OLUO LO SAMUEL 6 - KITABI HABARI MOPIOHE

Bulua Daantia dilelolio ode Yerusalemu

¹ Lapatao̒ tei Dauda luli lotiangai mongo pajule tahipiohe daa̒ to Isirai̒lu alihu motia̒mbu, jumulaalio tolopulu lolihu lota.

² Timongolio dilelolio lotidulunga ode Baale-Yehuda, u lohama mola lonteto mai Bulua Daantia u ilunte wolo tanggulo Eeya Laba-labaalo kawasa tahulo-huloo̒ toitaato mamaa-haalukuwalo sologawi.

³ Bulua Daantia boito hilamalio lonto bele lei Abinadab toitaato huludu wau pilotae̒lio toitaato goroba u bohu. Lapatao̒ tei Uja wolei Ahio, mongo walae̒e Abinadab helo lunehe goroba boito; tei Uja lonao̒ totiliilio,

⁴ wau tei Ahio lonao̒ totalulio.

⁵ Tei Dauda wolo ngoilanggubu bangusa lo Isirai̒lu hinao̒wa totalu lo Bulua boito sambela hipongelu-ngelungawa lou̒ tio̒opatea wau hipolahu-lahua mola u mohurumati to Eeya. Timongolio hipoitohe kocapi, gaambusi, rabana, taa̒apo, wau simbali.

⁶ Tou̒ timongolio leidungga mota to tambati polumbetaa̒ala pale miliki lei Nakhon, sasaa-piyaalo u hemodedea̒ goroba boito leteduo̒, lapatao̒ tei Uja malolame wau lodihu mao̒ Bulua Daantia boito alihu diila modehu.

⁷ To saaa̒tilo boito Eeya Allahu Taa̒ala malo muluka mai to olei Uja, sababu huhutuulio boito debo odelo mohina to Eeya. Uitolo sababuulio tei Uja pilate lo Eeya yila-yilateelo mao̒ to tambati boito, totili lo Bulua Daantia.

⁸ Yi tumulalo mai to saaa̒ti boito tambati boito iluntelio Peres-Uja Tei Dauda loingo sababu Eeya malo pobinasa mai olei Uja.

⁹ Bo tei Dauda moohe olo to Eeya wau malo loi̒ya, “Botia woloolo mola Bulua Daantia boito mowali deloou̒?”

¹⁰ Sababu uito tio diilalo lohuto lodelo Bulua Daantia boito ode Yerusalemu, bo malolahu mao̒ tobele lei Obed-Edom taulo Gat.

¹¹ Bulua Daantia boito bilu-biluloa̒ teto tolo hula mola hiheolio, wau ngotilonggadu Bulua Daantia boito teto, Eeya helo balakati mai Olei Obed-Edom wau ngaalaa̒lio.

¹² Tei Dauda loo̒dungohe deu̒ Eeya helo balakati mai ngaalaa̒ lei Obed-Edom wau tilolahepaalo milikiilio sababu Bulua Daantia boito. Yi tio malonao̒ ode bele lei Obed-Edom, wau lohama Bulua boito lopo limbatao̒ ode Yerusalemu wolo lameyangi daa̒.

¹³ Tou̒ taa u hipotaala Bulua Daantia malo diambangao̒ wolomo diambango, tei Dauda lopoa̒hu olimongolio lohuheli. Lapatao̒ tio lopodewo bake ode Eeya, deu̒yito-yito sapi ulai̒ wau walao̒ sapi u pilopo lingohu.

¹⁴ Lapatao̒ tei Dauda helo ngelu-ngelungo wolo lealeaatu lo sumangati u mohurumati to Eeya. Tou̒ boito tio bo pakepake palipa limbulimbu lo lineni u pilopo bintolo to wohutalio.

¹⁵ Odi-odieelo mola tei Dauda wau ngoilanggubu ulipu lo Isirai̒lu lopolimbata Bulua Daantia boito ode Yerusalemu, wau hetilunuhe wolo tinga-tingalao̒ sababu meengahe wau tingohu torompeti.

¹⁶ Tou̒ Bulua boito donggo delodelo pilopo tuwoto ode delomo kota, ti Mikhal puusili lei Saul lotitulo mota lonto tutuloa loo̒onto oli Olongia Dauda tayangao̒-tayangao̒ wau elungao̒-elungao̒ hemo hurumati to Eeya, wau ti Mikhal lolaasa lolonuo̒ loo̒onto olei Dauda.

¹⁷ Bulua Daantia boito pilodutulio to tambatilio todelomo kema u mapilohuli lei Dauda ode Bulua boito. Lapatao̒ tei Dauda helo podewo bake yilalango wau bake lo polodame ode Eeya.

¹⁸ Tulusi tio lobalakati mao̒ ulipu lo Isirai̒lu wolo tanggulo Eeya Taa Laba-labaalo kawasa.

¹⁹ Lapatao̒ tio helo laya-layadeo̒ ua̒alo odeli mongolio ngoa̒amila. Timii̒du taa uwoluo teto mopio mongo lolai̒ meaambo mongobua yilohiyalio tapu pilanggangi ngopita, roti wau kuukisi kisimisi. Lapatao̒ uito timongolio malo hualinga mota ode belelio ngota-ngota.

²⁰ Tou̒ tei Dauda lohualinga ode bele biluloa̒ saaha li olongia umlongohi salamu ode ngaalaa̒lio, ti Mikhal yilumualai lodunggaya wolei Dauda wau loloi̒ya mao̒, “Todulahee botie olongia lo Isirai̒lu tio̒otutua helohutu batangalio huru-hurumati! Tio malo tilaala debo odelo taa abaloolo tadiila motota moolito totalu lomongo wato taabua miliki lo mongo pogawee lobele biluloa̒ saaha li olongia!”

²¹ Tei Dauda lolametao̒, “Wau̒ helo ngelungo u lohurumati to Eeya, tamalo potouli oli paapamu wau ngaalaa̒mu, lapatao̒ lolulaotao̒ olau̒ lowali tau̒wa lo Isirai̒lu, umati-Lio. Sababu uito wau̒ madebo mongelungo u mohurumati to Eeya.

²² Tumbao̒ wau̒ dapa-dapato hinaalio lebe mao̒ lou̒ engontie. Mowalilo olo yio̒ momiloheo̒ olau̒ dupadupapa, bo mongowato tailuntemu engontie, mamo masisi olau̒!”

²³ Ti Mikhal, puusili lei Saul boito diila he ilowalao̒ ngotupa lo tutumulio.