OLUO MONGO OLONGIA 21 - KITABI HABARI MOPIOHE

Tei Manasye olongia lo Yehuda

¹ Tei Manasye o umulu mopulaa dulo taunu tou̒ tio lowali olongia lo Yehuda, wau tio helo malenta to Yerusalemu limo lopulaa limo lotaunu mola hiheolio. Tiilolio ilunte Hepjibah.

² Tei Manasye ilodusa to Eeya, sababu loo̒dudua̒ totoonulalo obobiasa u moleeto lo babaa-ngusawalo tamaa pilopolahi lo Eeya lonto Kanaa̒n tou̒ taulo Isirai̒lu tilumuwota ode lipu boito.

³ Tataa-mbatiyalo u hepo lubowalo dewa mai̒laantulu lei Hiskia tiyamolio luli bilongulio. Tio helo mongu memees-bawaalo u poi̒baadatiala ode Baal, wau lohutu bui̒ lo Dewi Asyera, debo odelo u hepilohutu lei Ahab olongia lo Isirai̒lu. Tei Manasye olo helolubo popoo-liyamaalo.

⁴ Eeya malo tahuda mai deu̒ Yerusalemu yito tambati owoluo lo Eeya wau tambati poi̒baadatiala to o-Lio, bo mola teto to Bele lo Eeya, tei Manasye malo mongu memees-bawaalo ode dedee-waalo.

⁵ To oluo paango Bele lo Eeya boito tio lomongu memees-bawaalo u polubowalo ode popoo-liyamaalo.

⁶ Walai̒o pilodewolio odelo bake yilalango. Tei Manasye olo helohutu kalaja tamoo-hunemawa ngongoto wolo guna-guna, tamoo-laamalia wolo momilohe popoo-liyamalo, ilimu gaibu, wau helohile potuhata to roroo-huwaalo. Tio mailaba ilodusa to Eeya tilinggula loo̒toodei omulukaa-Lio.

⁷ Hitua-hituawua debo odelo tuoto li Dewi Asyera dilutulio todelomo Bele lo Eeya, lebe-lebe pomao̒ tomimbihu tambati boito Eeya malo tahuda mai odelei Dauda wau Salomo walai̒o talolai̒ odie, “Bele-U̒ wau kota lo Yerusalemu botie, umaat ilulaotu-U̒ mai towolota lomadala opulaa dulo suku lo Isirai̒lu, deu̒yito-yito tambati u tilantu-U̒ odelo tambati poi̒baadatiala to ola-U̒.

⁸ Wau wonu umati lo Isirai̒lu modungohe ngoa̒amila palentaa-U̒ wau modudua̒ bubuu-too̒waalo uilohi odelei Musa wato-U̒ boito toli mongolio, yi Wau̒ diila tamo poluli olimongolio polahiolio monto lipu u mailohi mai ode loluuhuru limongolio.”

⁹ Bo taulo Yehuda diila lodungohe to Eeya, wau tei Manasye tumbao̒ maloo̒ sababu olimongolio helohutu duduu sawaalo ulebe moleeto wolo dusa u hepilohutu lo babaa-ngusawalo tapilolahi lo Eeya lonto Kanaa̒n tou̒ umati lo Isirai̒lu tilumuwota ode lipu boito.

¹⁰ Sababu uito lotimbulude tomongo nabi, mongo wato lo Eeya, Eeya lotahuda mai,

¹¹ “Ti Olongia Manasye moleeta daa̒. Huhutuulio lebe moleeto wolo huhutu taulo Kanaa̒n. Wolo babaa-laahalaalo u hepilo hutulio, tio maloo̒ sababu taulo Yehuda ilodusa.

¹² Sababu uito, Wau̒, Eeya Allahu Taa̒ala tahe tuboo umati lo Isirai̒lu, mamopo dungga mai baala ulaba-labaalo ode Yerusalemu wau Yehuda tilinggula timii̒du ngotaalio tamoo̒ dungoheo̒ pasali losua̒li boito mao̒oheyalo.

¹³ Yerusalemu mahukuu-maniyo-U̒ debo odelo Wau̒ lohukuumani Samaria wau lei Ahab olongia lo Isirai̒lu wau waliilio. Yerusalemu mapoo̒ belesiyo-U̒ debo odelo pingge u mailuloa wau pilopo dambao̒.

¹⁴ Ulipulio tadonggo meitolaa mapoluli-U̒ mowali mangusa to mumuusuulio, tamamohama tingolo hidihima olimongolio wau mohama boli mohehu lipu limongolio.

¹⁵ Ngoa̒amilalo boito mapo hutuwo-U̒ ode umati-U̒ sababu timongolio ilodusa to ola-U̒ wau heloo̒toodei omulukaa-U̒ anggadu loluuhuru limongolio boito yilumualao̒ lonto Masiri tunggula todulahee botie.”

¹⁶ Ngopohia helohutu mao̒ taulo Yehuda ilodusa to Eeya wolo hipolubowa balaahala, tei Manasye olo helomate yila-yilateelo mao̒ taa dadaata daa̒ tadiila ototala tilinggula duhulio tilumulohe ode utoomulalo mao̒ to Yerusalemu.

¹⁷ Hikaayati wewolio tomimbihu li Olongia Manasye wau tomimbihu duduu-sawaalo u hepilo hutulio, tiluladu todelomo buku Sojara Mongo Olongia lo Yehuda.

¹⁸ Tei Manasye yilate wau yilobungio to ilengi u pilomuloa wolo bubuu-ngawaalo wau uwewolio mao̒ lobele biluloa̒ saaha li olongia, deu̒yito-yito ilengi u pilomuloa wolo bubuu-ngawaalo wau uwewolio mao̒ lei Uja. Tei Amon walai̒o talolai̒ lowali olongia lobuulota wolio.

Tei Amon olongia lo Yehuda

¹⁹ Tei Amon o umulu dulo pulaa dulo taunu tou̒ tio lowali olongia lo Yehuda wau tio helo malenta to Yerusalemu dulo taunu mola hiheolio. Tiilolio ilunte Mesulemet walae̒e Harus, taulo Yotba.

²⁰ Debo odelo tiyamolio, tio olo hei̒lodusa to Eeya.

²¹ Tio loo̒baaya huhuu-hutuwaalo liyamolio, wau helolubo babaa-laahalaalo u hetilubo liyamolio.

²² Tio tumutumulo diila helo dudua̒ otohilaa lo Eeya, tumbao̒ malo lolaa to Eeya, Allahu Taa̒ala tahe tuboo loluuhurulio.

²³ Mongo pagawee li Olongia Amon helo waahea̒a loluwali olio wau lomate olio yila-yilateelo mao̒ tobele biluloa̒ saaha li olongia.

²⁴ Bo ulipu lo Yehuda malomate yila-yilateelo mao̒ ngoa̒amila tahe lomate yila-yilateelo mao̒ oli Olongia Amon boito, lapatao̒ lomudua̒ olei Yosia walai̒o lowali olongia.

²⁵ Hikaayati wewolio tomimbihu olei Amon tiluladu todelomo buku Sojara Mongo Olongia lo Yehuda.

²⁶ Tei Amon yilobungio tokuubulu to ilengi u pilomuloa wolo bubuu-ngawaalo wau uwewolio mao̒ lei Uja. Tei Yosia walai̒o lowali olongia lobuulota wolio.