OLUO MONGO OLONGIA 18 - KITABI HABARI MOPIOHE

Tei Hiskia olongia lo Yehuda

¹ To taunu otolulio pamalenta li Olongia Hosea walae̒e Ela to Isirai̒lu, tei Hiskia walae̒e Ahas lowali olongia lo Yehuda.

² Tou̒ boito tio o umulu dulo pulaa limo lotaunu wau tio helo malenta to Yerusalemu dulo pulaa tio lotaunu mola hiheolio. Tiilolio ilunte Abia walae̒e Jakaria.

³ Tei Hiskia helohutu u loo̒sanangi hilaa lo Eeya debo odelo ti Olongia Dauda loluuhurulio.

⁴ Tio helo ngantulu tataa-mbatiyalo u polubowalo dewa, wau lopo lohubeo̒ tutuugulio wau helo ngantulu bubuu-iyaalo Dewi Asyera. Tio olo longantulu mao̒ tulidee lo polonggu huhutuulio lei Musa u ilunte Nehustan. Sababu, tunggula tou̒ boito taulo Isirai̒lu donggo hipomobua dupa u mohurumati tulidee polonggu boito.

⁵ To wolota lo ngoa̒amila olongia lo Yehuda, mopio tadipo dipolulio mai meaalo lapatio mao̒ lei Hiskia, diaaluo tadebo odelo tio. Tio palacaya to Eeya, Allahu Taa̒ala lo Isirai̒lu,

⁶ wau tatapu molotolo hilao to o-Lio. Diila pee̒enta mao̒ tio helo luwali to Eeya. Totoonulalo palenta lo Eeya uilohi lotimbulude olei Musa, hedilungohe lei Hiskia lou̒ tio̒otutua.

⁷ Uito sababuulio Eeya debo helo tuulungi mai olio tilinggula tio ilohaasili todelomo totoonulalo tolopanilio. Tio helo mintaa̒a tingolo toli olongia Asyur, wau diila mohuto taa̒aluku to olio.

⁸ Tio lopoo̒laaheo̒ taulo Pilistin, wau lolambata tambati biluloa̒a limongolio, monto kambungu ulabaalo kikiio̒ tunggula kota uleidaa̒ tutu, leituwoto Gasa wau madala to palitio.

⁹ To taunu opatio pamalenta lei Hiskia, deu̒yito-yito totaunu opitulio pamalenta li Olongia Hosea to Isirai̒lu, tei Salmaneser olongia lo Asyur loluhu Isirai̒lu wau helomala Samaria.

¹⁰ Lapatao̒ bilalaalio tolo taunu mola hiheolio, Samaria lodehu. Uito helo toduo totaunu olomolio pamalenta lei Hiskia, wau taunu otiolio pamalenta lei Hosea.

¹¹ Lapatao̒ ti olongia Asyur helo mintaa̒a taulo Isirai̒lu odelo tawalo ode Asyur; ngotayadi mongolio pilopo tambatilio tokota Halah, ngotayadu totili lo Dutulaa Habor tomadala Gojan, wau ngotayade poli to kokoo-tawaalo tolipu lo Madai.

¹² Samaria lodehu sababu taulo Isirai̒lu diila helo dungohe to Eeya, Allahu Taa̒ala limongolio. Timongolio diilalo loe̒ela mola daantia u pilohutu mai lo Eeya woli mongolio, wau timongolio helo lambanga ngoa̒amila palenta lei Musa, wato-Lio. Timongolio diila lohuto lodungohe wau diila lohuto loduduo̒.

Taulo Asyur helo ngaanjamu Yerusalemu

¹³ To delomo taunu opulaa pato pamalenta lei Hiskia olongia lo Yehuda, kokoo-tawaalo Yehuda u obintengi hetiluhu wau ilolaahe lei Sanherib, olongia lo Asyur.

