TINGULI 20 - KITABI HABARI MOPIOHE

Wuu̒du pasali lo popaatea

¹ “Wonu bolo timongoli mopaatea moluwali mumuu-suuwaalo limongoli, diila mao̒ oohe moo̒onto kaleta lo popaatea wau wadala limongolio u dadaata wau suludadu limongoli u jumulaalio mongilabotao̒ jumula limongoli. Eeya Allahu Taa̒ala limongoli talo lopatai olimongoli lonto Masiri, olo mamo tulungi olimongoli.

² Tou̒ diipo mopaatea, ngotaalio li iimamu musi momaju wau mobisala mao̒ olimongoli odie,

³ ‘Mongo wutato, dungohi mai! Todulahee botie timongoli momaju u mopaatea. Diila mao̒ oohe meaalo okikiio̒ lohilao meaalo molingu.

⁴ Eeya Allahu Taa̒ala limongoli mapee̒-pee̒enta woli mongoli u motulungi mai olimongoli, wau Tio mopoo̒ haama mao̒ olimongoli.’

⁵ Lapatao̒ mongo polowila musi mopo tunggulao̒ tataa-heyaalo botie ode limongoli, ‘Wolo woluo towolota limongoli taa u boheli lomongu bele, bo diipo lohutu upacala pongo saahalo? Wonu woluo, tio mowali mohualingolo. Sababu wonu tio opatea mate-mateelo mao̒ todelomo popaatea, yi taa wewo mamo tibiluloa̒ tobelelio.

⁶ Wolo woluo towolota limongoli taa u boheli lopomulo mao̒ ilengi lo anggurulio wau diipo ilohiango lolipu huhuu-ngowaalo anggurulio? Wonu woluo, tio mowali mohualingolo. Sababu wonu tio opatea mate-mateelo mao̒ todelomo popaatea, yi taawewo mamo lamitao̒ taluhu lo anggurului.

⁷ Wolo woluo towolota limongoli taa u otilantahu wau mamonika? Wonu woluo, tio mowali mohualingolo. Sababu wonu tio opatea mate-mateelo mao̒ todelomo popaatea, taawewo mamonika wolo tilantahio.’

⁸ Mongo polowila olo musi moloi̒ya utie ode limongoli, ‘Wolo woluo towolota limongoli taa molingu wau moohe? Wonu woluo, tio mowali mohualingolo, alihu tio diila mao̒ mongantulu sumangati lotaa wewo.’

⁹ Lapatao̒ mongo polowila lobisala mao̒ ode suludadu, musi tantuo mao̒ mongo tau̒wa duo̒lo timii̒du sua̒li otuwau.

¹⁰ Wonu bolo timongoli monao̒ mota moluhu kota tuwau, wohiyapo hiango meimulo ode ulipulio u mohudu mai batanga.

¹¹ Wonu timongolio momuo̒ huhuu-hebuwaalo hulubangi wau mohudu batanga, yi timongolio ngoa̒amila musi mowali mongo wato limongoli wau mohutu mao̒ kalaja pakusa ode limongoli.

¹² Bo wonu ulipu lokota boito diila mohuto mohudu batanga wau lebe motihilaa motuuhua, timongoli musi momala mao̒ kota boito.

¹³ Lapatao̒, wonu bolo Eeya Allahu Taa̒ala limongoli mopoluasi olimongoli mohama kota boito, timongoli musi momate mateelo mao̒ ngoilanggubu ulipulio mongo lolai̒.

¹⁴ Bo timongoli mowali mahama mao̒ kaumu mongobua, tau̒kekeei̒, bibiahu wau penu boli wolo wambai̒o uwoluo tokota boito. Ngoa̒amila halata upango lo mumuu-suuwaalo limongoli boito mowali pomake limongoli. Eeya Allahu Taa̒ala limongoli mohudu mai uito ode limongoli.

¹⁵ Odi-odieelo mola musi pohutuo mao̒ limongoli ode kokoo-tawaalo u molamingo wau lipu potibiluloa̒ limongoli.

¹⁶ Bo wonu kota boito woluo todelomo madala uilohi mai lo Eeya Allahu Taa̒ala limongoli ode limongoli, yi ngoilanggubu ulipulio musi pateelo mate-mateelo mao̒.

¹⁷ Debo odelo upilo malentai lo Eeya Allahu Taa̒ala limongoli, timongoli musi mopobinasa mao̒ tau-tauwalo Het, Amori, Kanaa̒n, Peris, Hewi wau Yebus.

¹⁸ Pateyaalo timongolio mate-mateelo mao̒, alihu timongolio diila moo̒ hutu olimongoli odusa to Eeya Allahu Taa̒ala limongoli wolo mongaajali olimongoli mohutu totoonulalo huhutu umoo̒ jijio̒ duo̒lo ila-ila limongolio.

¹⁹ Wonu bolo timongoli moluhu kota tuwau wau momala mao̒ duo̒lo wakutu u mohiheo, diila mao̒ poluwode bungo lo ayu hipomungoa mota teto. Tamela mao̒ hungolio, bo diila mao̒ antulua bungolio, sababu bubuu-ngowaalo ayu boito diila musu limongoli.

²⁰ Bubuu-ngowaalo ayu wewo mowali luwodu limongoli u pohutu bala duo̒lo pomalawalo tunggula kota boito malodehu.”