OLUO MONGO OLONGIA 20 - KITABI HABARI MOPIOHE

Ti Olongia Hiskia ilodungga lo ngongoto wau piloo̒lulilio

¹ Tou̒ wakutu boito ti Olongia Hiskia ilodungga lobohe u tiluhua daa̒ tilinggula ngopee̒ yilate. Ti Nabi Yeasaya walae̒e Amos mota lomilohe olio wau loloi̒ya mao̒, “Eeya lolahuli mai alihu ti Baginda mopobelesi mao̒ ngoa̒amila uruusani, sababu ti Baginda diila tamoluli. Diilalo mohiheo ti Bagindaa mamaate.”

² Tei Hiskia lotitalu mao̒ ode dingingo meseeli tulusi lodua̒ mola,

³ “Yaa Eeya, ambunguolo eelailo mai deu̒ watotia botie malo tiwato ode Eeya wolo tatapu wau molotolo hilao wau tio̒otutua belesi lohilao. Watotia laito hemo tolopani modudua̒ otohilaa lo Eeya.” Lapatao̒ tei Hiskia hilumoyongo wolo suukali lohilao.

⁴ Tei Yesaya lololaa mao̒ olei Hiskia, bo tou̒ tio diipo yilumualao̒ lonto paango tohuungo bele biluloa̒ saaha li olongia, Eeya lopoa̒hu olio luli lohualingao̒

⁵ odelei Hiskia, olongia umati lo Eeya, wau lopo tunggulao̒ tahuli botie, “Wau̒, Eeya, Allahu Taa̒ala tahe tuboo lei Dauda loluuhurumu, malo dungohe dua̒amu wau loo̒onto ponumu. Wau̒ mamo poo̒luli mai olemu; ngoonu mola yio̒ mamonao̒ mota ode Bele-U̒.

⁶ Wau̒ mamuli moduhengai umulumu mopulaa limo lotaunu mola. Yio̒ wau kota Yerusalemu malopato-U̒ monto oli olongia lo Asyur. Kota botie maduo̒la-U̒ mai domi ohurumati-U̒ lohihilao wau domi daantia-U̒ wolei Dauda wato-U̒.”

⁷ Lapatao̒ tei Yesaya lopoa̒hu tau lolobuo̒ moa̒aluti daa̒ hungo lo ara wau helo pomadetao̒ to bohe li Baginda alihu tio moluli.

⁸ Ti Olongia Hiskia lohintu mao̒, “Wolo tuotio deu̒ Eeya mamo poo̒luli mai olau̒ wau deu̒ ngoonu mola wau̒ mamowali monao̒ mota ode Bele lo Eeya poli?”

⁹ Tei Yesaya lolametao̒, “Eeya mamongohi mai tuoto odeli Baginda deu̒ Eeya moe̒elai danti-Lio. Botia, toonu u otohilaa li Baginda: bayahe to polunu jamu mato lodulahu huhutu li Olongia Ahas momaju mopuulo pilito meaalo tumouli mopuulo pilito?”

¹⁰ Ualei Hiskia, “U mohutu mao̒ bayahe boito maju mopuulo pilito, gaambangi wambai̒o. Sababu uito pohutuwalo mao̒ tio tumouli mopuulo pilito.”

¹¹ Tei Yesaya lodua̒ mola ode Eeya, lapatao̒ Eeya lohutu mai bayahe boito tilumouli mopuulo pilito to polunu jamu mato lodulahu boito.

Mongo utolia lonto Babel

¹² Membideo̒ lo wakutu boito ti olongia lo Babel, deu̒yito-yito tei Merodakh-Baladan walae̒e Baladan, loo̒dungohe deu̒ ti Olongia Hiskia boheli loluli mao̒ lonto ngongoto. Yi tio lolao tau u lodelo mola tuladee wau palaseni odelei Hiskia.

¹³ Tei Hiskia helo lutulao̒ mongo utolia boito wau lopo biloheo̒ olimongolio totoonulalo okokayalio, deu̒yito-yito hulawa wau talaa̒, ramba-ramba wau winulo moonu, wau ngoilanggubu powimumuto suludadulio. Diaaluo mao̒ u hitua-tuawua tobele biluloa̒ saaha li olongia wau to ngoilanggubu yilaidialio udiila pilopo bilohio mao̒ ode limongolio.

¹⁴ Lapatao̒ ti Nabi Yesaya mota lotaalua woli Olongia Hiskia wau lohintu mao̒, “Lonto utoonu tau-tauwala boito? Wolo uali mongolio?” Tei Hiskia, “Lolametao̒ lonto Babel, lipu u molamingo.”

¹⁵ “Timongolio loo̒onto wolo u tobele biluloa̒ saaha li olongia?” yilintu mao̒ poli lei Yesaya. “Totoonulalo u hitua-hituawua!” tametao̒ lei Hiskia. “Diaaluo penu boli tuwau mao̒ todelomo tambati polahuwala halata upango tobele biluloa̒ saaha li olongia udiila pilopo bilohuu̒ mao̒ olimongolio.”

¹⁶ Lapatao̒ tei Yesaya loloi̒ya mao̒ odeli olongia, “Eeya lotahuda mai deu̒

¹⁷ mamei dungga wakutuulio totoonulalo okokaya todelomo bele biluloa̒ saaha li olongiamu wau u mailimoi̒o loluuhurumu tunggula todulahee botie, mabintao̒lio ode Babel. Diaaluo mao̒ u meitolaa.

¹⁸ Monto walao̒ wau wombumu woluo tamaa hamaalio wau powaliyolo pogawee lobele biluloa̒ saaha li olongia u momaya oli olongia lo Babel.”

¹⁹ Ti Olongia Hiskia lolametao̒, “Mopiohe olo tahuli lo Eeya upilopo tunggulumu mai olau̒.” Tio lolametao̒ odito sababu to pikiilangilio: “Asali yilaidiyau̒ debo aamani wau dame ngotupa lo tutumuluu̒.”

Pulito lo pamalenta lei Hiskia

²⁰ Hikaayati wewolio tomimbihu oli Olongia Hiskia, tomimbihu totoonulalo huhutu mopiohe wau ohuna ode taa wewo wau opahaa-lawanilio, wau waloolo mola tio helohutu kulamu wau panjura lo taluhu u potolohe lotaluhu ode kota, ngoa̒amilalo tiluladu todelomo buku Sojara Mongo Olongia lo Yehuda.

²¹ Tei Hiskia yilate, tulusi tei Manasye walai̒o lowali olongia lobuulota wolio.