¹⁴ Yi to olei Sanherib tawoluo to Lakhis, tei Hiskia lolao mola habari botie, “Watia mai̒lo totala. Sababu uito, watia momolohone potala ti Tuani mopohuheli moluhu olamiaatia. Ngoa̒amila hihiile li Tuani mapoo̒polu mai lo watia.” Tei Sanherib lolameta mota deu̒ tei Hiskia musi molao mai ode olio mopuulo lihu lokilo talaa̒, wau ngolihu lokilo hulawa.

¹⁵ Sababu uito, ngoa̒amila talaa̒ uwoluo todelomo Bele lo Eeya wau todelomo kasi lobele biluloa̒ saaha li olongia heilao lei Hiskia odelei Sanherib.

¹⁶ Hulawa to huhuu-hebuwaalo Bele lo Eeya wau u mapilasi lei Hiskia lohihilao to kokoo-sengiyaalo huhebu, hilamalio wau heilaolio odelei Sanherib.

¹⁷ Bo ti olongia Asyur boito helolao lonto Lakhis ngopasuukani leidaa̒ u loluhu Yerusalemu. Pasuukani boito hetilau̒wa lo polowila toulota hilaia̒awa deu̒yito-yito ngotaalio eyaanggu, ngotaalio julu minumani, wau ngotaalio tau̒wa lo tamoo-kawalia li olongia. Tou̒ leidungga mola ode kota boito timongolio helohama tambati to halabolu, u ilunte Halabolu Binatu totili lotanggi u hemopo tolohei taluhu monto kuulamu to wimbihu tudulio.

¹⁸ Lapatao̒ timongolio longuatia̒ mota helo tianga oli Olongia Hiskia. Yi toulota pogawee lei Hiskia yilumualai mota lodunggaya woli mongolio. Pogawee toulota boito yito tei Elyakim walae̒e Hilkia tau̒wa lou̒ ngaalaa̒ lobele biluloa̒ saaha li olongia, tei Sebna dulutuli lolipu, wau tei Yoah walae̒e Asap dulutuli lobele biluloa̒ saaha li olongia.

¹⁹ Tala ngota polowila lo Asyur boito loloi̒ya mao̒ ode limongolio, “Potunggula mota odelei Hiskia loi̒ya li olongia botie, ‘Yilongola yio̒ molaasa batangamu molotolo?

²⁰ Harapumu bo wolo loloi̒ya wambao̒ moo̒ tuloa̒a siaasati wau olootolo suludadu? Tatoonu tahe pongakumu, tilinggula yio̒ buheli moluwali Asyur?

²¹ Yio̒ memangi hemo harapu bantua lo Masiri, bo uito tutuuwauwa debo odelo momake batango papaa-dengowalo u pohunaalo mowali tunggudu; de tunggudu boito mamoboli wau uluu̒mu otuhialio. Odi-oditoolo mola ti olongia lo Masiri ode ngoa̒amila taa u hemo harapu to olio.’ ”

²² Wumbutio mola polowila boito loloi̒ya mao̒, “Meaalo otanu timongoli moloi̒ya deu̒ timongoli hemo harapu to Eeya, Allahu Taa̒ala limongoli? Tou̒ tei Hiskia helo malentao̒ alihu taulo Yehuda wau Yerusalemu bo moi̒baadati mao̒ totalu lomesba to Yerusalemu, diila maa uitoolo mesba u hepilo binasaalio boito wau tataa-mbatiyalo polubowalo ode Eeya lohihilao?

²³ Botia to tangguli olongia lo Asyur wau̒ buheli mobataru mai deu̒ wonu timongoli wohiyalo dulo lihu wadala, tantu timongoli diila tao̒ tau ngodaata leeto u motitae̒ mao̒!

²⁴ U moluwali polowila lami penu boli tamailaba mao̒ dupadupaapa daa̒, timongoli diila oboliilio. Bo timongoli hemo harapu olo deu̒ Masiri molao wau momantu mai wolo kaleta lo popaatea wau pasuukani owadala!

