota boito musi momai̒ olio wolo botu tunggula mate. Taabua boito malohutu hitua-tuawua u loo̒olito to bangusanto sababu helo ulauwa wolo talolai̒ tou̒ diipo lonika ngotilonggadu tio bilu-biluloa̒ tobele liyamolio. Lou̒ mohukuumani mao̒ olio timongoli mopodiaa̒a ololeeto boito.

²² Wonu talolai̒ ngota odungga donggo uu̒ulauwa wolo dile lotaa wewo, yi duduulotalo musi hukuu-maniyolo mate. Lou̒ odito timongoli mopodiaa̒a ololeeto boito.

²³ Humaya mao̒ todelomo kota talolai̒ ngota odungga donggo uu̒ulauwa wolo tadulahu ngota tamao̒ tilantahu wolo taawewo.

²⁴ To delomo sua̒li boito timongolio musi deloolo ode bulemengo kota wau pai̒yola wolo botu tunggula mate. Tadulahu boito musi pateelo mate-mateelo mao̒ sababu tio diila longuatio̒ mei̒ tulungi, hiambola sua̒li boito lotoduo todelomo kota, tou̒toonu, wuwaatii̒o mowali o dungohe. Wau talolai̒ boito musi pateelo mate-mateelo mao̒ sababu tio malo ulauwa wolo tadulahu tamao̒ tilantahu. Lou̒ mohukuumani mao̒ duduulotalo, timongoli mopodiaa̒a ololeeto boito.

²⁵ Bo wewo sua̒liilio wonu to halabolu ngotaalio talolai mopolokosa mao̒ taabua ngota tamao̒ tilantahu wolo taa wewo. To delomo sua̒li boito bo talolai̒ wambai̒o tamusi hukuu-maniyolo mate-mateelo mao̒.

²⁶ Tadulahu boito diila mowali pongola-pongolaa sababu tio diila helohutu hitua-tuawua udiila patuti pohukuu-maniyola mate olio. Sua̒li boito debo odelo sua̒li lo ngotaalio tamoluhu taa wewo wau momate olio mate-mateelo mao̒.

²⁷ Pomolo-kosawa boito lowali to halabolu, wau penu boli tadulahu boito monguatia̒ mei̒ tulungi, bo diaaluo taa u monao̒ mai motulungi olio.

²⁸ Humaya mao̒ talolai̒ ngota odungga tou̒ tio donggo hemo polokosa tadulahu ngota tadiipo otilantahu.

²⁹ To delomo sua̒li boito tio musi momayali mao̒ tonelo ngohalaga limo puulo pita doi talaa̒. Tadulahu boito musi mowali dilelio sababu tio mapilaa-kusaalio lou̒lauwa wau ngotilonggadu tutumulio tio diila mowali bua̒yaalo.

³⁰ Penu boli ngotaa mao̒ diila mowali mohina oliyamolio lou̒ motuluheo̒ wolo tala ngota lodile liyamolio.”