PILOTIMUA̒TA 18 - KITABI HABARI MOPIOHE

Tei Yitro tiyamo lobiilohe wolei Musa

¹ Tei Yitro moluhengo lei Musa, iimamu to Midian, loo̒dungohu pasali lo totoonulalo u hekilalaja lo Allahu Taa̒ala odelei Musa wau bangusa lo Isirai̒lu, tou̒ tio lodelo olimongolio yilumualao̒ lonto Masiri.

² Yi malonao̒ tei Yitro mota lobiilohe wolei Musa, lodelo oli Jipora, dile lei Musa tadonggo bilu-biluloa̒ to Midian,

³ pee̒-pee̒eta wolei Gersom wolei Eliejer, walai̒o mongo lolai̒ duulota. Walao̒ tabohulio ilunte Gersom sababu tei Musa loloi̒ya, “Wau̒ ngotaalio lotaa lonao̒ mai ode lipu deli”;

⁴ walao̒ oluolio ilunte Eliejer sababu tei Musa loloi̒ya, “Allahu Taa̒ala pujaa̒ni linenemoyaau̒ malo tulungi wau lopoa̒ahu olau̒ tilunggula wau̒ diila pilatelio yila-yilateelo mao̒ li olongia lo Masiri”.

⁵ Tei Yitro lonao̒ mai pee̒-pee̒enta wolo dile lei Musa wau walai̒o duduulota ode huta udatahu wau luasi udelita tambati pilo tikemawa lei Musa totili lo hui̒dee mantali.

⁶ Tei Musa pilopo habarialio mao̒ deu̒ timongolio lonao̒ mai,

⁷ yi yilumualo mota tio lolutulai olimongolio. Tio malo sujudu totalu lei Yitro wau lodiilao̒ olio. Timongolio tinggai hipo hihiintua owowoluwoa lo ososeehati limongolio ngota-ngota, lapatao̒ tilumuwotao̒ ode delomo kema lei Musa.

⁸ Tei Musa helo hungguli mao̒ ode tiyamo moluhengio totoonulalo upilohutu lo Eeya odeli olongia wau bangusa lo Masiri u lopoa̒ahu taulo Isirai̒lu. Tio olo lohungguli mao̒ olio pasali totoonulalo loe̒epita utilalua lo bangusa Isirai̒lu tohuungo dalalo, wau woloolo mola Eeya helo poa̒ahu mao̒ olimongolio.

⁹ Loo̒dungohe ngoa̒amilalo boito, tei Yitro yileengahu,

¹⁰ wau loloi̒ya mao̒, “Ilopujialo mola Eeya talo poa̒ahu mai olimongoli lonto uluu̒ li olongia wau bangusa lo Masiri! Ilopujialo mola Eeya talo lopatai bangusa lo Isirai̒lu lonto polowato!

¹¹ Botia otaawa lowatia deu̒ Eeya lebe udaa̒ wolo ngoa̒amila ila, sababu ngoa̒amila boito pilohutu-Lio tou̒ taulo Masiri helo tihutu sombongi daa̒ to taulo Isirai̒lu.”

¹² Lapatao̒ tei Yitro malodelo dengolo bake yilalango wau bake iloloto odelo dewo ode Allahu Taa̒ala. Tei Haruna wau ngoa̒amila tau̒wa bangusa lo Isirai̒lu lonao̒ mai wau helo lamela pee̒-pee̒enta wolei Yitro todelomo owoluo lo Allahu Taa̒ala.

Tei Musa helo muduo̒ Mongo hakimu

¹³ Loloombulio mola tei Musa helo mutoo̒ popoo-lohiheede towolota tau-tauwalo Isirai̒lu. Kalaja boito yilongaa wakutu tumulalo mao̒ dumodupo demola hui.

¹⁴ Tou̒ tei Yitro loo̒onto mao̒ ngoa̒amila umusi kalajaa lei Musa, tio lohintu mao̒, “Wolo wambai̒o umusi kalajaamu duo̒lo bangusa botie? Wolo ngoa̒amilalo botie mamusi kalajaamu lohihilao, tilinggula u mohile nasehatimu wambao̒, tau-tauwala boito musi timihula tewe tumulalo mao̒ dumodupo demola hui?”

¹⁵ Tametao̒ lei Musa, “Tau-tauwalo boito lonao̒ mai ode laatia ohilaa motota mao̒ kahandaki lo Allahu Taa̒ala.

¹⁶ Wonu timongolio mobuutola, timongolio motaalua wolaatia alihu watia momutoa̒ao̒ palakala limongolio, wau watia mopo tunggulao̒ ode limongolio palenta wau butoo̒ lo Allahu Taa̒ala.”

¹⁷ Ualei Yitro, “Diila mopiohu odito.

¹⁸ Wolo pohuli boito yio̒ mopo woongolo batangamu lohihilao, wau olo tau-tauwalo boito. Kalaja boito mailaba daatalio duo̒lo taa ngota.

¹⁹ Dungohilo naseehatiu̒, wau Allahu Taa̒ala mamo tulungi mai olemu. Memangi mopioheo̒ yio̒ mowali wakili to bangusa botie totalu lo Allahu Taa̒ala wau modelo sua̒li limongolio ode Olio.

²⁰ Yio̒ musi mongaajali olimongolio palenta lo Allahu Taa̒ala wau motombango mao̒ dudelo lo tutumulo umopiohe wau wolo u musi pohutuo limongolio.

²¹ Bo ngopohia mao̒ leeto yio̒ musi molulaotao̒ dengolo lota mongo lolai̒ tamolinepo, wau molantu mao̒ olimongolio mowali tau̒wa to tangolihu lota, ngohetuto lota, limo lopulu lota, wau mopulu lota. Timongolio musiilio tau-tauwalo tamoohe wau tamo dungohe to Allahu Taa̒ala, mowali palacayaalo wau diila mohuto mololimo doi sooloi̒.

²² Ahuliilio timongolio mohutu mao̒ odelo hakimu lo bangusa botie, ngota-ngota duo̒lo polemboa̒lio. Kalaja boito musi pohutuo mao̒ limongolio wolo aa̒atulu. Papaa-lakalaalo u polohuna daa̒ mowali podudulai limongolio ode olemu, bo polobuutola ukekeei̒ mowali poberesio mao̒ limongolio lohihilao. Sua̒li boito mamo poheelo olemu sababu timongolio modudua̒ timihulao̒ to sua̒li boito.

²³ Wonu yio̒ mohutu mao̒ odito, wau sua̒li boito pilo malentai lo Allahu Taa̒ala olemu, yio̒ maa mambo mohutu mao̒ tuugasimu, wau ngoa̒amila tau mamo hualingao̒ wolo olulia sababu sua̒li limongolio hua̒a pilopo belesi mao̒.”

²⁴ Tei Musa malo duduo̒ naseehati lei Yitro,

²⁵ wau helo lulaotao̒ tau-tauwalo tahi tinepa towolota bangusa lo Isirai̒lu. Tio lolulaotao̒ olimongolio lowali tau̒wa to tangolihu lota, ngohetuto lota, limo lopulu lota, wau mopulu lota.

²⁶ Timongolio helo ponao̒ tuugasilio odelo mongo hakimu to bangusa lo Isirai̒lu. Papaa-lakalaalo u polohuna daa̒ hepilo dudulao̒ limongolio odelei Musa, hiambola polobuutola ukekeei̒ pilopo belesi mao̒ limongolio lohihilao.

²⁷ Lapatao̒ tei Musa lolopata olei Yitro lonao̒ wau malo hualingolo tei Yitro ode lipulio.