OLUO LO SAMUEL 9 - KITABI HABARI MOPIOHE

Tei Dauda wolei Mepiboset

¹ Tou̒ dulahee tuwau tei Dauda lohintu mao̒, “Wolo donggo woluo taa hitumula towolota ngaalaa̒ lei Saul? Wonu woluo wau̒ ohilaa mohutu mao̒ u mopiohe olio domi tei Yonatan.”

² Ngaalaa̒ lei Saul o wato tai̒lunte Jiba, wau tio pilei̒ taalualio woli Olongia Dauda. Ti olongia malohintu olio, “Mayio̒olo tei Jiba?” “Saaya, Baginda,” tametio mao̒.

³ Lapatao̒ ti olongia luli lohintu, “Donggo woluo taa hitumula lonto ngaalaa̒ lei Saul? Wau̒ ohilaa mohutu u mopiohe to olio, debo odelo u mapilo dantiu̒ to Allahu Taa̒ala.” Tei Jiba lolametao̒, “Donggo woluo ngotaalio walao̒ talolai̒ lei Yonatan. Tio penggo.”

⁴ “Tou̒toonu tio?” uali olongia. “To Lodebar, tobele lei Makhir walae̒e Amiel,” tametao̒ lei Jiba.

⁵ Lapatao̒ ti Olongia Dauda malei̒ tiangai walao̒ talolai̒ lei Yonatan boito.

⁶ Walao̒ talolai̒ lei Yonatan boito tai̒lunte Mepiboset. Tou̒ tio lonao̒ mai, tio losujudulo mola lohurumati olei Dauda. Tei Dauda lohimelu olio, wau malo loi̒ya, “Mepiboset,” wau tio lolametao̒, “Saaya, Baginda.”

⁷ Tei Dauda loloi̒ya mao̒, “Diila mao̒ oohe. Wau̒ mamo pomuura mai lohilao ode olemu domi tei Yonatan tipaapamu. Ngoa̒amila libaapumu Saul mamuli wohiu̒ mai olemu wau u ohiheo-hiheolo mao̒ yio̒ mowali molamela tobele biluloa̒ saaha li olongio.”

⁸ Tei Mepiboset luli losujudu lomola wau loloi̒ya mao̒, “Wolo boliilio watotia botie! Yilongola ti Baginda odito piohio to watotia?”

⁹ Lapatao̒ ti olongia lotiangai olei Jiba wato lei Saul boito, wau loloi̒ya mao̒, “Ngoa̒amilalo upango u tilolaa mao̒ lei Saul wau ngaalaa̒lio mawohiu̒ mao̒ ode wombu li tuanimu botie.

¹⁰ Yio̒ wau mongo walau̒mu boli tamoo-mantua olemu musi mokelakela mao̒ huta boito ode ngaalaa̒ li tuanimu Saul, wau wohia mao̒ tilapulo huta boito ode limongolio u mopo tuhetao̒ u palaluo limongolio. Bo tei Mepiboset mowali molamela tobele biluloa̒ saaha li olongia ohiheo-hiheolo mao̒.” (Tei Jiba owalao̒ mongo lolai̒ mopulaa limo lota wau wato dulopulu lota).

¹¹ Tei Jiba lolametao̒ odeli olongia, “Ngoa̒amila palenta li Baginda mapohutuo mao̒ lowatotia.” Oditolio tei Mepiboset malo lamela pee̒-pee̒enta woli olongia, debo odelo walao̒ talolai̒ li Olongia Dauda lohihilao.

¹² Tei Mepiboset owalao̒ talolai̒ tai̒lunte Mikha. Ngoa̒amila pongawaa̒ ngaalaa̒ lei Jiba lowali mongo wato lei Mepiboset.

¹³ Odi-odieelo mola tei Mepiboset tao̒ aibu to oa̒atio mohu-mohualia boito malo tibiluloa̒ to Yerusalemu wau laito hemo lamela tobele biluloa̒ saaha li olongia.