PILOTIMUA̒TA 37 - KITABI HABARI MOPIOHE

Mohutu Bulua Daantia

¹ Tei Bejaleel lohutu mao̒ Bulua Daantia lonto ayu aakasia, hayai̒o ngohetuto mopulu losenti, tanggalo wau langgatio tinggai wolomo pulaa wolomo senti.

² Towimbihu delomio wau bulemengio yilolude wolo hulawa tutu, lapatao̒ pilohutua lesi hulawa topalitio.

³ Lapatao̒ pilohutulio pateda hulawa mohelu wopato ode ayu pohuluhelio wau pilopo hulilio to opato oa̒ato tohe lobulua boito, duluo pateda to timii̒du biihio.

⁴ Pilohutulio olo pohuluhelio monto ayu aakasia wau yiloludelio wolo hulawa,

⁵ lapatao̒ ayu pomulihela boito pilopo tuwotio ode delomo pateda totimii̒du biihu Bulua boito.

⁶ Lapatao̒ pilohutulio tau̒be tuwau hulawa tutu, hayai̒o ngohetuto mopulu losenti wau tanggalio wolomo pulaa wolomo senti.

⁷ Pilohutulio olo malai̒kati opolipio̒ duluo monto hulawa dilupa,

⁸ tuwau to motii̒du huudu lotau̒bu boito. Oluo malai̒kati opolipio̒ boito pilowali ngotayadu wolo tau̒bio,

⁹ wau pilohutu tinggai tataalua wolo polipio̒ ubua̒-bua̒de lomeleu̒to tau̒bu bulua boito.

Mohutu meja ode roti pohinta

¹⁰ Tei Bejaleel lohutu mao̒ meja lo ayu aakasia, u hayai̒o walu lopulaa walu losenti, tanggalio wopato pulaa pato senti wau langgatio wolomo pulaa wolomo senti.

¹¹ Meja boito yiloludelio wolo hulawa tutu wau topalitio pilopo hulialio lesi hulawa.

¹² Lapataa̒ tio lohutu mao̒ biihu meja ngotanggalo pitu wau ngoputu senti. Biihu boito dilutua lesi hulawa topalitio.

¹³ Pilohutulio pateda wopato ode ayu pomulihelio wau pilopo hulialio to opato tutulo oa̒ato meja.

¹⁴ Pateda u molahangi ayu pomulihelio pilopohuli totili biihu lomeja.

¹⁵ Pomulihe boito pilohutu monto ayu aakasia wau yilolude hulawa.

¹⁶ Tio olo helohutu pipii-nggeyaalo, mamaa-nggowaalo, gigii-ntiyaalo wau momoo-kuwaalo duo̒lo dewo taluhu lo angguru. Ngoa̒amila powimumuto meja boito pilohutulio monto hulawa tutu.

Pilohutua oa̒to tohe

¹⁷ Tei Bejaleel lohutu oa̒ato tohe lonto hulawa tutu. Wumbato wau didihimalio pilohutu lonto hulawa dilupa. Bubuu-ngawaalo polomu, leituwoto toyungo wau kolopaalio pilopowali tuwau wolo didihimalio.

¹⁸ To didihima boito pilohutua tango mohelu wolomo, tango mohelu totolu totimii̒du biihio.

¹⁹ Totimii̒du tangolio pilohutua polomu debo odelo totolu bunga badamu wolo toyungo wau kolopaalio.

²⁰ To didihimalio pilohutua polomu debo odelo wopato bunga badamu wolo toyungo wau kolopaalio.

²¹ To walungo lotimii̒du ngopange tango boito pilohutu ngotoyungo.

²² Ngoilanggubu oa̒ato tohe boito wolo totoo-yungowalo wau tataa-ngolio pilohutu lonto ngopitango huhuu-lawaalo tutu dilupa.

²³ To oa̒ato tohe boito pilohutualio pitu tohe wolo pakaakasi u mopoo̒ belesi mao̒ tumbu lotohe wau bakilio lonto hulawa tutu.

²⁴ U mohutu mao̒ oa̒ato tohe wau powimumutio palaluwolo hulawa tutu tolo pulaa limo lokilo.

Mohutu mesba tambati pomobuwalo dupa

²⁵ Tei Bejaleel lohutu mao̒ lonto ayu aakasia mesba tuwau tambati pomobuwalo dupa. Mesba boito moodelilio hitutu-tutuwa; hayao̒ wau tanggalio tinggai wopato pulaa limo losenti wau langgatio tio lopulu losenti. To opato tutulio toitaatio pilohutua tunge lowali tuwau wolo mesba boito.

²⁶ Towimbihu yitaato opato biihu wau tutuu-ngelio yilolude wolo hulawa tutu wau topalitio pilohutua lesi hulawa.

²⁷ Pilohutulio olo pateda mohelu duluo towalungo lesi hulawa tobiihio duuduluo u molahangi ayu pomulihelo mesba boito.

²⁸ Pomulihe boito pilohutu lonto ayu aakasia wau yilolude wolo hulawa.

Mohutu winulo upacala wau dupa

²⁹ Tei Bejaleel olo lohutu mao̒ winulo upacala wau dupa tutu umoonu ilulau debo odelo wimulo moonu.