ROMA 4 - KITABI HABARI MOPIOHE

Tei Abraham odelo obaaya

¹ Wonu odito, wolo umowali loi̒yanto pasali lei Abraham, nenemoya lo bangusanto? Woloolo mola uilo lasawalio?

² Wonu susuu-aliyaala u hepilo hutulio loo̒sababu Allahu Taa̒ala lololimo olio odelo tamo eengahe hilaa lo Allahu Taa̒ala, yi woluo olo alaasani to olio u motiwengahe. Bo tio diila mowali motiwengahe totalu lo Allahu Taa̒ala.

³ Todelomo Kitabi tulatulade, “Tei Abraham palacaya to Allahu Taa̒ala, wau sababu opopalacayalio botie tio tilolimo lo Allahu Taa̒ala odelo taa u moe̒engahe hilaa lo Allahu Taa̒ala.”

⁴ Taa u mokalaja, mololimo wuupa; wau wuupalio diila ilanggapulio odelo tuwaulio lowowohi, sababu uito yito hakuulio.

⁵ Bo woluo tadiila motiwunela tokela-kelalio lohihilao; tio mopo palacaya batangalio ode Allahu Taa̒ala tamoponasa mai tao̒dusa molopato monto totalalio. Dadaasari to palacayalio boitolo Allahu Taa̒ala mololimo tau boito odelo tamoo̒ sanangi hilaa lo Allahu Taa̒ala.

⁶ Odieelo mola huhama lei Dauda olo; uito sababuulio tio loloi̒ya hinta sanangi tutu ode taa u duo̒lo Allahu Taa̒ala matilolimo odelo taa uloo̒ sanangi hilaa-Lio, lou̒ diila piloo̒tuoto Allahu Taa̒ala totoonulalo huhutu lotau boito. Tei Dauda loloi̒ya odie,

⁷ “Potisanangilo tutu taa u totoonulalo totalaalio milaa̒apu wau totoonulalo dusalio ilambungu lo Allahu Taa̒ala.

⁸ Potisanangilo tutu taa u totoonulalo dusalio diila pilohile wolo moo̒ohuu̒ lo Eeya!”

⁹ Wolo loi̒ya potisanangi tutu botie bo pilopo dulungo wambao̒ ode tahe lodudua̒ wuu̒du lotuuna? Meaalo olo ode tau-tauwalo tadiila helo dudua̒ wuu̒du lotuuna? Mailoi̒ya lami tou̒ dipolulio mai, deu̒ tei Abraham tilolimo Allahu Taa̒ala odelo taloo̒ sanangi hilaa-Lio, sababu tei Abraham palacaya to Allahu Taa̒ala.

¹⁰ Naa, omolua Allahu Taa̒ala lopoi̒laalo mai sua̒li boito? Tou̒ dipolulio mai meaalo lapatio mao̒ tei Abraham tiluunalio? Memangi tou̒ tio dipo tiluuna, diila lapatio mao̒.

¹¹ Tio tiluunalio lapatio mao̒, wau tuunalio boito bo odelo tuoto deu̒ Allahu Taa̒ala malo lolimo olio odelo taloo̒ sanangi hilaa lo Allahu Taa̒ala, sababu palacaya to Allahu Taa̒ala. Tio tilolimo Allahu Taa̒ala tou̒ tio dipo lodudua̒ wuu̒du lotuuna. Wau tei Abraham lowali tiyamo delo pohuli lorohani ode ngoa̒amila taa palacaya to Allahu Taa̒ala, wau u sababuulio matilolimo Allahu Taa̒ala odelo taloo̒ sanangi hilaa-Lio, eleponu timongolio diila lodudua̒ wuu̒du lotuuna.

¹² Tei Abraham olo tiyamo delo pohuli lorohani ode tau-tauwalo talo dudua̒ wuu̒du lotuuna. Tio tiyamo delo pohuli lorohani limongolio diila bo sababu timongolio helo dudua̒ wuu̒du lotuuna, bo sababu timongolio olo hitumula wolo palacaya ode Allahu Taa̒ala, tutuuwauwa debo odelo tei Abraham tou̒ tio diipo lodudua̒ wuu̒du lotuuna.

