OLUO LO SAMUEL 3 - KITABI HABARI MOPIOHE

¹ Popaatea towolota lo tahelo panggala to ngaalaa lei Saul wau tahelo panggala wolei Dauda debo pohupohutu tulusi. Tei Dauda helebe molotola mola, hiambola tuwaliilio helebe molupuheo̒.

Walao̒ mongo lolai̒ lei Dauda

² Walao̒ mongo lolai̒ lei Dauda tahe pilotutulio mai to Hebron yito u wumbutio mola botie lodudua̒ toyunuto lo pilotutulio mai, odie mola: Tei Amnon. Tiilolio yito ti Ahinoam lonto Yijreel.

³ Tei Kileab. Tiilolio yito ti Abigail, janda lei Nabal lonto Karmel. Tei Absalom. Tiilolio yito ti Maakha, puusili li Olongia Talmai lonto Gesur.

⁴ Tei Adonia. Tiilolio yito ti Hagit. Tei Sapaca. Tiilolio yito ti Abital.

⁵ Tei Yitram. Tiilolio yito ti Egla. Olomoota walao̒ mongo lolai̒ boito he pilotutulio mai to Hebron.

Tei Abner helo panggala wolei Dauda

⁶ Tou̒ popaatea donggo pohupohutu tulusi towolota lo tahelo panggala wolei Dauda wau tahelo panggala lo ngaala lei Saul, tei Abner helo tolopani alihu heingio lebe udaa̒ mao̒ towolota lo tahelo panggala wolei Saul.

⁷ Tou̒ dulahee tuwau tei Isyboset, talolai̒ lei Saul, lopotuludeo̒ olei Abner lotuluhee wolo ngotaalio lopipia lei Saul tai̒lunte Rispa walae̒e Aya.

⁸ Lapatao̒ tei Abner maloingo daa̒ wau loloi̒ya mao̒, “Wolo ti Tuani lowatotia hemo lantobu olo watotia botie hemo hiyanati olei Saul wau lotiwambao̒ ode Yehuda? Tumulalo mai bohulio watotia tatapu wau molotolo hilao to olei Saul tiyamo li Tuani, wau tomongo ilaatolio wau mongo sahaabatilio. Watotia malomantu oli Tuani lowatotia tilinggula diila ilolaahe lei Dauda. Eleponu odito ti Tuani lowatotia helohina olo watotia bo sababu sua̒li lotaabua!

^9-10 Lebe mopioheo̒ watotia motulungi olei Dauda, tidiyolo mao̒ Eeya malodanti mai olo watotia mamohama bele biluloa̒ saaha li olongia botie lonto olei Saul wau waliilio mola, lapatao̒ mamomudua̒a olei Dauda mowali olongia to ngoilanggubu Isirai̒lu wau Yehuda. Pohileaala dua̒ Allahu Taa̒ala momate mai olo watotia mate-mateelo mao̒, wonu diila ponao̒ lo watotia danti lo Allahu Taa̒ala odelei Dauda boito!”

¹¹ Tei Isyboset diila loo̒ tameto penu boli ngotahe mao̒, sababu tio moohe olei Abner.

¹² Lapatao̒ tei Abner malolao mola utolia odelei Dauda utou̒ boito woluo to Hebron, wolo lodelo mola tahuli odie, “Tatoonu tamo ngawaasa mao̒ huta botie? Pohutuwalo mai daantia wolaatia, yi watia mamomantu oli Tuani laatia alihu ngoilanggubu bangusa lo Isirai̒lu motiwambao̒ odeli Tuani laatia!”

¹³ Tametao̒ lei Dauda, “Ooo̒! Potunggula mao̒ tahuli botie odelei Abner: Wau̒ mohuto mohutu daantia wolemu, bo wolo saarati tuwau: ti Mikhal puusili lei Saul, musi deloomu mai ode olau̒ wonu bolo yio̒ monao̒ mai motaalua wolau̒.”

