OLUO LO SAMUEL 4 - KITABI HABARI MOPIOHE

Tei Isyboset pilatelio yila-yilateelo mao̒

^1-4 Wali mola lei Saul uwewo yito tei Mepiboset, walao̒ talolai̒ lei Yonatan. Tio penggo anggadu o umulu limo lotaunu deu̒yito-yito tou̒ tei Saul wolei Yonatan yilate. Sababu tou̒ habari pasali lo opopate limongolio leidungga mai lonto kota Yijreel, taabua tamolaalawa olei Mepiboset lomudua̒ao̒ olio lapatao̒ tilumeteo̒; bo sababu taabua boito malo tametamea̒ daa̒, yi walao̒ boito lodehu tilinggula lowali penggo. Tou̒ tei Isyboset talolai̒ lei Saul loo̒dungohe deu̒ tei Abner mapilatelio yila-yilateelo mao̒ to Hebron, mailooli lomola sumangatilio, wau ngoilanggubu bangusa lo Isirai̒lu mailoohe. Tei Isyboset o polowila duulota talowali tau̒wa lo pasuukani pololuuhu; u ngotaalio ilunte Baana; u ngotaalio poli ilunte Rekhab. Timongolio walae̒e Rimon, lonto Beerot lonto suku Benyamin. (Beerot leituwoto tomadala Benyamin. Ulipu pulualio malolahi ode Gitaim wau lotibiluloa̒ mola teto tumulalo mai tou̒ boito.)

⁵ Taduulota polowila boito, deu̒yito-yito tei Rekhab wolei Baana lomonggata ode bele lei Isyboset wau leidungga mota odito tou̒ dulahee totau̒, tou̒ tei Isyboset donggo lotihuheli dulahu.

⁶ Taabua tamoodahawa bele malo diiduto tou̒ donggo hemo poo̒beresi pale, tulusi leituluhu. Sababu uito tei Rekhab wolei Baana loo̒ tuwota lou̒ poo̒-poo̒oyo.

⁷ Timongolio tulusi tilumuwota ode huwali pootuluhe tou̒toonu tei Isyboset donggo nulonulota daa̒, lapatao̒ longamo mao̒ olio tunggula yilate. Timongolio lolimadeo̒ lunggongio tulusi dilelio lonao̒. Ilo-iloonua timongolio lonao̒ loli Lumbaya Yordan.

⁸ Lapatao̒ yiludu mao̒ limongolio lunggonge Isyboset boito odelei Dauda to Hebron sambela loloi̒ya mao̒, “Utieelo lunggonge Isyboset walae̒e Saul, musu li Baginda tahelo tolopani ohilaa momate-mateelo mao̒ oli Baginda. Todulahee botie Eeya malotuli mai huhutu lei Saul wau waliilio odeli Baginda.”

⁹ Bo tei Dauda lolametao̒, “Eeya tatumu-tumulu, malo poa̒ahu olau̒ lonto totoonulalo topotala, wau motota deu̒ u mapoo̒taau̒ botie otutu.

¹⁰ Tou̒ to Ziklag woluo taa u lopoo̒taa olau̒ pasali opopatelio lei Saul, to lantobio deu̒ tio helodelo habari mopiohu. Bo tio maa yilau̒puu̒ wau pilateu̒ yila-yilateelo mao̒. Uitolo wuupa uilohiu̒ to olio odelo wuupa to habari u dilelolio boito.

¹¹ Donggo boli lebe mobuheetao̒ poli hukuumani umaa podehuwou̒ ode tamoleeto tamalo mate tau yila-yilateelo mao̒ tadiila ototala wau donggo hituluhe to belelio lohihilao! Botia wau̒ mohile wolo moo̒ohuu̒ polotuli olemu to pilomatea yila-yilateelo mao̒ boito, wau lopoo̒ pulito olimongoli lonto tudu lodunia botie!”

¹² Lapatao̒ uito tei Dauda lomarentao̒ ode taulio u momate mateelo mao̒ olei Rekhab wolei Baana. Lapatao̒ pilatelio yila-yilateelo mao̒, oa̒ato wau ului̒ mongolio ilolongo wau ntilangio totili lo kulamu. Bo lunggongee Isyboset boito hilamalio wau yilobungio tokota boito olo todelomo kuubulu lei Abner.