RUT 4 - KITABI HABARI MOPIOHE

Tei Boas lonika woli Rut

¹ Tei Boas lonao̒ mola ode tambati lo dudunggaya tohuhebu hulubangi lokota. Tou̒ tio hulohuloa̒ mola teto yilumoadeo̒ talolai̒ u moduduo̒ olei Boas yito ngaalaa̒ lei Elimelekh tamodudula daa̒. Lapatao̒ tei Boas lotiangai olio, “Wutatuu̒, dulo potihuloa̒i tewe!” Tau boito lonao̒ mai, tulusi lotihuloo̒.

² Lapatao̒ tei Boas helo heinga mopulu lota tahimuloa lo ulipu lokota boito u lotihuloa̒ olo pee̒-pee̒enta teto. Tou̒ timongolio hihuloa̒,

³ malo loi̒ya tei Boas ode taa u ngokaumu ngaalaa̒ wolio boito, “Ti Nao̒mi malo hualingai lonto Moab. Botia tio ohilaa mopotali huta miliki lei Elimelekh tamailate, ngaalaa̒nto.

⁴ Wau to lantobuu̒ musi otaawamu pasali losua̒li boito. Wonu yio̒ ohilaa motali mao̒, poleleaalo mai totalu lotau-tauwalo tahihuloa̒ tewe. Wonu diila, poleleaalo mai lou̒ diila tohuulia, sababu bo ito duulota tao̒haku tosua̒li boito; yio̒ tabohulio, lapatio mao̒ bolo wau̒.” Tametao̒ lotau boito, “Joo, watia tamamotali mao̒.”

⁵ Lapatao̒ ualei Boas, “Mopiohulo wonu odito. Bo, wonu yio̒ tamotali huta boito monto oli Nao̒mi, yi yio̒ olo musi mohama oli Rut, taabua lo Moab, janda lowalai̒ Nao̒mi tamailate boito. Sababu, huta boito musi debo mowali miliki lo wali mola taa u mailate boito.”

⁶ Tametao̒ lotau boito, “Wonu odito, yi watia diila mambo. Botia mopiohulo watia molopata haku lowatia odelo taa bohulio tawajibu motali huta boito. Diila ohunalio watia motali mao̒ sababu huta boito tantu diila tamowali haku lo wali mola laatia. Lebe mopiohe itolo wambao̒ tamotali mao̒.”

⁷ To maasa boito wonu tau mopotali meaambo moluloa̒ u hitua-tuawua hakuulio, yi u moposaaha mao̒ sua̒li boito biasaalio tamopotali molopotao̒ sandaleelio, lapatao̒ mohudu mao̒ ode tamotali. Odi-odieelo mola dudelolio tau-tauwalo to Isirai̒lu moposaaha u hitua-hituawua lo palakala tataalia lohuta.

⁸ Sababu uito, tou̒ tau boito loloi̒ya odelei Boas, “Itolo wambao̒ tamotali,” yi tio lolopatao̒ sandaleelio, lapatao̒ lohudu mao̒ odelei Boas.

⁹ Yi ualei Boas mao̒ ode tahimuloa lo ulipu wau ngoa̒amila taa wewo tawoluo teto, “Todulahee botie timongoli ngoa̒amila mowali sakusi deu̒ watia malotali lonto oli Nao̒mi ngoa̒amila u mililiki lei Elimelekh tamailate wau mongo walai̒o, deu̒yito-yito tei Kilyon wolei Mahlon.

¹⁰ U wewolio leeto olo watia mamohama oli Rut, taabua lo Moab, janda lei Mahlon tamailate boito, mowali dile lowatia. Lou̒ odito huta boito debo mamowali miliki lo ngaalaa̒ taa u mailate boito. Waliilio mola olo madebo woluo towolota lomongo ilaatolio wau kotalio. Eelai mao̒ Mongo wutato, deu̒ todulahee botie timongoli ngoa̒amila mowali sakusiilio.”

¹¹ Tahimuloa lo ulipu wau taa wewo tawoluo teto malo loi̒ya, “Joo, amiaatia sakusiilio. Pohileaala dua̒ Eeya mopowali todilemu boito debo odelo ti Rakhel woli Lea tahe lopototutu mai walao̒ dadaata odelei Yako. Pohileaala dua̒ yio̒ maa̒amulu towolota lotau-tauwala lonto kaumu Eprata wau pohileaala dua̒ yio̒ mowali masa-masaahulu to Betlehemu.

¹² Pohileaala dua̒ tau̒kekeei̒ tamaa wohi mai lo Eeya olemu motimbulude to taabua muda botie mamopo toduo mai ngaalaa̒mu debo odelo tei Peres, walao̒ lonto olei Yehuda wau ti Tamar.”

Tei Boas wau waliilio mola

¹³ Yi tei Boas olo lohama oli Rut lowali dilelio. Eeya helo balakati mai oli Rut tilinggula tio maa ilombodaa̒ mola lapatao̒ lopotutu mai walao̒ talolai̒ ngota.

¹⁴ Mongobua loloi̒ya mao̒ odeli Nao̒mi, “Ilopujiaalo mola Eeya! Eeya malongohi mai wombu talolai̒ ngota olemu todulahee botie u molaalao̒ olemu. Pohileaala dua̒ walao̒ boito mowali masa-masaahulu to Isirai̒lu!

¹⁵ Moluhengumu taabua boito motolia̒nga daa̒ olemu. Tio malongohi mai olemu lebe lou̒ wolo u mowali wohi lowalao̒ mongo lolai̒ pitulota. Botia tio malongohi mai olo ngotaalio wombu talolai̒ olo olemu, tamaa mongohi sumangati bohu olemu, wau molaalao̒ olemu tou̒ yio̒ panggola mola.”

¹⁶ Ti Nao̒mi lohama walao̒ boito lapatao̒ helolaalao̒ olio wolo lealeaatu tolia̒ngo.

¹⁷ Mongobua tato tiihedi mongolio helongunte mao̒ walao̒ boito Obed. To timii̒du tau limongolio helo loi̒ya, “Ti Nao̒mi mai̒lo walao̒ talolai̒ ngota!” Tei Obed botieelo talapatio mao̒ lowali tiyamo lei Isai, wau tei Isai boitolo tiyamo lei Dauda.

^18-22 Wau uti-utieelo pilito lo silasila lei Dauda, tumulalo mai lonto olei Peres, deu̒yito-yito: Peres, Hejiron, Ram, Abinadab, Nahason, Salmon, Boas, Isai, Dauda.