PILOTIMUA̒TA 30 - KITABI HABARI MOPIOHE

Mesba tambati polapowalo dupa

¹ Eeya luli lotahuda odelei Musa, “Pohutua mao̒ monto ayu aakasia mesba tuwau tambati polapowalo dupa.

² Pongawaa̒ lomesba boito musi hitutu-tuuwa; hayao̒ wau tanggalio tinggai wopato pulaa limo losenti, wau langgatio tio lopulu losenti. To opato tutulio pohutui mao̒ tutuu-ngeyaalo umowali tuwau wolo mesba boito.

³ Towimbihu yitaatio, tuwotuwoto opato biihio wau tutuu-ngeelio musi woludela wolo hulawa tutu wau dutuwalo lesi hulawa topalitio.

⁴ Pohutua mao̒ pateda duluo tohulii lolesi tobiihio duuduluo huna molahangi ayu pohuluhelo mesba boito.

⁵ Pohuluhelo boito musi pohutuwola monto ayu aakasia wau woludela wolo hulawa.

⁶ Podutua mao̒ mesba boito towimbihu bulemengo kaingi uwoluo totalu lo Bulua Daantia, totambati umaa podunggaya-U̒ wolemu.

⁷ Timii̒du dumodupo tou̒ tei Haruna monao̒ mai mopo dapato mao̒ tohe, tio musi molapo dupa moonu toitaato mesba boito.

⁸ Sua̒li boito musi pohutuwola olo tou̒ tio mopo lei̒tao̒ tohe tou̒ lolaango. Dewo lodupa boito musi pohutuwola mololaalaaita ngotupa lojamani.

⁹ Diila mao̒ podewowa toitaato mesba boito dupa udini-dini, bake lo binatangi, meaalo bake pohinta; diila mao̒ poluata olo bake taluhu lo angguru toitaatio.

¹⁰ Poe̒enta ngotaunu tei Haruna musi mohutu mao̒ upacala pomantaliyalo mesba wolo pohuli mopo molotio̒ ode opato tungeelio duhu lobibiahu u pobakeolo huna pongambungualo dusa. Sua̒li boito musi pohutuwola timii̒du taunu ngotupa lo jamani. Mesba boito musi mantali ngoa̒amilalo wau pohetuwola ola-U̒.”

Beya duo̒lo Kema lo Eeya

¹¹ Eeya lotahuda odelei Musa,

¹² “Tou̒ powoluwolo poyiaa̒apalo jumulaa ulipu lobangusa Isirai̒lu, timii̒du mongo lolai̒ musi momayali mai ola-U̒ doi potoloto ode batangalio alihu tio diila otuhata lobaala tou̒ poyiaa̒apalo jumulaa ulipu boito powoluwolo.

¹³ Timii̒du taa u moduduo̒ lekeniyolo todelomo poyiaa̒apalo boito musi momayali ngojumula doi utilantu mao̒ moduduo̒ halaga upohu-pohutu to Kema-U̒ odelo dembulo ola-U̒.

¹⁴ Timii̒du taa u rekeniyolo todelomo poyiaa̒apalo boito, deu̒yito-yito timii̒du mongo lolai̒ tamaa ou̒umulu dulopulu lotaunu meaalo lebe mao̒, musi mongohi dembulo pohetu boito.

¹⁵ Taa kaya diila musi momayali lebelebe, wau taa mosikini diila mowali momayali ii̒ilangi tou̒ timongolio momayali mao̒ doi potoloto duo̒lo batangalio.

¹⁶ Hamawa mao̒ doi boito monto bangusa lo Isirai̒lu, wau pohunawa mao̒ duo̒lo ibadaati todelomo Kema-U̒. Ngoa̒amilalo boito yito doi potoloto duo̒lo batanga limongolio, wau Wau̒ malaito moe̒ela u moduo̒la olimongolio.”

