OLUO MONGO OLONGIA 24 - KITABI HABARI MOPIOHE

¹ Tomaasa pamalenta li Olongia Yoyakim, tei Nebukadnejar olongia lo Babel loluhu wau helopo taa̒aluku Yehuda. Tolo taunu mola hiheolio tei Yoyakim taa̒aluku tolei Nebukadnejar, bo lapatio mao̒ tio helo mintaa̒ tingolo.

² Eeya helolao mai mongo woomboa otingolo lonto bangusa lo Babel, Siria, Moab wau Amon u loluwali olei Yoyakim wau helo pobinasa Yehuda, lotuuu̒de lou̒ wolo u mapilo tahuda-Lio mai lotimbulude tomongo nabi mongo wato-Lio.

³ Memangi sua̒li boito musi motoduo mai, sababu Eeya malo tahuda deu̒ bangusa lo Yehuda matapilola monto lipu uiludu mai lo Eeya olimongolio. Timongolio tapilola sababu totoonulalo dusa u hepilohutu li Olongia Manasye;

⁴ lebelebe mao̒ sababu ngoa̒amila polomatea yila-yilateelo mao̒ u pilohutulio totau-tauwalo tadiila ototala. Eeya diila lohuto longambungu mai olei Manasye sababu totoonulalo huhutuulio boito.

^5-7 Ngoilanggubu madala, lonto Dutulaa Eperat demola sipatana lo Masiri to ambahu tilayo u leituwoto madala pamalenta li olongia lo Masiri, hekiluwaasa li olongia lo Babel. Sababu uito ti olongia lo Masiri diilalo pee̒enta mao̒ yilumualai lonto lipulio u lonao̒ helopaatea. Hikaayati wewolio tomimbihu oli Olongia Yoyakim tiluladu todelomo buku Sojara Mongo Olongia lo Yehuda. Tou̒ tei Yoyakim yilate mao̒, walai̒o talolai̒ tai̒lunte Yoyakhin lowali olongia lobuulota wolio.

Tei Yoyakhin olongia lo Yehuda

⁸ Tei Yoyakhin o umulu mopulaa walu lotaunu tou̒ tio lowali olongia lo Yehuda, wau tio helo malenta to Yerusalemu tolo hula mola hiheolio. Tiilolio ilunte Nehusta walae̒e Elnatan, lonto Yerusalemu.

⁹ Debo odelo tiyamolio, tei Yoyakhin olo ilodusa to Eeya.

¹⁰ To maasa pamalenta lei Yoyakhin, pasuukani lo Babel tahe tilau̒wa lomongo polowila lei Nebukadnejar, lomaju loluhu Yerusalemu, wau helomala kota boito.

¹¹ Tou̒ kota boito donggo balabala, tei Nebukadnejar lohihilao lonao̒ mai ode Yerusalemu,

¹² Lapatao̒ ti Olongia Yoyakhin pee̒-pee̒enta woliilolio, mongo walai̒o, mongo polowilalio wau mongo pogawee lobele biluloa̒ saaha li olongialio lohudu mao̒ batanga odelei Nebukadnejar. Tulusi tei Yoyakhin tilawalio. Sua̒li boito lotoduo totaunu owalulio pamalenta lei Nebukadnejar.

¹³ Ngoa̒amila pakaakasi hulawa u hepilohutu li Olongia Salomo duo̒lo Bele lo Eeya, he ilaantulu lei Nebukadnejar. Lapatao̒ ngoa̒amila balangi ohalaga uwoluo to Bele boito wau tobele biluloa̒ saaha li olongia bilintai̒o ode Babel. Ngoa̒amila boito helo toduo mai lotuu̒ude lou̒ wolo u matilahuda mai lo Eeya tou̒ dipo-dipolulio mai.

^14-16 Ti Olongia Yoyakhin, mongo pogaweelio, wau mongo tau̒wa lo Yehuda – ngoa̒amilalo pitu lolihu lota tahimuloa lo ulipu – tilawalio wau bilintai̒o mota ode Babel. Wau olo tahi aahalia mokalaja wau taa u motota modupawate ngodaata ngolihu lota, ngoa̒amilalo tahilotola wau tahibuhelia u mopaatea. Tau-tauwalo wali mai li olongia, wau tau-tauwalo tahimuloa lo ulipu olo hebilintai̒o mota ode polayahu – ngoa̒amilalo maito ngolihu lota. Ngopee̒ ngoilanggubu ulipu lo Yerusalemu hebilintai̒o mota; taa leitolaa bolo ulipu tahi mosikinia daa̒.

¹⁷ Lapatao̒ tei Nebukadnejar lomudua̒a olei Matanya, pou̒waama lei Yoyakhin, lowali olongia lo Yehuda, wau lolomelao̒ tanggulio lowali Jedekia.

Tei Jedekia olongia lo Yehuda

¹⁸ Tei Jedekia o umulu dulo pulaa tuwau lotaunu tou̒ tio lowali olongia to Yehuda. Tio helo malenta to Yerusalemu mopulaa tuwau lotaunu mola hiheolio. Tiilolio ilunte Hamutal, walae̒e Yeremia lonto kota Libna.

¹⁹ Debo odelo ti Olongia Yoyakhim, ti Olongia Jedekia olo ilodusa to Eeya.

²⁰ Eeya lomuluka daa̒ to ulipu lo Yerusalemu wau taulo Yehuda tilinggula Eeya diilalo helo poo̒tuotai olimongolio.