²⁵ Helantobu limongoli deu̒ ami moluhu wau mopoo̒laaheo̒ lipumu lou̒ diila bantua mai lo Eeya? Eeya wambai̒o talo poa̒hu mai olami u moluhu wau mopoa̒ntulu mao̒!”

²⁶ Lapatao̒ ualei Elyakim, Sebna, wau lei Yoah ode polowila boito, “Tuani, pobisalaalo mai todelomo bahasa lo Aram wolamiaatia, amiaatia mongalati. Diila mao̒ pomake bahasa lo Ibrani, de otaawa lo ulipu toitaato dingingo meeseli lokota boito.”

²⁷ Ualo polowila boito, “Wolo bo ode limongoli wau odeli olongiamu wambai̒o wau̒ yiloa mai li olongia Asyur u mopo tunggulai ngoa̒amila botie? Diila! Wau̒ olo mobisala mao̒ ode ulipu tahi huloa̒a to dingingo meeseli boito, tapee̒-pee̒enta woli mongoli mamolamelao̒ bountulio lohihilao wau mongilu loloiliilio lohihilao.”

²⁸ Lapatao̒ polowila boito tilimihulao̒ wau longuatio̒ mola todelomo bahasa lo Ibrani, “Dungohi mai wolo uiloi̒ya li olongia Asyur:

²⁹ ‘Diila mao̒ pohuto yimbulowa lei Hiskia; tio diila mowali mopoa̒ahu olimongoli.

³⁰ Diila mao̒ podungohu paalutolio u motiwunela to Eeya. Diila mao̒ polantobu deu̒ Eeya mamopoa̒ahu mai olimongoli wau molanggu suludadu lo Asyur malambata kota limongoli.

³¹ Diila mao̒ podungohu olei Hiskia. Wau̒, olongia lo Asyur mopoe̒elai alihu timongoli lumualao̒ monto kota wau mohudu mai batanga. De timongoli mowali molamelao̒ hungo lo angguru monto ilengimu lohihilao, wau moo̒ lamitao̒ hungo lo ara monto bungo lo ayumu lohihilao, wau mongilu taluhu monto alimu lohihilao,

³² dilumutu timongoli limbatou̒ mola ode lipu tuwau udebo odelo lipumu lohihilao. Mola teto woluo ilengi lo angguru u mongohi tilapulo angguru olimongoli, wau halabolu lopale u mongohi tilapulo labu duo̒lo ua̒alo. Tolipu boito woluo dadaata bungo lo ayu jaitun, winulo jaitun wau hula lotiia̒. Wonu timongoli modungohe wolo u potuhaatau̒ mai olimongoli, yi timongoli matumumulo, diila mate. Diila mao̒ podungohe olei Hiskia! Tio bo hemo himbulo olimongoli wolo loi̒ya deu̒ Eeya mamo poa̒ahu mai olimongoli.

³³ Wolo mapee̒enta woluo dewa lobangusa wewo helo poa̒ahu lipulio lonto okokawasaau̒?

³⁴ Tou̒toonu dedeewaalo lipu lo Hamat wau Arpad? Tou̒toonu dedeewaalo Separwaim, Hena, wau Iwa? Wolo woluo talonao̒ mai helo poa̒ahu Samaria?

³⁵ Dewa toonu mapee̒enta helo lopato lipulio lonto okokawasaau̒? Diila pongalo aakali Eeya mopoa̒ahu mai Yerusalemu?’ ”

³⁶ Loo̒dungohe uito, ulipu lo Yerusalemu diila lolameto, sababu ti Olongia Hiskia malo malentao̒ alihu timongolio motipoo̒oyo wambao̒.

³⁷ Yi tei Elyakim, Sebna, wau tei Yoah helo ngedenga pakeyangi limongolio tuotio siluukali lohilao, tulusi mota lopo duloheo̒ toli olongia wolo u mailoi̒ya polowila lo Asyur boito.