Baki monto polunggu

¹⁷ Eeya lotahuda odelei Musa,

¹⁸ “Pohutua mao̒ baki tuwau monto polunggu wolo wumbatio olo monto polunggu. Potambatia mao̒ baki boito towolota lo Kema wau mesba, lapatao̒ tuangi mao̒ wolo taluhu.

¹⁹ Taluhu boito odelei Haruna wau mongo walai̒o alihu timongolio mowali mongulo uluu̒ wau oa̒ato

^20-21 tou̒ diipo tumumuwotao̒ ode Kema meaalo mohimbideo̒ ode mesba u modelo bake yilalango. Timongolio musi mohutu mao̒ uito alihu diila opatea mate-mateelo mao̒. Wuu̒du boito musi dungohe mao̒ limongolio wau wali mola limongolio u ohiiheo-hiheolo mao̒.”

Winulo upacala

²² Eeya lotahuda odelei Musa,

²³ “Hamawa mao̒ ramba-ramba u mopiohe daa̒, wolomo kilo damahu moonu maayuhu, tolo kilo ayu moolingo, tolo kilo patodu moonu, wau wolomo kilo ayu teja.

²⁴ Ngoa̒amila timengolo modudua̒ titimenga upohu-pohutu to Kema-U̒. Duhengi mao̒ wopato liiteri winulo jaitun,

²⁵ wau pohutua mao̒ winulo upacala, u ilulau debo odelo winulo moonu.

²⁶ Pomake mao̒ uu̒ulau boito u mopo winulao̒ Kema-U̒, Bulua Daantia,

²⁷ meja wau ngoa̒amila powimumutio, oa̒ato tohe wau powimumutio, mesba tambati pomobualo dupa,

²⁸ mesba duo̒lo bake yilalango wolo ngoa̒amila powimumutio, wau baki lotaluhu wolo wumbatio.

²⁹ Wolo pohuli boito musi pohetuwomu mao̒ babaa-langiyalo boito ode ola-U̒, alihu ngoa̒amilalo mowali mantali. Penu boli wolo wambai̒o u otuhata lomesba boito musi wuduwolo ode Eeya, wau penu boli tatoonu tamoo̒ dedetao̒ matopotala sababu olootolo lo omantalilio.

³⁰ Winuli mao̒ olo tei Haruna wau mongo walai̒o alihu timongolio pomantaliyolo mowali iimamu u momaya ola-U̒.

³¹ Polelea mao̒ tobangusa lo Isirai̒lu deu̒ ngotupa lojamani winulo upacala boito pohetuwola ola-U̒.

³² Winulo boito diila mowali tuatolo ode yitaato tau-tauwalo biasa. Diila mao̒ pohutua winulo debo odelo uito wolo momake ulaulio boito olo. Winulo boito mantali, wau musi anggapuolo debo odelo balangi mantali.

³³ Taa u mohutu winulo debo odelo uito, meaalo mopomake mao̒ duo̒lo taa u diila iimamu, madiilalo anggapuolo pongawaa̒ lo umati-U̒.”

Dupa

³⁴ Eeya lotahuda odelei Musa, “Hamawa mao̒ dengolo dalaala ramba-ramba u tutuuwauwa daatalio, deu̒yito-yito tangilo damahu, alipo lokan, tangilo rasamala wau dupa u pulua.

³⁵ Pomakea mao̒ ngoa̒amila boito u pohutu dupa lulau umoonu. Duhengi mao̒ watingo alihu dupa boito debo pulua wau mowali pomake ode ola-U̒.

^36-37 Ngotayadu dupa boito musi lobuo̒lo tunggula moa̒aluti. Delowa mai uito ode Kema-U̒ wau pomua̒yade mao̒ totalu lo Bulua Daantia. Dupa boito musi anggapuola balangi mantali u pilopohetu ola-U̒. Diila mao̒ pohutu dupa ilulau wolo pidelo udebo odelo uito olo olimongoli lohihilao.

³⁸ Tatoonu tamohutu yiyii-lontaalo debo odelo uito, diilalo anggapuola pongawaa̒ lo umati-U̒.”