OLUO LO SAMUEL 7 - KITABI HABARI MOPIOHE

Tahuli lei Natan odelei Dauda

¹ Eeya helo duo̒lai oli Olongia Dauda lonto totoonulalo toloso lomusulio, tilinggula tio loo̒ tatapu todelomo bele biluloa̒ saaha li olongialo.

² Yi malo loi̒ya ti olongia odeli Nabi Natan, “Bilohi, wau̒ botie bilu-biluloa̒ tobele biluloa̒ saaha li olongia u pilohutu lonto ayu woohu lo Libanon, lebe-lebe pomao̒ Bulua Daantia lo Allahu Taa̒ala bo tilahulio todelomo kema wambao̒!”

³ Tametao̒ lei Natan, “Pohutuwalo totoonulalo niyati li Baginda, sababu Eeya mamo tulungi mai oli Baginda.”

⁴ Bo tou̒ hui boito Eeya lotahuda mai odelei Natan,

⁵ “Ponao̒lo wau mota potunggula mao̒ ode wato-U̒ tei Dauda tahuli-U̒ botie, ‘Diila pongalo aakali yio̒ tamopo tihulao̒ bele ode ola-U̒.

⁶ Tumulalo mao̒ bangusa lo Isirai̒lu bilebasiya-U̒ mai lonto Masiri tunggula botia, diipo pee̒enta mao̒ Wau̒ litibiluloa̒ todelomo bele ngowale, bo laito hemonao̒ ode utoonulalo mao̒ wau helo tibiluloa̒ todelomo kema ngowale.

⁷ Ngotilonggadu Wau̒ helonao̒ ode utoonulalo mao̒ wolo bangusa lo Isirai̒lu, diipo pee̒enta mao̒ Wau̒ helohintu tomongo tau̒wa tamaa tilulaotu-U̒, wolo sababuulio timongolio diila mopo tihulao̒ bele monto ayu woohu lo Libanon ode Olau̒.’

⁸ Sababu uito, Natan, polelea mao̒ towato-U̒ tei Dauda, deu̒ Wau̒, Eeya Taa Laba-labaalo kawasa, lotahuda mai olio, ‘Yio̒ mahilama-U̒ lonto kalajaamu hemo himbala himba tohuta datahu wau luasi wau piluduo̒o-U̒ lowali olongia to umati-U̒ Isirai̒lu.

⁹ Wau̒ maloduo̒la olemu penu boli ode utoonu pilonao̒wamu, wau ngoa̒amila musuumu mapilo binasa-U̒ tou̒ yio̒ helopaatea. Yio̒ mapohutuwo-U̒ mai masa-masaahuru debo odelo mongo tau̒wa talaba-labaalo udaa̒ todunia.

^10-11 Donggo poli, duo̒lo umati-U̒ Isirai̒lu mapilopo dapato-U̒ mao̒ tambati wau ilahula-U̒ timongolio motitatapu teto, alihu timongolio mowali tumumulo duo̒duo̒to, diilalo marosaalio. Tumulalo mao̒ nonao̒ mai limongolio ode huta botie omoo̒molu, wau he piluduu̒-U̒ mao̒ mongo tau̒wa ode limongolio, timongolio matiluhu lotaa u hiparangia, bo sua̒li boito diilalo motoduo mai. Wau̒ modanti mai deu̒ yio̒ maa aamani monto totoonulalo musu, wau Wau̒ mamongohi mai wali olemu.

^12-13 De, wonu mamei dungga opopatemu, wau yio̒ lobungo to pilolobungalio loluuhurumu, yi ngotaalio monto walau̒mu talolai̒ mapuduo̒-U̒ mowali olongia. Tiolo tamaa mopotihulao̒ bele ola-U̒. Yilaidialio mapoo̒ toheeto-U̒ wau u ohiheo-hiheolo mao̒ ngotaalio lo waliilio mola mamo malenta odelo olongia.

¹⁴ Wau̒ mamowali ti paapalio, wau tio mamowali walau̒u-U̒ talolai̒. Wonu bolo tio mohutu totala, tio mahukuu-maniyo-U̒ debo odelo ngotaalio lotiyamo mohukuumani walai̒o.

¹⁵ Bo Wau̒ debo mamohutu mai mopiohe olio tutuuu̒de wolo danti-U̒ mai. Danti-U̒ to olio debo madihima-U̒, diila debo odelo u hepilohutu-U̒ to olei Saul tamaa pilopohei-U̒ lonto huhuloa̒lio alihu yio̒ mowali olongia.

