PILOTIMUA̒TA 40 - KITABI HABARI MOPIOHE

Kema lo Eeya pilopo tihulo wau pilopohetu duo̒lo

¹ Eeya lotahuda mai odelei Musa,

² “Potihula mao̒ Kema-U̒ tobohulo dulahu wau bohulo hulalo.

³ Potuwota mao̒ ode delomio Bulua Daantia utua-tuanga Mopulu Palenta wau pasia mao̒ kaingi polau̒bu totalulio.

⁴ Potambatia mao̒ meja wolo u powimumutio. Potuwota mao̒ olo oa̒ato tohe wau tumbili mao̒ tohelio.

⁵ Podutua mao̒ mesba hulawa tambati pomobuwalo dupa totalu lo Bulua Daantia, wau pontayanga mola lalante tohuhebu lo Kema.

⁶ Podutua mao̒ mesba duo̒lo bake pobuwalo totalu huhebu lo Kema.

⁷ Podutua mao̒ baki lotaluhu towolota lo Kema wau mesba boito, lapatao̒ tuanga mola wolo taluhu.

⁸ Lapatao̒ pasia mao̒ layahu pali-palita to palepelo Kema, wau pontayanga mao̒ podehu lohuhebu hulubangi lo palepelo.

⁹ Lapatao̒ Kema wau totoonulalo u powimumutio musi podewomu mai ola-U̒ wolo mopo lamaheo̒ lowinulo wolo winulo upacala, yi ngoa̒amilalo boito pilopo tolomodio mai ola-U̒.

¹⁰ Podewowa mao̒ mesba wau totoonulalo powimumutio wolo pohuli boito, alihu ngoa̒amilalo pohetuwolo ode Olao̒.

¹¹ Pohutua mao̒ odito olo wolo baki lotaluhu wau wumbatio.

¹² Lapatao̒ uito, ahuli mao̒ tei Haruna wau mongo walai̒o monao̒ mai ode huhebu lo Kema wau mongulo batanga.

¹³ Popakea mao̒ pakeyangi iimamu olei Haruna, wau yilamahe mao̒ lowinulo alihu tio pohetuwolo u momaya ola-U̒ odelo iimamu.

¹⁴ Lapatao̒ ahuli mao̒ mongo walai̒o mohimbideo̒, wau popakea mao̒ kameja toli mongolio.

¹⁵ Lapatao̒ lamahe mao̒ lowinulo debo odelo yilamahemu tiyamo limongolio, alihu timongolio olo mowali momaya ola-U̒ odelo iimamu. Wolo upacala lowinulo boito suku limongolio wawaalia mola modihu huhuloa̒a iimamu.”

¹⁶ Tei Musa helohutu ngoa̒amilalo debo odelo upilo malentao̒ lo Eeya.

¹⁷ Yi tobohulo dulahu wau bohulo hulalo todelomo taunu oluolio lapatao̒ bangusa lo Isirai̒lu lololaa mao̒ Masiri, Kema lo Eeya boito pilohuli.

¹⁸ Tei Musa helo mayango wuwuu-mbatio, lopotihulo tutuu-lalio, helopohuli kokoo-sengilio, wau helo potihulo wowoo-lihilio.

¹⁹ Lapatao̒ bilua̒dio mota watopo Kema wolo tau̒bu wimbihu bulemengo toitaatio debo odelo upilo malentai lo Eeya.

²⁰ Lapatao̒ duuduluo botulio boito pilopo tuwotio ode delomo Bulua Daantia. Lapatao̒ tei Musa lopohuli mao̒ tau̒bu Bulua boito wau lopo tuwotao̒ ayu pohuluhelio ode delomo patedalio.

²¹ Lapatao̒ tio lopodutu Bulua boito todelomo Kema wau lopo ntayangao̒ kaingi polau̒bu totalulio debo odelo upilo malentao̒ lo Eeya olio.

²² Lapatao̒ tei Musa lopo tambati mao̒ meja todelomo Kema, towimbihu tilayo ambahu bulemengo kaingi,

²³ lapatao̒ toitaato meja boito dilutua roti pohinta,

²⁴ Oa̒ato tohe pilopo dutulio todelomo Kema, to ambahu huliaalio, tataaluwa wolo meja boito,

²⁵ lapatao̒ ngoa̒amila tohe boito pilopo lai̒tio mola totalu lo Eeya.

²⁶ Mesba hulawa pilopo tambatilio todelomo Kema totalu lokaingi,

²⁷ lapatao̒ tilapolio mao̒ dupa moonu odelo pilo malentao̒ lo Eeya odelei Musa.

²⁸ Tei Musa lopo ntayangao̒ podehu lohuhebu Kema,

²⁹ wau totalu lohuhebu boito dilutulio mao̒ mesba ode bake yilalango wau bake pohinta.

³⁰ Baki polunggu dilutulio towolota lo Kema wau mesba, lapatao̒ tiluwangio wolo taluhu.

³¹ Tei Musa wolei Haruna wau mongo walaio̒ helongulo uluu̒ wau oa̒ati mongolio teto,

³² timi-timii̒du timongolio tumuwoto ode delomo Kema lo Eeya meaalo motahude mesba.

³³ Topalito Kema wau mesba boito tei Musa helo pohuli layahu lapatao̒ tio lopontayango podehu lohuhebu hulubangi lo palepelo. Oditolio yilapato ngoa̒amilalo kalaja boito.

Heengo lohenggube Kema lo Eeya

³⁴ Lapatao̒ lolaahei heengo lohenggube Kema lo Eeya boito, wau Kema boito lopolu lomola wolo tilango owoluwo lo Eeya.

³⁵ Sababu uito tei Musa diila mowali tumuwota ode delomo Kema boito.

³⁶ Timi-timii̒du heengo boito mobotulo monto yitaato Kema lo Eeya, bangusa lo Isirai̒lu molonggalo kema limongolio u molimbato ode tambati wewo.

³⁷ Bo wonu heengo boito diila mobotulo, timongolio diila momonggato monteeto.

³⁸ Ngotilonggadu bangusa lo Isirai̒lu monao̒ ode utoonulalo mao̒, Eeya woluo to Kema boito todelomo laku loheengo tou̒ dulahu wau todelomo laku lotulu tou̒ hui. 34