OLUO MONGO OLONGIA 8 - KITABI HABARI MOPIOHE

Taabua lonto Sunem luli lohualinga ode lipu lo Isirai̒lu

¹ Tou̒ wakutu tuwau Eeya lopo dungga mai baala lo polobiti tolipu lo Isirai̒lu u pohupohutu pitu lotaunu mola hiheolio. Tou̒ dipolulio uito uito tei Elisa malo poo̒taa sua̒li boito ode taabua lonto Sunem tawalai̒o luli pilopo tumulio mai. Tei Elisa olo lopoa̒hu olio lolimbata mola wolo ngaalaa̒lio ode lipu wewo.

² Taabua boito lopohutu mao̒ wolo uiloi̒ya lei Elisa, wau lomonggata ode lipu lo Pilistin mola lotibiluloa̒ teto.

³ Lapatio mao̒ pitu lotauna mola boito tio luli lohualinga ode Isirai̒lu. Lapatao̒ tio lonao̒ wolo walai̒o odeli olongia mota lomolohone alihu bele wau halabolulio powalingo mai ode olio.

⁴ Tou̒ boito tei Gehasi tamoomayawa olei Elisa mapilohile li olongia helo hungguli mao̒ totoonulalo moo̒linggolabu u mapilohutu lei Elisa.

⁵ Wau lotuhatawa tou̒ taabua lonto Sunem boito mai lotaalua woli olongia u mopo tunggulao̒ lo polohonelio, tei Gehasi donggo hemo hungguli mao̒ pasali lou̒ woloolo mola tei Elisa luli lopo tumulai walao̒ ngota tamailate boito. Yi ualei Gehasi, “Paduka taa molamahu, utieelo taabua boito, wau botie olo walai̒o taluli pilopo tumulai lei Elisa!”

⁶ Lapatao̒ ti olongia lohintu mao̒ wau taabua boito malo hungguli pasali lowalao̒ boito. Lapatao̒ uito ti olongia lotiangai pogaweelio ngota wau lomalentao̒ alihu ngoa̒amila haku lotaabua boito muli pohualingola olio, leituwoto wolo ngoa̒amila halaga lo tilapulo halabolulio ngotilonggadu pitu lotaunu mola tou̒ tio tolipu deli.

Tei Elisa wau ti Olongia Benhadad lonto Siria

⁷ Tou̒ wakutu tuwau tei Elisa lonao̒ mola ode Damusiki. Lolaahunga ti Olongia Benhadad donggo mongongoto. Tou̒ ti olongia loo̒dungohe deu̒ tei Elisa woluo to Damusiki,

⁸ yi tio loloi̒ya mao̒ odelei Hajael, pogaweelio ngota, “Delowalo mota paraseni odeli nabi boito, wau pohilea mao̒ olio alihu tio mohintu mola ode Eeya, wolo wau̒ botie mamoluli meaalo diila.”

⁹ Tei Hajael malohama unta wopato pulu wau helo detoheo̒ wolo tilapulo kota lo Damusiki u hidala-dalaala, tulusi lomonggato odelei Elisa. Tou̒ leidungga mola ode tambati lei Elisa, tei Hajael loloi̒ya mao̒, “Watomu ti Olongia Benhadad, lolao mai olaatia u mohintu mao̒ wolo tio mamoluli meaalo diila?”

¹⁰ Tei Elisa lolametao̒, “Eeya lotahuda mai olaatia deu̒ tio mamaate. Bo poleleaalo mao̒ olio deu̒ tio mamoluli.”

¹¹ Lapatao̒ tei Elisa lopoo̒ tontongao̒ olei Hajael wolo bibilohe u tio̒otutua tilinggula tei Hajael diila loduo̒to hilaalio. Debolo tei Elisa hilumoyongo.

¹² “Yilongola ti Tuani hilumoyongo?” yilintu mao̒ lei Hajael. “Sababu otaawau̒ ololeeto umapo hutuwomu ode taulo Isirai̒lu,” ualei Elisa, “Yio̒ mamomobu totoonulalo kotalio u obiintengi, wau mamomate-mateelo mao̒ tau-tauwalo humulalio tahipiohe daa̒, wau molingoloa̒ao̒ tahi uungea momutao̒ ombongo lo mongobualio tadonggo hi ombodaa̒wa.”