Danti lo Allahu Taa̒ala tilolimo sababu palacaya to Allahu Taa̒ala

¹³ Allahu Taa̒ala lodanti odelei Abraham wau waliilio mola deu̒ dunia botie mamowali miliki lei Abraham. Allahu Taa̒ala lodanti mai odito diila sababu tei Abraham helo dungohe tobutoo̒ agama lo Yahudi, bo sababu tio palacaya to Allahu Taa̒ala tilinggula tio tilolimo Allahu Taa̒ala odelo taloo̒ sanangi hilaa-Lio.

¹⁴ Sababu wonu bo tau-tauwalo tamo dungohe to bubuu-too̒owalo agama lo Yahudi wambao̒ tamaa mololimo wolo u pilodanti mai lo Allahu Taa̒ala, yi palacaya to Allahu Taa̒ala diila ohunalio sama-samaata, wau danti lo Allahu Taa̒ala olo toongi wambai̒o.

¹⁵ Butoo̒ agama lo Yahudi mopodungga mai hukuumani lo Allahu Taa̒ala. Bo wonu butoo̒ diaaluo, yi totala olo diaaluo.

¹⁶ Oditolio danti lo Allahu Taa̒ala boito dadaasali palacayalio lotau ode Allahu Taa̒ala. Uito mowali tuwaulio pongaku ode ngoa̒amila wali mola lei Abraham deu̒ danti boito yilohi-Lio mai ode limongolio odelo tuwaulio lo wowohi u beebasi monto Allahu Taa̒ala; diila bo toli mongolio tahemo dungohe tobutoo̒ agama lo Yahudi wambao̒, bo toli mongolio olo taa palacaya to Allahu Taa̒ala tutuuwauwa debo odelo tei Abraham palacaya to o-Lio. Sababu tei Abraham yito tiyamanto ngoa̒amila delo pohuli lorohani.

¹⁷ Sababu Allahu Taa̒ala lotahuda odie odelei Abraham, “Wau̒ malo powali olemu tiyamo ode dadaata bangusa.” Odieelo mola Allahu Taa̒ala longohi mai danti boito odelei Abraham, wau tei Abraham palacaya to o-Lio. Tiolo Allahu Taa̒ala tamopo tumulai taa mate; Tiolo olo Allahu Taa̒ala u wolo tahuda-Lio wambao̒ helohutu mai wolo udipo pee̒enta woluo lowali woluo.

¹⁸ Tei Abraham tulusi wambao̒ hemo halapu mola wau palacaya eleponu tio diilalo ohalapani. Sababu uito tio malowali tiyamo lobangusa dadaata. Debo odelo ulei tuladu todelomo Kitabi, “Walimu mola mamowali mai dadaata daa̒.”

¹⁹ Tei Abraham tou̒ boito motota deu̒ tio madiilalo moo̒tapu mai wali, sababu batangalio mapanggola daa̒ wau umululio mawimbideo̒ ngohetuto taunu; odito olo ti Sara, dilelio boito, pulia. Bo iimani lei Abraham diila loe̒etu.

²⁰ Tio debo palacaya wau yakini danti lo Allahu Taa̒ala. Tumbao̒ iimanilio bo hei̒lo duhenga mola lotolio, tilunggula tio helomuji-muji Allahu Taa̒ala.

²¹ Tio palacaya daa̒ deu̒ Allahu Taa̒ala mowali mohutu wolo umapilo dantia-Lio mai.

²² Uito sababuulio tei Abraham tilolimo Allahu Taa̒ala odelo taa umoo̒ sanangi hilaa lo Allahu Taa̒ala.

²³ Loi̒ya u “Tilolimo odelo taa umoo̒ sanangi hilaa lo Allahu Taa̒ala” leituladei diila bo wambao̒ odelei Abraham lohihilao,

²⁴ bo ode olanto olo. Ito olo matolimoo-Lio odelo taa umaloo̒ sanangi hilaa lo Allahu Taa̒ala, sababu ito palacaya to Allahu Taa̒ala talopo tumulai li Isa, Eeyanto, lonto opopate.

²⁵ Ti Isa boito mailudu-Lio mai u pateelio mate-mateelo mao̒ sababu duduu-saanto; lapatao̒ luli pilopo tumulai lo Allahu Taa̒ala mai lohutu olanto luli lopiiohe wolo Allahu Taa̒ala.