¹⁴ Lapatao̒ uito tei Dauda lolao olo utolia odelei Isyboset, wolo tahuli, “Wajibulio ti Tuani muli mopo walingai oli Mikhal, dile laatia, ode laatia. Tio matilali laatia wolo ngohetuto putungo tilalua taulo Pilistin.”

¹⁵ Lapatao̒ tei Isyboset lopoa̒hu utolialio lohama oli Mikhal lonto dilelio, deu̒yito-yito tei Paltiel walae̒e Lais.

¹⁶ Bo tei Paltiel debo lodudua̒ tulusi oli Mikhal sambela hiyohiyongo. Tou̒ timongolio leidungga mola ode kota lo Bahurim, tei Abner loloi̒ya mao̒ olio, “Sambelolo, pohualingolo!” Lapatao̒ malo hualingo tei Paltiel.

¹⁷ Tou̒ boito tei Abner donggo hemo dulohupa wolo tahimuloa lou̒ lipu lo Isirai̒lu wau loloi̒ya mao̒, “Malo hiheo timongoli mokahandaki olei Dauda mowali olongia limongoli.

¹⁸ Ntali, uti-utieelo hiyango olimongoli. Eelai mao̒, Eeya malodanti mai odelei Dauda, deu̒ Eeya mamomake olei Dauda u mopoa̒ahu umati-Lio Isirai̒lu monto tau lo Pilistin wau monto ngoa̒amila musuulio uwewo.”

¹⁹ Tei Abner olo helo dulohupa wolo tau-tauwalo Benyamin, wau lapatao̒ malonao̒ olo ode Hebron mola lopoo̒taa olei Dauda wolo u mai̒la korowa lotau lei Benyamin wau taulo Isirai̒lu boito.

²⁰ Tou̒ tei Abner wolo tadulo pulu lota tahidudua̒ olio lotaalua mao̒ wolei Dauda, tei Dauda malo powoluo potihunggu ode limongolio.

²¹ Lapatao̒ uito tei Abner lei̒ poluasi wau loloi̒ya mao̒, “Poluasia mai watia monao̒ mola motianga motia̒mbu ngoilanggubu Isirai̒lu alihu mopanggala woli Tuani laatia. Timongolio mamololimo oli Tuani laatia odelo olongia, wau lou̒ odito ti Tuani laatia mamo malenta ngoilanggubu lipu, motuuu̒de wolo kahandaki li Tuani laatia.” Lapatao̒ tei Abner yiluwasia lei Dauda lonao̒ wau pilongakualio mao̒ oa̒ahu lei Abner.

Tei Abner pilatelio yila-yilateelo mao̒

²² Tou̒ tei Abner malonao̒, tei Yoab wolo tahidudua̒ olei Dauda wewolio luli lohualingai lonto popaatea wau helodelo mai dadaata balangi yilambato.

²³ Odelei Yoab piloo̒taalio mao̒ deu̒ tei Abner malonao̒ mai lotaalua woli Olongia Dauda wau mailuasialio lonao̒ wau pilongakualio oa̒ahu lei Abner.

²⁴ Lapatao̒ malo dudulao̒ tei Yoab odeli olongia wau loloi̒ya mao̒, “Woloolo mola huhutu li Baginda boito? Tei Abner malonao̒ mai lotaalua woli Baginda. Yilongola tio pilopoluasi li Baginda lonao̒ odito wambai̒o?

²⁵ Tantulo mao̒ otaawa li Baginda nonao̒olio mai lei Abner boito bo mai mohimbulo oli Baginda, wau u motota mao̒ owowoluwoa wau ngoa̒amila lanjana li Baginda.”

²⁶ Lapatao̒ lololaa mao̒ olei Dauda, tei Yoab malolao mongo utolia mola lotiangai olei Abner. Timongolio helo lunuhe olei Abner demola membideo̒ ali lo Sira, tulusi luli dilelo mai limongolio. Ngoa̒amila boito lotoduo lou̒ diila ilotaawa lei Dauda.

