OLUO MONGO OLONGIA 19 - KITABI HABARI MOPIOHE

Ti Olongia lohile potuhata toli Nabi Yesaya

¹ Tou̒ ti Olongia Hiskia loo̒dungohe podulohu lo tatoulota boito, tio malo ngaidinga pakeyangilio wau lomake kaingi kado tuotio siluukali lohilao, lapatao̒ lonao̒ mota ode Bele lo Eeya.

² Lapatao̒ tio lolao olei Elyakim, tau̒wa lobele biluloa̒ saaha li olongia, olei Sebna dulutuli lolipu, wau mongo iimamu tamaa panggola, mota lodunggaya woli Nabi Yesaya walae̒e Amos. Timongolio olo helomake kaingi kado.

³ Utieelo tahuli lei Hiskia upilopo tunggulao̒ limongolio odelei Yesaya, “Todulahee botie dulahee ilopatea, ito hilukuumani wau hilinaalio. Ito debo odelo taabua tamaa ohilaa mopotutu mai bo ilopulita lo lotolo.

⁴ Ti olongia Asyur malolao ngotaalio polowilalio talailaio̒ u lohina Allahu Taa̒ala tatumu-tumulo. Dia otaawa potala Eeya Allahu Taa̒alaamu malo dungohe polohina boito, wau mamo hukuumani mai olimongolio tahe loloi̒ya mao̒! Sababu uito podua̒alo mola ode Allahu Taa̒ala ode tahidunia olanto tadonggo hitumula.”

⁵ Lapatao̒ lololimo tahuli lonto oli Olongia Hiskia boito,

⁶ tei Yesaya lopoa̒hu mongo utolia boito helo potunggula mota totameto botie, “Eeya lotahuda mai, ti Baginda diila mao̒ oohe modungohe poloi̒laalo mongo wato li olongia lo Asyur boito deu̒ Eeya diila moo̒ lopatao.

⁷ Eeya mamohutu mai oli olongia lo Asyur mopoo̒tuoto habari tuwau udiila otutu tilinggula tio muli mohualinga ode lipulio lohihilao, wau mola teto tio mapateelio mate mateelo mao̒.”

Taulo Asyur helolao aanjamu uwewo

⁸ Polowila lo Asyur boito loo̒tapu habari deu̒ ti olongialio malo lolaa mao̒ Lakhis wau donggo hemopaatea moluwali kota Libna, diila molaminga monteeto. Yi malonao̒ mola odito polowila boito mola lodunggaya woli olongialio boito.

⁹ Ti Olongia lo Asyur malo lolimo habari deu̒ pasuukani lo Masiri tatilau̒wa lei Tirhaka olongia lo Sudan donggo dulu-dulungai mai moluhu olimongolio. Sababu uito, ti olongia lo Asyur lolao mol tuladee odelei Hiskia olongia lo Yehuda.

¹⁰ Odie mola tingohu tuladee boito, “Diila bolo o wimbuloa danti lo Allahu Taa̒alaau tahe pongakumu boito deu̒ yio̒ diila tamodehu ode uluu̒uu̒.

¹¹ Yio̒ maloo̒ dungohe deu̒ timii̒du lipu u hetiluhu lomongo olongia lo Asyur, he ilantululio sama-samaata. Diila mao̒ polantobu yio̒ moo̒lahi!

¹² Tou̒ loluuhuruu̒ helo ngantulu kota Gojan, Haran, wau Rejep, wau helomate yila-yilateelo mao̒ taulo Eden tahi biluloa̒wa to Telasari, diaaluo penu boli tuwau mao̒ dedeewaalo limongolio u helo poa̒ahu olimongolio.

¹³ Matou̒toonu mongo olongia lokota Hamat, Arpad, Separwaim, Hena wau Iwa?”

¹⁴ Tei Hiskia lololimo tuladee boito lonto mongo utolia, tulusi pilobacalio. Lapatao̒ tio lonao̒ mota ode Bele lo Eeya, wau lomua̒deo̒ tuladee boito totalu lo Eeya,

¹⁵ tulusi lodua̒ mola, ualio mao̒, “Eeya, Allahu Taa̒ala lo Isirai̒lu, tabilu-biluloa̒ toitaato malai̒kati opolipio̒, Eeya tatuwa-tuwaulo Allahu Taa̒ala tamotolo kawaasa totoonulalo bele biluloa̒ saaha li olongia to dunia. Eeyaalo talo powali mai hulungo wau dunia.

¹⁶ Eeyaau̒, ambunguolo poo̒tuotilo mai wolo udonggo todutoduo wolo mongowatotia. Ambunguolo dungohilo mai ngoa̒amila polohina lei Sanherib to Eeya, Allahu Taa̒ala tatumu-tumulo!

¹⁷ Ngoa̒amila otaawa lo mongowatotia, yaa Eeya, deu̒ mongo olongia lo Asyur malo pobinasa dadaata bangusa wau helo ngaantulu lilii-puwaalo limongolio.

¹⁸ Dedeewaalo limongolio olo pilobulio wau ilaantululio, sababu dedeewaalo boito sama-samaata diila okawasa. Dedeewaalo boito bo bui̒ lo ayu wau botu huhutu lo manusia.

¹⁹ Yaa Eeya, Allahu Taa̒ala lo mongowatotia, ambunguolo lopataalo mai mongowatotia monto tau-tauwalo Asyur boito, alihu otaawa mao̒ lo totoonulalo bangusa todunia deu̒ bo EeyaaAlo tatuwa-tuwaulo Allahu Taa̒ala.”

