OLUO LO SAMUEL 5 - KITABI HABARI MOPIOHE

Tei Dauda lowali olongia lo Isirai̒lu wau Yehuda

¹ Lapatao̒ uito malonao̒ mai ngoa̒amila tau̒wa lo susuu-kuwaalo Isirai̒lu odelei Dauda to Hebron wau loloi̒ya mao̒, “Amiaatia botie tamani li Baginda.

² Tumulalo mai omoo̒omolu, tumbao̒ tou̒ tei Saul donggo hemo malenta olamiaatia, ti Baginda olo helodelo suludadu lo Isirai̒lu timii̒du timongolio momaju mopaatea, tidiyolo Eeya malodanti mai odeli Baginda deu̒ ti Bagindaalo tamamo titau̒wa to umati-Lio wau mowali olongia limongolio.”

³ Tei Dauda lohutu mao̒ daantia wolo mongo tau̒wa lo Isirai̒lu boito, lapatao̒ timongolio malo mudua̒ olio lowali olongia lo Isirai̒lu.

⁴ Tei Dauda o umulu tolo pulu lotaunu tou̒ tio lowali olongia, wau tio helo malenta wopato pulu lotaunu mola hiheolio.

⁵ To Hebron tio helo malenta Yehuda ngotilonggadu pitu lotaunu wau ngoputu, wau to Yerusalemu tio helo malenta ngoilanggubu Isirai̒lu wau Yehuda ngotilonggadu tolo pulaa tolo taunu.

⁶ Tou̒ dulahu buka tuwau ti Olongia Dauda wau tahidudua̒ olio lomonggato ohilaa moluhu Yerusalemu. Taulo Yebus ulipu lokota boito, helo lantobu deu̒ tei Dauda diila tamoo̒ laaheo̒ Yerusalemu. Sababu uito timongolio loloi̒ya olio, “Yio̒ diila tamoo̒ tuwotai odia; penu boli tahi piitoa̒ wau tahi peenggowa mambo moo̒ polontulao̒ olemu.”

^7-9 Tei Dauda loloi̒ya mao̒ to tahidudua̒ olio, “Wolo woluo tewe taa u molonuo̒ to taulo Yebus tutuuwauwa debo odelo wau̒ molonuo̒ olimongolio? Wolo malo odito lonui̒o tilinggula tio ohilaa daa̒ momate olimongolio mate-mateelo mao̒? Wonu odito, tuwotolo molibaya tanggi lotaluhu wau tuhuwalo tahi peenggoa wau pitoo̒ u olonuu̒uu̒ boito.” (Uitolo sababuulio tau loloi̒ya, “Taa pitoo̒ wau taa penggo diila mowali tumuwota ode Bele lo Eeya.”) Tei Dauda loo̒ lambatao̒ biintengi lo Sion wau hiluloa̒lio. Tio longunte mao̒ Sion boito “Kota lei Dauda”. Kota boito bilongulio topalito biintengi boito, tumulalo mao̒ monto ambahu tiimuru lohuludu u pilopo lenggelio mola wolo huta.

¹⁰ Tei Dauda lebe hihiiheo mao̒ lebe hemo lotola mola, sababu Eeya, Allahu Taa̒ala Taa Laba-labaalo kawasa hemo tulungi mai olio.

¹¹ Ti Olongia Hiram lonto lipu lo Tirus helolao mongo utolialio odelei Dauda, wau olo ayu woohu lo Libanon wau mongopani lo ayu wau mongopani lobotu u lomongu bele biluloa̒ saaha li olongia.

¹² Sababu uito tei Dauda molaasa yakini deu̒ Eeya malo popidudutai olio odelo olongia lo Isirai̒lu, wau lopotohetao̒ bele biluloa̒ saaha li olongialio duo̒lo polohuna daa̒ ode umati lo Eeya.

¹³ Lapatio mao̒ tei Dauda lolimbata lonto Hebron ode Yerusalemu, tio lodiilea poli wolo dengolo lota mongobua wau helohama olo dengolo lota mongobua lowali pipialio; yi iloduhengalo mola walai̒o talolai̒ wau taabua.

¹⁴ Walai̒o mongo lolai̒ tahe pilotutulio mai to Yerusalemu yito: Syamua, Sobab, Natan, Salomo,

¹⁵ Yibhar, Elisua, Nepeg, Yapia,

¹⁶ Elisama, Elyada wau Elipelet.

Ohohaama to taulo Pilistin

¹⁷ Tou̒ taulo Pilistin loo̒dungohe deu̒ tei Dauda piludui̒o malowali olongia lo Isirai̒lu, yi timongolio malonao̒ mai ohilaa moheu̒pa olio. Bo tei Dauda loo̒dungohe sua̒li boito, tulusi tio malonao̒ ode biintengi.

¹⁸ Taulo Pilsitini leidungga to Lumbaya Repaim wau hiluloa̒lio.

¹⁹ Tei Dauda lohintu ode Eeya, “Wolo wajibu watotia moluhu taulo Pilistin boito? Wolo Eeya mamopoo̒ haama mai olo watotia?” “Tuhuwalo!” Tahuda mai lo Eeya. “Wau̒ mamongohi mai olemu u moo̒haama!”

²⁰ Lapatao̒ malonao̒ tei Dauda ode Baal-Perasim wau mota teto pasuukani lo Pilistin boito ilolaahelio. Tulusi tio loloi̒ya, “Eeya malopo aantulu polo bintengi lomusuu̒, debo odelo taluhee daa̒ helopo loohubeo̒ totoonulalo mao̒ todelomo ngoi̒ntalo mato.” Sababu uito tambati boito ilunteelio Baal-Perasim.

²¹ Pasuukani lo Pilistin malolahi lou̒ diila ilohiyango lodelo bubuu-iyaalo balaahala limongolio. Bubuu-iyaalo boito hilama lei Dauda wolo tahidudua̒ olio.

²² Diila lohiheo lapatio mao̒ taulo Pilistin luli lonao̒ mai longaawasa Lumbaya Repaim.

²³ Pee̒entapo tei Dauda lohile potuhata to Eeya. Eeya lotahuda mai, “Diila mao̒ tuhua timongolio monteea, bo ponao̒lo mota mohelili tuhuwalo timongolio monto dibalaka, totili bubuu-ngowaalo ayu murbei.

²⁴ Wonu bolo odungohemu tingohe debo odelo diambangio lotaa hibaalisia tohudu aa̒ayuwaalo boito, yi pomajulo, sababu Wau̒ mamonao̒ totalumu u mopoo̒laaheo̒ suludadu lo Pilistin.”

²⁵ Tei Dauda lopohutu mao̒ wolo upiloa̒hu lo Eeya, wau tio ilohaasili lopotouli taulo Pilistin lonto Geba demola Gejer.