²⁷ Lolamemeto tou̒ tei Abner leidungga mai ode Hebron, tio tiliangio mao̒ lei Yoab ode biihio, totili lohuhebu hulubangi, debo odelo mamo bisala hitua-tuawua u hehuliola. Bo debolo ngilamo lei Yoab ombongo lei Abner tunggula yilate. Odi-odieelo mola tei Abner yilate, pilatelio lei Yoab yila-yilateelo mao̒ u lotuli niyati to ilopatea lei Asael tawali-yaliilio.

²⁸ Tou̒ tei Dauda loo̒dungohe sua̒li boito, tio malo loi̒ya, “Otaawa lo Eeya deu̒ watotia wau ulipu lowatotia sama-samaata diila ototala todelomo sua̒li ilopatea lei Abner boito.

²⁹ Huliilo mao̒ tei Yoab wau ngoa̒amila ngaalaa̒lio moo̒tapu mai hukuumani sababu huhutuulio boito. Pohileaala dua̒ todelomo ngaalaa̒ lei Yoab wawaalia mola laito woluo taa u modutolaa ngongoto lo alipo u moo̒tihela hapato, meaalo mongo lolai̒ tadiila olootolo, meaalo umate todelomo popaatea meaalo tau̒ okuulangia lou̒ aalo!”

³⁰ Odi-odieelo mola tei Yoab wolei Abisai tawali-yaliilio, helotuli niyati odelei Abner sababu tei Abner malomate yila-yilateelo mao̒ olei Asael tawali-yali limongolio to delomo popaatea to Gibeon.

Tei Abner yilobungio

³¹ Lapatao̒ tei Dauda lopoa̒hu olei Yoab wau tahidudua̒ olio alihu mongaidinga pakeyangi limongolio, wau momake kaingi ilopatea wau mohilimutao̒ olei Abner. Wau tou̒ lodepita milate, ti Olongia Dauda lohihilao lonao̒ towulea bulua lomilate.

³² Tei Abner yilobungio to Hebron, wau ti olongia wolo ngoilanggubu ulipu helo hilimuta daa̒ totalu lokuubulu boito.

³³ Lapatao̒ uito tei Dauda lohilimutao̒ olei Abner, ualio mao̒, “Tingga mamusi tei Abner mate odelo taa abaloolo?

³⁴ Ului̒o diila tihu-tihuto, wau oa̒atio diila pungu-pungu. Tio yilate ngilamo lotaa u moleeto wau para-parangi.” Lapatao̒ ngoilanggubu ulipu lohiyongao̒ olei Abner lebe udaa̒ mola poli.

³⁵ Ilo-ilolaanga tau-tauwalo helo tolopani momiyo olei Dauda alihu molamela penu bo ngoi̒di, bo tio lotadia, “Bolo potala Allahu Taa̒ala momate mai olo watotia mate-matelo mao̒, wonu watotia molamela tou̒ dulahee diipo tumolopa mota!”

³⁶ Loo̒dungohe sua̒li boito ulipu lolaasa sanangi. Memangi, penu boli wolo wambai̒o u pohutuo lei Dauda, moo̒sanangi hilaa limongolio.

³⁷ Todulahee boito ngoilanggubu ulipu lei Dauda wau ngoilanggubu bangusa lo Isirai̒lu mongalati, deu̒ ti olongia diila mokahandaki polomatea mate-mateelo mao̒ to olei Abner boito.

³⁸ Uali olongia ode tahidudua̒ olio, “Wolo diila otaawa limongoli deu̒ todulahee botie ngotaalio lotau̒wa daa̒ to Isirai̒lu mailate?

³⁹ Eleponu wau̒ botie olongia tatilulaoto Allahu Taa̒ala, bo botia wau̒ molaasa molulupuhu. Mongo walae̒e Jeruya boito mailaba parangi. Wau̒ diila mambo mongaawasa mao̒ olimongolio. Pohileaala dua̒ Eeya mohukuumani mai tahileeta boito, motuuu̒de wolo huhutu limongolio!”