¹³ “Aa, watia botie taa udiila oboliilio,” tametao̒ lei Hajael, “diila pongalo aakali watia okawasa upolu-polutuo̒ debo odelo uito!” “Eeya malo poi̒laalo mai olau̒ deu̒ yio̒ mamowali olongia lo Siria,” tametao̒ lei Elisa.

¹⁴ Tou̒ tei Hajael luli lohualinga ode bele biluloa̒ li olongia, malohintu tei Benhadad, “Wolo uiloi̒ya mai lei Elisa?” “Tio loloi̒ya mai deu̒ ti Baginda tantu mamoluli,” tametao̒ lei Hajael.

¹⁵ Bo loloombulio mola tei Hajael lohama pohuloto ngopita, wau lopolomo mao̒ ode delomo taluhu tulusi lopodeeheo̒ tobaya li olongia tilinggula tio yilate bilotoo̒. Wau tei Hajael olongia lo Siria lobuulota wolei Benhadad.

Tei Yehoram lowali olongia lo Yehuda

¹⁶ Tei Yehoram walae̒e Yosapat lowali olongia lo Yehuda tou̒ ti Olongia Yoram walae̒e Ahab malo malenta Isirai̒lu limo lotaunu mola.

¹⁷ Tou̒ boito tei Yehoram o umulu tolo pulaa duluo lotaunu, wau tio helo malenta to Yerusalemu walu lotaunu mola hiheolio.

¹⁸ Tio lonika wolo walae̒e Ahab, wau debo odelo u hepilohutu longaalaa̒ lei Ahab, yi tio olo heilodusa to Eeya debo odelo mongo olongia lo Isirai̒lu.

¹⁹ Bo Eeya diila lohuto helo pobinasa mai Yehuda sababu Eeya malodanti mai odelei Dauda wato-Lio, deu̒ waliilio mola debo mamowali olongia.

²⁰ To delomo pamalenta lei Yehoram, Edom helo mintaa̒a tingolo ode Yehuda wau lopo tihulao̒ bele biluloa̒ saaha li olongia lohihilao.

²¹ Sababu uito, mailumualao̒ tei Yehoram wolo ngoa̒amila kaleta lo popaatealio lotidulunga ode Jair. Mola teto tio hebilaala pasuukani lo Edom, bo huilio mao̒ tio wau mongo eyaanggu lo pasuukani okaleta loo̒ tuwotao̒ bala lomusu, wau mongo pajule limongolio loo̒lahi lohualinga ode bele limongolio ngota-ngota.

²² Tumulalo mai tou̒ boito Edom diilalo taa̒aluku to Yehuda. Tou̒ boito olo kota Libna helo mintaa̒a tingolo.

²³ Hikaayati wewolio tomimbihu olei Yehoram tiluladu todelomo buku Sojara Mongo Olongia lo Yehuda.

²⁴ Tio yilate wau yilobungio to pilolobunga lomongo olongia to Kota lei Dauda. Tei Ahasia walai̒o lowali olongia lobuulota wolio.

Tei Ahasia olongia lo Yehuda

²⁵ Tei Ahasia walae̒e Yehoram lowali olongia lo Yehuda tou̒ ti Olongia Yoram walae̒e Ahab malo malenta Isirai̒lu mopulaa dulo taunu mola hiheolio.

²⁶ Tou̒ boito tei Ahasia o umulu dulo pulaa dulo taunu, wau tio helo malenta to Yerusalemu ngotanu mola hiheolio. Tiilolio ilunte Atalya, walai̒ Olongia Ahab wau wombu lei Omri olongia lo Isirai̒lu.

²⁷ Sababu ninikaalio boito, tei Ahasia o aaita ngaalaa̒ wolo ngaalaa̒ li Olongia Ahab. Tei Ahasia ilodusa to Eeya tutuuwauwa debo odelo u hepilohutu lo ngaalaa̒ lei Ahab.

²⁸ Ti Olongia Ahasia lodudua̒ helopaatea wolei Yoram olongia lo Isirai̒lu loluwali olei Hajael olongia lo Siria. Timongolio helopaatea to Ramot, madala lo Gilead. Tei Yoram pilalia todelomo popaatea boito,

²⁹ lapatao̒ tio luli lohualinga ode kota lo Yijreel mola yiraawatialio, wau tei Ahasia lonao̒ lomilohe olio mola teto.