Tahuli lei Yesaya odeli olongia

²⁰ Lapatao̒ tei Yesaya lolao mola tahuli odeli Olongia Hiskia deu̒ odelo totameto todua̒ li olongia,

²¹ Eeya lotahuda mai, “Kota Yerusalemu hemopoi̒ii̒ wau hemohenteo̒ olemu, Sanherib.

²² Wolo otaawamu tatoonu tahe piluwayomu hilinaamu boito? Wau̒, Allahu Taa̒ala lo Isirai̒lu, Allahu Taa̒ala tamantali! Sombongi daa̒ pii̒limu to ola-U̒.

²³ Yio̒ lolao utolia u lotabibo deu̒ wolo daatalio lokaleta popaateyamu yio̒ malopo taa̒aluku huhuu-ideyaalo upulito langgatio to Libanon. Yio̒ mopo sombongi deu̒ yio̒ helo tibotao̒ bubuu-ngowaalo ayu woohulio upulito langgatio wau gaaga tutu wau tilumuwoto ode delomo oa̒ayuwalio u polodee tutu.

²⁴ Yio̒ olo helo pongaku deu̒ yio̒ longau̒dee ali wau helongilu taluhee to lilii-puwaalo tau deli, wau deu̒ mongo pajulemu helo lumbe-lumbetaa̒a Dutulaa Nili tunggula lohengu.

²⁵ Wolo diipo pee̒enta mao̒ yio̒ loo̒dungohe deu̒ ngoa̒amilalo boito mairanjana-U̒ anggadu muloololio mai? Wau botia mapo hutuwo-U̒ mai. Wau̒lo talongohi mai kawasa olemu u mongaantulu mao̒ kokoo-tawaalo o bintengi lowali tutuu-wodeyaalo.

²⁶ Tau-tauwalo taa hibiluloa̒awa mola teeto diila o lotoolo; timongolio iloohea wau mailoohe. Timongolio debo odelo huo̒oyota tohuta datahu u luasi meaalo huo̒oyota hibutua toitaato watopo bele, u mohengu mao̒ wonu hiipa lodupoto tiimuru u mopatu.

²⁷ Bo otaawa-U̒ totoonulalo u hitua-tuawua pasali lo batangamu. Otaawa-U̒ wolo u hepilo hutumu wau deu̒toonu ponao̒owamu.

²⁸ Otaawa-U̒ deu̒ yio̒ moingo daa̒ ola-U̒, wau Wau̒ maloo̒ dungohe pasali lo osombongimu boito. Botia pohuli-U̒ mao̒ pongabita to wulingumu wau lesi to tunggilumu, alihu yio̒ mowali dedeo̒o-U̒ mohualinga molibaya todalalo u pilolibayamu tou̒ lonao̒ mai.”

²⁹ Tei Yesaya lolao mola olo tahuli botie odelei Hiskia, “Utieelo u mamowali mai odelo tuotio olemu. Taunu botie wau talutalu mai tau mamo lamela pale u tumumulai lohihilao. Bo lapatao̒ uito timongolio mowali mopomulo mao̒ pale wau angguru wau molamitao̒ tilapulio.

³⁰ Taulo Yehuda tadonggo hitumula mamo maa̒mulu odelo pilomulo u modelomo daa̒ waa̒tio wau mongohi mai hungo.

³¹ To Yerusalemu wau toitaato hui̒dee Sion mawoluo mai tau-tauwalo tamoa̒ahu, sababu Eeya malolantu mai deu̒ sua̒li boito mamo toduo mai.

³² Utieelo u pilotahuda mai lo Eeya pasali li olongia lo Asyur: ‘Tio diila tatumuwota ode Yerusalemu meaalo mopomana lopana ode mantahu kota boito. Mongo pajule tao̒ porisai diaaluo tamamo himbideo̒ kota boito, wau topalitio diila tapo tihulolio buubulo pomalaawalo.

³³ Ti Olongia lo Asyur mamo hulinga molibaya todalalo u pilolibaya tou̒ lonao̒ mai, lou̒ diila tumuwota ode kota boito. Wau̒, Eeya, malo tahuda mai.

³⁴ Kota lo Yerusalemu mapo duluwa-U̒ wau duo̒la-U̒ mai domi o ohurumati-U̒ lohihilao wau domi daantia-U̒ wolo wato-U̒ tei Dauda.’ ”

³⁵ Tou̒ huilo boito Malai̒kati lo Eeya lonao̒ mai ode kema taulo Asyur, wau helomate yila yilateelo mao̒ ngohetuto walu lopulaa limo lolihu lota pajule. Loloombulio mola didimodupo mimii-lateyaalo limongolio bolo hipule-pulepeyalo mao̒.

³⁶ Yi matilumouli tei Sanherib olongia lo Asyur wau lohualinga ode Niniwe.

³⁷ Todulahee tuwau, tou̒ tio hemo ibaadati todelomo kuili lo Dewa Nisrokh, tio pilatelio yila-yilateelo wolo wamilo lei Adramelekh wolei Sarejer, mongo walai̒o talolai̒. Lapatao̒ uito timongolio tilumeteo̒ ode lipu lo Ararat. Yi tei Esarhadon, walai̒o talolai̒ uwewo, lowali olongia lobuulota wolio.