¹⁶ Yio̒ malaito o wali mola, wau Wau̒ mamohutu mai yilaidiamu motaahangia ohihieo-hiheolo mao̒. U ohihieo-hiheolo mao̒ ngotaalio monto walimu mola mamomalenta odelo olongia.’ ”

¹⁷ Lapatao̒ tei Natan helo poo̒taa mao̒ odelei Dauda ngoa̒amila u mapiloo̒ patatai lo Allahu Taa̒ala olio.

Dua̒ syukuru lei Dauda

¹⁸ Lapatao̒ tilumuwotao̒ ti Olongia Dauda ode delomo Kema lo Eeya. Tio lotihuloo̒ wau malodua̒, “Yaa Eeya Taa Laba-labaalo molanggato, watotia wau ngaalaa̒ lowatotia diila patuti mololimo totoonulalo u opopiohu u pilopo bilohei lo Eeya to watotia ngotilonggadu botie.

¹⁹ Tumbao̒ Eeya helohutu mai lebe mopioheo̒ leeto, yaa Eeya Taa Laba-labaalo molanggato; Eeya malodanti mai tomimbihu wali mola lo watotia tomaasa udungga-dungga mai. Wau pilopo bilohei lo Eeya sua̒li boito ode watotia, eleponu watotia bo manusia wambao̒, yaa Eeya Taa Laba-labaalo molanggato!

²⁰ Ambunguolo donggo wolo poli u mowali loi̒ya mai lo watotia ode Eeya? Eeya motota totoonulalo mao̒ tomimbihu wato lo Eeya botie.

²¹ Domi Danti lo Eeya wau hilaa lo Eeya lohihilao Eeya helohutu mai huhutu leidaa̒ boito u longaajali mai wato lo Eeya botie.

²² Eeya otutu udaa̒, yaa Eeya Allahu Taa̒ala! Bo Eeyaalo Allahu Taa̒ala, diaaluo tamo tutuuwauwa wolo Eeya. Aambunguolo otaawa lo mongowatotia sua̒li boito sababu mapiloo̒taa mai lo Eeya anggadu muloololio mai.

²³ To ngoilanggubu dunia diaaluo bangusa debo odelo bangusa lo Isirai̒lu. Bangusa lo Isirai̒lu tuwa-tuwaulio bangusa tamaa yilopatai lo Eeya lonto polowato u lowali umati-Mu lohihilao. Ngoa̒amila huhutu leidaa̒ wau moo̒linggolabu u pilohutu mai lo Eeya odeli mongolio, helohutu mao̒ tanggulo Eeya masa-masaahuru to ngoilanggubu dunia. Babaa-ngusawalo wewo wolo dedee-waalo limongolio mapilo polahi lo Eeya tou̒ umati-Mu lomaju helopaatea.

²⁴ Bangusa lo Isirai̒lu mapilowali lo Eeya umati lo Eeya lohihilao u ohiheo-hiheolo mao̒, wau Eeya yaa Eeyaau̒, mowali Allahu Taa̒ala limongolio.

²⁵ Wau botia, yaa Eeya Allahu Taa̒ala, ambunguolo potala Eeya mopoo̒ toheetai u ohiheo-hiheolo mao̒ danti u yilapalao̒ lo Eeya tomimbihu batanga lo watotia wau wali mola lo watotia. Ambunguolo potala Eeya moponao̒ mao̒ wolo u madilanti mai lo Eeya boito.

²⁶ Penu boli tou̒toonu tau malaito mopou̒daa̒ mola tanggulo Eeya wau moloi̒ya, ‘Eeya Taa Laba-labaalo kawasa yito Allahu Taa̒ala lo Isirai̒lu.’ Yi u ohiheo-hiheolo mao̒ ngotaalio lo walimola lowatotia mamo malenta odelo olongia to bangusa botie.

²⁷ Eeya Taa Laba-labaalo kawasa! Ambunguolo watotia mopobuheli batanga lo watotia momolohone mola moli dua̒ botie ode Eeya, sababu Eeya lohihilao malo poo̒taa mai ode watotia deu̒ walao̒ wombu lo watotia wawaalia mola powalio lo Eeya olongia to bangusa botie.

²⁸ Yaa Eeya Taa Laba-labaalo molanggato, Eeyaalo Allahu Taa̒ala; ngoa̒amila danti lo Eeya ileela mai lo Eeya, wau sua̒li u molamahu boito mapilo danti mai lo Eeya ode watotia.

²⁹ Sababu uito, watotia momolohone, ambunguolo potala Eeya mobalakati mai wali mola lo watotia alihu ohiheo-hiheolo mao̒ timongolio debo moo̒toduo ponu lo Eeya. Yaa Eeya Taa Laba-labaalo molanggato, ngoa̒amila boito mapilo danti mai lo Eeya, yi wali mola lo watotia debo mabalakatia mai lo Eeya u ohiheo-hiheolo mao̒.”