TINGULI 18 - KITABI HABARI MOPIOHE

Tayadu lomongo iimamu

¹ “Ngoilanggubu suku Lewi wohiyalo tuugasi iimamu, sababu uito diila mowali mololimo tayadu huta to Isirai̒lu. Timongolio musi tumumula monto dedee-wowaalo wau babaa-keyaalo wewolio u wohi mai lo Eeya.

² Timongolio diila mowali motolo miliki huta debo odelo suku wewolio, sababu Eeyaalo tayadu wariisani limongolio, debo odelo u pilodanti mai lo Eeya ode limongolio.

³ Wonu bolo tahingota-ngotaawa mopodewo bake losapi meaalo himba, yi bungolopa totalu, wale wau ombongo lo bibiahu boito musi wuduwolo ode mongo iimamu duo̒lo tayadi mongolio.

⁴ Bohulo tilapulo monto pale, taluhu angguru, winulo jaitun wau lambuto himba, olo duo̒lo tayadi mongolio.

⁵ Monto ngoa̒amila suku lo Isirai̒lu, Eeya Allahu Taa̒ala limongoli malo lulaotao̒ suku Lewi mowali iimau u ohiheo-hiheolo mao̒.

⁶ Wonu bolo ngotaalio lo Lewi taa̒saliilio mai penu boli monto kota toonu to Isirai̒lu monao̒ mai ode tambati u tilulaoto Eeya wau ohilaa motibiluloa̒ teto,

⁷ tio mowali momaya to Eeya Allahu Taa̒alaalio odelo iimamu debo odelo tau-tauwalo Lewi wewo tahi otuugasia totambati boito.

⁸ Tio musi mololimo mao̒ ua̒alo u tutuuwauwa daatalio debo odelo mongo iimamu wewo; wolo u motapulio mai monto ngaalaa̒lio, olo ode olio.”

Huhuu-hutuwaalo udinidini

⁹ “Wonu bolo timongoli matilumuwoto ode lipu uilohi mai lo Eeya Allahu Taa̒ala limongoli ode limongoli, diila mao̒ poduduo̒ ololeeto debo odelo hepohutuo lo babaa-ngusawalo tawoluo mota teto.

¹⁰ Towolota limongoli diila mao̒ woluo tamo podewo lomongo walai̒o odelo bake yilalango. Wau diaaluo penu boli ngotaa mao̒ mowali tamoo-laamalia, mololohe tutuuotalo, momake ii̒i-simuwaalo meaalo

¹¹ ilimi siihiri, meaalo mowuumbuta wolo roroo-huwaalo lotaa mate.

¹² Taa u hipohutua huhuu-hutuwaalo u moleeto boito oloonuo̒ Eeya Allahu Taa̒ala limongoli, wau uitolo sababuulio babaa-ngusawalo boito pilopo hala-Hio lonto talu limongoli.

¹³ Oditolio mamusi timongoli motiwata to Eeya Allahu Taa̒ala limongoli wolo lea-leaatu lohilaa limongoli.”

Allahu Taa̒ala lodanti u molao ngotaalio lo nabi

¹⁴ Lapatao̒ tei Musa loloi̒ya mao̒, “Babaa-ngusawalo tolipu u mapoti-biluloa̒ limongoli boito lodudua̒ nasehati lo tamoo-laamalia wau tahipo lolohe tutuuotalo. Bo Eeya Allahu Taa̒ala limongoli diila mongohi olimongoli mohutu mao̒ sua̒li boito.

¹⁵ Bolii̒o mao̒ monto bangusanto lohihilao Tio mamolao mai ode limongoli ngotaalio lo nabi debo odelo watia botie, wau timongoli musi modungoheo̒ olio.

¹⁶ Todulahee timongoli hia̒mbua to Hui̒dee Sinai, timongoli lolohone alihu diilalo mao̒ modungohe to Eeya Allahu Taa̒ala limongoli motahuda mai wau diilalo mao̒ momilohe owoluwo-Lio todelomo tulu uhinta-hintalabu, sababu timongoli moohe mate.

¹⁷ Sababu uito Eeya lotahuda mai ode laatia, ‘Hihiile limongolio boito molinepo.

¹⁸ Monto bangusa limongolio lohihilao Wau̒ mamolao mai ode limongolio ngotaalio lo nabi debo odelo yio̒. Wau̒ mamo tahuda mai olio wolo umusi loi̒yaalio, lapatao̒ tio mamopo tunggulao̒ ode bangusa boito totoonulalo upilo malentaa-U̒.

¹⁹ Tio mamo bisala to tanggulu-U̒, wau Wau̒ mamo hukuumani mai penu boli tatoonu wamabai̒o tadiila modungohe olio.

²⁰ Bo wonu ngotaalio lo nabi buheli mopo tunggulao̒ tahuli tuwau to tanggulu-U̒ lebe-lebe pomao̒ Wau̒ diila lopoa̒hu olio mohutu mao̒ odito, yi tio musi mate; odito olo timii̒du nabi tamo bisala to tanggulo ila-ila wewo musi mate.’

²¹ Tanu timongoli mamohintu todelomo hilao, ‘Woloolo mola pongotaawa lami wolo tahuli ngotaalio lonabi boito asaliilio mai monto Eeya meaalo diila?’

²² Wonu ngotaalio lonabi mobisala to tanggulo Eeya, bo wolo u yiloiyaalio boito diila lotoduo mai, yi laamali boito diila lonto Eeya. Nabi boito bo lobisala to tanggulio lohihilao wau timongoli diila mao̒ oohe to olio.”